Read Zarma Proverbs 3 Bible Online

Proverbs 3 - Zarma bible

Proverbs 3

¹Ay izo, ma si dinya ay dondonandiyaŋey, Amma ma naŋ ni bina m'ay lordey gana.

²Zama i ga jirbiyaŋ da jiiriyaŋ da bine baani tonton ni fundo gaa.

³Suuji nda cimi ma si ni furu, Ni m'i sarku ni jinda gaa k'i hantum ni bina walhã boŋ.

⁴Yaadin gaa no ni ga du gaakuri da fahamay hanno Irikoy da borey mo jine.

⁵Ma de Rabbi gaa nda ni bina kulu, Ma si jeeri ni boŋ fahamay gaa.

⁶Ni muraadey kulu ra ni m'a seeda, Nga mo ga ni fondey sasabandi.

⁷Ma si ni boŋ guna sanda ni ya laakalkooni no, Ma humburu Rabbi ka fay da laala.

⁸Woodin ga ciya baani ni fuuma gaa, Ni biriyey ra mo, londi taji no.

⁹Ma Rabbi beerandi nda ni arzaka, Da ni boŋ-jina kulu.

¹⁰Yaadin gaa no ni barmey ga to da albarka. Ni kankamyaŋ nangey mo ga to da reyzin* hari taji hal a ma mun.

¹¹Ay izo, ma si donda Rabbi goojiyaŋo, Ma si wangu mo nd'a kaseetiyaŋo.

¹²Zama boro kaŋ Rabbi ga ba no a ga kaseeti, Danga mate kaŋ baaba ga te nga izo kaŋ a ga maa a kaani se.

¹³Bine-kaani-koy no, boro kaŋ ga du laakal, Da boro kaŋ ga to fahamay gaa mo.

¹⁴Zama a duure bisa nzarfu duure booriyaŋ, A riiba mo bisa wura hanno.

¹⁵A nafa ga bisa tondi hiir'ize caadante yaŋ. Hay kulu kaŋ ni ga bini sinda haŋ kaŋ i ga kar a gaa.

¹⁶Aloomar kuuku go a kambe ŋwaari gaa, A kamba wow gaa mo arzaka nda beeray.

¹⁷A fondey ya kaani fondoyaŋ no, A laawaley kulu mo baani no.

¹⁸A ga hima fundi tuuri borey kaŋ yaŋ n'a di se, Boro kaŋ go g'a gaay mo ya bine-kaani-koy no.

¹⁹Laakal boŋ no Rabbi na ndunnya sinji, Fahamay boŋ mo no a na beene tabbatandi.

²⁰A bayray boŋ mo no guusuyaŋey ceeri-ceeri, Beene mo na harandaŋ zumandi.

²¹Ay izo, ma laakal kaŋ ga boori nda fayanka mo haggoy, Ma si naŋ i ma fun ni jine.

²²Yaadin gaa no i ga goro fundi ni biya se, Taalam no koyne ni jinda gaa.

²³Waato din gaa no ni jina-koyyaŋ ga gana baani samay, Ni ca si kati mo.

²⁴Waati kaŋ ni ga kani, ni si humburu, Haciika ni ga ni kaniyaŋ te, Ni jirbo mo ga kaan.

²⁵Ma si humburu gumo nda humburkumay hari kaŋ ga ni jirsi, Wala nda boro laaley hasaraw kaŋ ga kaa ni gaa.

²⁶Zama Rabbi ga ciya ni se deyaŋ hari, A ga ni ca haggoy hala i ma s'a di.

²⁷Ma si gomni ganji borey kaŋ yaŋ ga hima nd'a se, D'a go ni kamba dabari ra.

²⁸Ma si ne ni gorokasin se: «Koy ka kaa suba, ay g'a no ni se,» A go mo, haro go ni kambe ra.

²⁹Ma si dabari laalo miila ni gorokasin boŋ, Za kaŋ a goono ga goro baani samay ni jarga.

³⁰Ma si yanje da boro fo daliili kulu si, D'a mana hasaraw te ni se.

³¹Ma si canse nda toonyante, Ma si baa afo suuban a muraadey ra.

³²Zama siiriyankoy ya fanta hari no Rabbi se, Amma a gundo go adilante* banda.

³³Rabbi laaliyaŋo go boro laaley windey ra, Amma a ga adilantey nangorayey albarkandi.

³⁴Haciika a ga donda donda-caray-koy, Amma a ga gomni no lalabukoy se.

³⁵Laakalkoy ga darza tubu, Amma saamey ga haawi beerandi.