Read Zarma Proverbs 29 Bible Online

Proverbs 29 - Zarma bible

Proverbs 29

¹Boro kaŋ gaa i ga kaseeti alwaati kulu, Day a ga nga hanga sandandi, Sikka si i g'a halaci fap! folloŋ! kaŋ sinda safari.

²Waati kaŋ adilantey ga tonton, talkey ga farhã, Amma waati kaŋ boro laalo ga may, Talkey ga bine jisi.

³Boro kaŋ ga ba laakal ga nga baaba bine kaanandi, Amma boro kaŋ ga hangasinay da waykuurey ga nga arzaka halaci.

⁴Cimi ciiti do no bonkooni ga laabu tabbatandi, Amma me-daabu tako wo g'a bare ka gum no.

⁵Boro kaŋ na me-kaanay te nga gorokasin se, Hirrimi no a goono ga hirri a ce taamey se.

⁶Boro laalo taalo se saw go no, Amma adilante ga doon ka farhã.

⁷Adilante ga laakal da talkey kalima, Day boro laalo sinda fahamay kaŋ g'a bay.

⁸Dondayankoyey ga danji daŋ kwaara gaa, Amma laakalkooney ga futay kosaray.

⁹Da laakalkooni gonda kakaw sanni nga nda boro kaŋ sinda laakal game ra, D'a te bine, wala d'a haaru, Kulu nda yaadin fulanzamay si no.

¹⁰Bine-biyey ga wangu cimikoy, Day adilante wo g'a baafuna ceeci.

¹¹Saamo ga nga bina kulu ci, Amma laakalkooni wo g'a naan ka gaay.

¹²Da mayraykoy na hanga jeeri tangari maayaŋ se, A ganakoy kulu mo ga ciya boro laalo yaŋ.

¹³Talka nda kankamko ga margu, Rabbi no g'i boro hinka kulu moy no kaari.

¹⁴Bonkooni kaŋ ga cimi ciiti te alfukaaru se, A karga ga sinji hala abada.

¹⁵Goobu nda kaseetiyaŋ ga laakal daŋ, Amma zanka kaŋ i muray ga haawi candi ka kande nga nya se.

¹⁶Waati kaŋ boro laaley ga tonton, Asariya taamuyaŋ mo ga tonton, Amma adilantey g'i kaŋyaŋo gomdo.

¹⁷Ma ni izo gooji, nga mo ga ni fundo no fulanzamay. Oho, a ga farhã daŋ ni bina ra.

¹⁸Nangu kaŋ sinda Irikoy bangandi, Borey ga boŋ hinyaŋ kulu furu, Amma boro kaŋ ga asariya haggoy ya bine-kaani-koy no.

¹⁹Sanni si bannya kaseeti, Zama baa a faham, a si ta bo.

²⁰Ni di boro kaŋ ga cahã sanni gaa? I ma bine daŋ saamo gaa, ka bisa bora din.

²¹Boro kaŋ na nga bannya biiri nda dakeyaŋ za a go zanka, A ga aniya ka ciya a se ize.

²²Boro kaŋ doona ka te bine ga yanje tunandi. Futaykooni mo, a taaley ga baa.

²³Boro boŋbeera g'a kaynandi, Amma boŋ-baanay-koy ga du beeray.

²⁴Boro kaŋ ga hangasinay da zay, Nga bumbo fundo no a goono ga konna. Baa i n'a daŋ zeyaŋ, a si ne hay kulu.

²⁵D'i humburu boro, a ga kande hirrimi, Amma boro kaŋ ga nga deyaŋo daŋ Rabbi gaa ga goro baani.

²⁶Boro boobo ga gaakuri ceeci mayraykoy do, Amma cimi ciiti ya, Rabbi do no a ga fun.

²⁷Toonyante ya fanta hari no adilantey se. Boro cimikoy mo, fanta hari no boro laaley se.