Read Zarma Proverbs 4 Bible Online

Proverbs 4 - Zarma bible

Proverbs 4

¹Ay izey, wa maa baaba lordi*. Wa hangan zama araŋ ma fahamay bay.

²Zama dondonandiyaŋ hanno no ay g'araŋ no. Araŋ ma si fay d'ay lordey.

³Zama waato ay ya ize no kaŋ ga maa ay baaba se, Ize kwaaso mo ay nya se.

⁴Ay baaba n'ay dondonandi mo. A ne ay se: «Ni bina m'ay sanney wo gaay. Ni m'ay lordey gana, ka funa.»

⁵Ma du laakal. Ma du fahamay. Ma si diny'a. Ma si fay d'ay me sanney ganayaŋ.

⁶Ma s'a furu, nga mo ga ni hallasi. Ni ma ba r'a, nga mo ga ni haggoy.

⁷Laakal, nga no ga bisa hay kulu, Ma du laakal binde. Oho me, A banda da ni jin ka du a, ma du fahamay.

⁸M'a beerandi, a ga ni daŋ jina. A ga ni no darza waato kaŋ ni n'a ganday.

⁹A ga te ni se gomni taalam ni boŋo gaa. A ga ni no koytaray fuula darzakoy.

¹⁰Ya ay izo, ma maa k'ay sanney ta, Ni fundo mo ga te aloomar.

¹¹Ay na ni dondonandi laakal fondo ra. Ay na ni daŋ sasabandiyaŋ laawaley ra.

¹²Da ni ga dira, ni ce daara si kankam, Da ni ga zuru mo, ni si kati.

¹³Ma gaabandi dondonandiyaŋ gaa hala a ma boori, Ma s'a taŋ, m'a haggoy, zama ni fundi nooya.

¹⁴Ma si furo boro yaamey laawalo ra, Ma si dira boro laaley fonda ra.

¹⁵Ma hibi ka fun a gaa, ma si gana noodin. Ni ma boŋ bare a gaa ka bisa.

¹⁶Zama i si jirbi kala nd'i na hasaraw te jina. I ga te mo fasiya mo, Kala nd'i naŋ boro fo ma kati jina.

¹⁷Zama laala ŋwaari no i ga ŋwa. I goono ga toonye baji haŋ.

¹⁸Amma adilante fonda ga hima mo boyaŋ cine, Kaŋ ga kaari kayna-kayna kala zaaro ma to.

¹⁹Boro laaley fonda ga hima kubay, I si bay haŋ kaŋ gaa no i ga kati.

²⁰Ay izo, ma hangan ay sanney se, Ma ni hanga jeeri ay deda se.

²¹I ma si gana ni jine, Ma haggoy d'ey ni bina bindo ra.

²²Zama fundi no borey kaŋ ga du ey se, Baani no mo i gaahamey kulu se.

²³Ma ni bina haggoy ka bisa hay kulu kaŋ ni ga haggoy, Zama a ra no fundi fondoyaŋ ga fun.

²⁴Ma me-ka-say ganandi ka kaa ni gaa. Meyey kaŋ yaŋ ga sanni yaamo ci ma moor'ey.

²⁵Ni moy ma guna jina, Ni mo-kuurey mo ma jina guna.

²⁶Ma ni cey laawalo sasabandi, Ni fondey kulu mo ga tabbat.

²⁷Ma si kamba kambe ŋwaari wala kambe wow haray, Ma ni ce ganandi ka fun laala do.