Read Zarma Proverbs 23 Bible Online

Proverbs 23 - Zarma bible

Proverbs 23

¹Saaya kaŋ ni goono ga goro dabarikooni banda ŋwaari do, Ma laakal hal a ma boori nda haŋ kaŋ go ni jine.

²Da ni ya laakal zaaro no ŋwaari gaa, Ma zaama daŋ ni karra gaa.

³Ma s'a laam'izey bini, Za kaŋ fafagay ŋwaari no.

⁴Ma si ni boŋ fargandi duure ceeciyaŋ ra, Ma si ni laakal sinji a gaa.

⁵Waati kaŋ ni na ni moy sinji a gaa, Kala fap! a daray! Zama haciika arzaka ga te fata nga boŋ se, Danga zeeban cine kaŋ ga tun ka deesi ka koy kala beene.

⁶Ni ma si gunuwante ŋwaari ŋwa, Ma s'a laam'izey bini mo.

⁷Zama danga mate kaŋ a goono ga miila nga bina ra, Yaadin mo no a go. A ga ne ni se: «Ma ŋwa, ma haŋ,» Amma a bina si ni gaa bo.

⁸Looma kaŋ ni ŋwa, ni g'a yeeri, Ni sanni kaana mo ma daray ni se.

⁹Ma si salaŋ saamo hanga ra, Zama a ga donda ni sanney laakalo.

¹⁰Ma si fari hirri seeda zeeno ganandi, Ma si furo alatuumey farey ra mo.

¹¹Zama i Fansakwa ya gaabikooni no, A ga faasa i se ni gaa.

¹²Ma ni bina ye dondonandiyaŋ ceeciyaŋ gaa, Ma ni hangey mo ye bayray sanni maayaŋ gaa.

¹³Ma si ni kambe candi ka fay da zanka goojiyaŋ, Zama baa ni n'a kar da goobu, a si bu bo.

¹⁴M'a kar da goobu, k'a fundo faaba Alaahara gaa.

¹⁵Ay izo, da ni bina te laakal, Kulu ay bumbo bina mo ga maa kaani.

¹⁶Oho, ay bina ga to da farhã, Saaya kaŋ ni meyo ga hayey kaŋ ga saba ci.

¹⁷Ni bina ma si canse zunubikooney gaa, Amma ni ma goro Rabbi humburkumay ra zaari me-a-me.

¹⁸Zama haciika a gonda alhakku, Ni beeja si fun mo.

¹⁹Ya ay izo, ma maa, ma te laakal mo, Ma ni bina daŋ fonda gaa.

²⁰Ma si goro baji hankoy game ra, Wala borey kaŋ laakal ga zaaru ham ŋwaari gaa,

²¹Zama borey kaŋ ga bugu nda ngey kaŋ laakal ga zaaru ŋwaari gaa wo, I ga aniya ka talka, Dusungu mo ga boro daabu nda zaara-zaara.

²²Ma hanga jeeri ni baaba kaŋ na ni hay se, Ma si donda ni nya waati kaŋ a zeen.

²³Ma cimi day, ma s'a neera, Oho, nga nda laakal, da dondonandiyaŋ, da fahamay.

²⁴Adilante baaba ga farhã gumo, Bora mo kaŋ na zanka laakalkooni hay ga du farhã a do.

²⁵Naŋ ni nya da ni baaba ma maa kaani, Waybora kaŋ na ni hay, ma naŋ a ma farhã.

²⁶Ay izo, m'ay no ni bina, Naŋ mo ni bina ma maa ay fondey kaani.

²⁷Zama waykuuru ya goota no kaŋ ga guusu, Kaaruwa mo day kankamante no.

²⁸Oho, a ga lamba danga kosarayko, A ga amaana ŋwaakoy baabandi Adam-izey game ra.

²⁹May no goono ga te: «Way! Way!» May no ga ne: «Kaari!» May no ka gonda yanje? May no goono ga guutu? May no bora kaŋ gonda maray-marayyaŋ kaŋ sinda sabaabu? May no ka bara nda mo ciray-ciray yaŋ?

³⁰Kala ngey, borey kaŋ ga gay duvan* haŋyaŋ do, Ngey kaŋ ga duvan margante ceeci.

³¹Ma si duvaŋo guna saaya kaŋ a te iciray, Saaya kaŋ a ga boosu gaasiya ra, Saaya kaŋ a ga zulli nda kaani.

³²A bananta a ga nama danga gondi, A ga hay danga gazama.

³³Ni moy ga hari yawyaŋ guna, Ni bina mo ga hari siiroyaŋ ci.

³⁴Oho, ni ga ciya danga boro kaŋ goono ga kani teeku bindi ra, Wala boro kaŋ kani hi daabuley yollo boŋ beene.

³⁵Ni ga ne, «I n'ay kar, amma ay mana maa doori. I n'ay soote-soota, ay mana maray mo. Waati fo no ay mo ga hay? Ay ma ye k'a ceeci koyne hala hõ.»