Read Zarma Proverbs 24 Bible Online

Proverbs 24 - Zarma bible

Proverbs 24

¹Ma si canse boro laaley gaa, Ma si anniya ka goro i banda.

²Zama i biney goono ga toonye dabariyaŋ te no, I meyey mo goono ga hasaraw hariyaŋ fakaaray.

³Laakal do no boro ga windi cina, Fahamay do mo no i g'a sinji.

⁴Bayray do mo no i ga fu-izey toonandi nda arzaka kulu kaŋ gonda darza, Kaŋ yaŋ ga kaan mo.

⁵Laakalkooni gonda gaabi, Oho, boro kaŋ gonda bayray ga tonton da gaabi.

⁶Zama laakal saaware do no ni ga ni wongo te, Saawarekoy jama ra zaama go no.

⁷Laakal go beene, a bisa saamo hina, A si nga me fiti faada meyey ra mo.

⁸Boro kaŋ ga laala dabari te, borey ga ne a se zambante.

⁹Laakal-jaŋay dabarey teeyaŋ ya zunubi no, Dondako mo ya fanta hari no borey se.

¹⁰Da ni gaa ga yay kankami zaari ra, Ni gaabo ya ikayna fo no.

¹¹Ma borey kaŋ yaŋ i go ga konda buuyaŋ do faaba, Ngey kaŋ yaŋ ga tatanji ka koy wiyaŋ do mo, Kala ni m'i gaay.

¹²Da ni ne: «A go, iri mana woodin bay.» Manti biney neesiyaŋ Koyo go ga laakal? Ni fundo kurukwa mo, a mana bay no? A si bana boro kulu se nga goyo alhakku no?

¹³Ay izo, ma yu ŋwa, zama a ga boori. Yu fanta haro mo ga kaan ni meyo ra.

¹⁴Yaadin cine no ni ma bay kaŋ laakal ga bara ni fundo se. Da ni n'a gar, suba hanno go no, Hay kulu si ni beeja kaa ni se mo.

¹⁵Ya nin, boro laalo, Ma si gum ka lamba adilante nangora se, Ni ma si a fulanzamyaŋo do halaci mo.

¹⁶Zama adilante ga kaŋ sorro iyye, A ga ye ka tun koyne, Amma masiiba ga boro laalo zeeri.

¹⁷Ma si farhã da ni ibara kaŋ, Ni bina mo ma si maa kaani d'a kati.

¹⁸Zama Rabbi ma si di, a ma dukur mo, A ma bare ka fay da nga bine tuna a boŋ.

¹⁹Ma si ni bina taabandi goy laalo teekoy sabbay se, Ma si canse boro laaley gaa mo.

²⁰Zama boro laalo sinda suba hanno, I ga boro laalo fitilla wi mo.

²¹Ay izo, ma humburu Rabbi, da bonkooni mo, Ma si hangasinay da ngey kaŋ ga bara-ne-bara-ne.

²²Zama i masiiba ga kaa korab! folloŋ. May no ga bay halaciyaŋ kaŋ ihinka kulu ga kande?

²³Sanni woone yaŋ mo laakalkooney wane yaŋ no. Baar'a-baar'a si boori ciiti do.

²⁴Boro kaŋ ne boro laalo se: «Nin wo adilante no,» Dumey g'a laali, kundey g'a fanta.

²⁵Amma ngey kaŋ ga deeni a gaa, Woodin ga boori. Albarka hanno mo ga zumbu i gaa.

²⁶Nga kaŋ ga tu da mate kaŋ ga saba ga hima baakasinay sunsumyaŋ da me-kuurey.

²⁷Ma ni goyo soola taray, Ma soola ni boŋ se mo fari ra, Kokor banda mo ma ni windo cina.

²⁸Ma si goro seeda ni gorokasino boŋ daliili kulu si, Ni ga ba ni ma fafagay te da ni meyo, wala?

²⁹Ma si ne: «Kal ay ma te a se mate kaŋ cine a te ay se, Ay ga bora bana nga goyo boŋ.»

³⁰Ay na hawfuno fari fonda gana, Boro kaŋ sinda laakal reyzin* kalo no ay casu.

³¹A go, a kulu goono ga daabu nda karji, A batama go ga daabu nda ganda karji, A tondi windo mo kaŋ.

³²Saaya din ay guna, ay laakal mo hal a boori, Ay di, woodin n'ay gooji mo.

³³A cindi jirbi kayna jina, A cindi dusungu kayna, A cindi kambe koliyaŋ kayna hala ni ma jirbi,

³⁴Yaadin cine gaa no talkataray ga kaa ni gaa danga kosarayko, Ni jaŋa mo ga kaa danga wongaari.