Read Zarma Proverbs 31 Bible Online

Proverbs 31 - Zarma bible

Proverbs 31

¹Irikoy wane bonkoono sanney, jawaabo kaŋ a nyaŋo n'a dondonandi nd'a neeya:

²Ifo no, ya ay izo? Ifo no, ya ay ize gunda? Ifo nooya koyne, ya ay sarti izo?

³Ma si ni gaabi no wayboro se, ni fondey mo, Ma s'i no boro kaŋ ga koyey halaci se.

⁴Manti bonkooney muraadu no, ya Irikoy bora, Manti bonkooney muraadu no i ma duvan* haŋ, Wala mo manti koy kayney wane no i ma ba baji!

⁵A ma si ciya i ma haŋ ka dinya asariya, I ma kankamante fo kulu ciiti sara.

⁶I ma baji no boro kaŋ go buuyaŋ me gaa se. Duvan* mo, i m'a no boro kaŋ ga maa taabi nga fundo ra se.

⁷A m'a haŋ ka dinya nda nga talkatara, A ma si tonton ka fongu nda nga masiiba.

⁸Ma ni meyo feeri zama ni ma beebey gaa, Da borey kaŋ ga ti faaji izey kulu sabbay se mo.

⁹Ma ni meyo feeri ka adilitaray ciiti te, Ni ma cimi ciiti te alfukaarey da jaŋaykoyey se.

¹⁰May no ga du wayboro kaŋ bine ga hanan? Zama a daymi hay ga bisa tondi hiir'ize caadante yaŋ.

¹¹A kurnyo bina ga de a gaa, a si jaŋ riiba mo.

¹²Wando fundo jirbey kulu, A ga gomni te a se, manti laala bo.

¹³A ga feeji hamni nda haabu mo ceeci. A gonda himma nga kambe goyey ra.

¹⁴A ga hima danga hiyaŋ kaŋ ga dira ka koy fatawci, Nangu mooro no a ga nga ŋwaaro ceeci ka kande.

¹⁵Za cino ga cindi no a ga tun, A ma nga almayaaley no ŋwaari, A ma goy fay-fay nga ize wayey se.

¹⁶A ga laakal nda fari hal a ma boori, Gaa a m'a day. Nga kambey riiba no a ga reyzin* kali tilam d'a.

¹⁷A ga guddu nda gaabi ka nga jasey gaabandi.

¹⁸A ga faham da nga dillaŋtaray jinayey, Kaŋ riiba ŋwaari hariyaŋ no. A fitilla mo si bu cin.

¹⁹A ga nga kambe daŋ bindaari gaa, A kambe izey mo goono ga hanjal gaay.

²⁰A ga nga kambe salle alfukaarey se, Oho, a ga nga kambey salle jaŋaykoyey se.

²¹A si karhã da hargu alwaati nga almayaaley se, Zama a windo kulu goono ga hargu kwaay taalamanteyaŋ daŋ.

²²A ga tangara baanoyaŋ te nga boŋ se, A bankaaray lin* kaymi hanno nda suniya no.

²³A kurnyo mo, i g'a bay faada meyo gaa, Waati kaŋ a ga goro kwaara arkusey game ra.

²⁴Waybora ga lin bankaarayyaŋ te ka neera. A ga guddamayaŋ no nga dillaŋey kambey ra.

²⁵A daabiro ya gaabi nda beeray no, A laakal si tun alwaatey kaŋ ga kaa se.

²⁶A ga nga meyo feeri nda laakal, Gomni dondonandiyaŋ go no a deena boŋ.

²⁷A ga laakal nda nga windo muraadey hal a ma boori. A si hawfunay ŋwaari ŋwa.

²⁸A izey ga tun ka ne a se albarkante, Hala nd'a kurnyo mo, a g'a sifa ka ne:

²⁹«Wayboro ize boobo na hari hanno yaŋ te, Amma ni alhaalo bisa i kulu waney.»

³⁰Gaakuri gonda hiila, sogoyaŋ mo hari yaamo no, Amma wayboro kaŋ ga humburu Rabbi, i g'a sifa.

³¹W'a no a kambe nafa haro ra. A goyey mo m'a saabu faada meyey ra.