Read Zarma Proverbs 5 Bible Online

Proverbs 5 - Zarma bible

Proverbs 5

¹Ay izo, ma hangan ay laakalo se. Ma ni hanga jeeri ay fahama gaa.

²Zama ni ma fayankayaŋ gaay, Ni meyo mo ma bayray haggoy.

³Zama waykuuru deena ga yu tolli-tolli, A meyo mo ga yuttu nda ji.

⁴Amma a bananta ga fottu no danga farre, A ga dumbu danga takuba me cine.

⁵A cey ga zulli ka koy buuyaŋ do, A ce taamey ga Alaahara fonda di.

⁶A si fundi fondo lasaabu. A teerey mo si kay. A mana bay mo hala yaadin no bo.

⁷Sohõ binde ay izey, wa hangan ay se. Araŋ ma si fay d'ay me sanney.

⁸Ma ni fonda moorandi waykuuru, Ma si maan a windo me.

⁹Zama ni ma si ni beera no boro fooyaŋ se, Wala ni jiirey mo futaykooni se.

¹⁰Zama yawyaŋ ma si kungu nda ni gaabo, Ni goy taabi ma si ye yaw kwaara.

¹¹Ni kokora binde, ni ma soobay ka duray, Saaya kaŋ ni baso da ni gaahamo go ga zabu.

¹²Kala ni ma ne: «Kaari ay! Ay kaŋ wangu dondonandiyaŋ, ay bina donda kaseetiyaŋ.

¹³Ay mana baa hangan mo ay dondonandikoy sanno se. Ay mana hanga jeeri bora kaŋ n'ay dondonandi se.

¹⁴A cindi kayna ay halaci parkatak, Jama bindo ra nda borey marga ra.»

¹⁵Ma hari kaa ni bumbo gulla ra ka haŋ, Ma hari kaano kaa mo ni bumbo dayo ra.

¹⁶A ga saba no, ni hari mwa ma zuru ka koy taray, Wala a ma te hari zuru fondey boŋ?

¹⁷I ma bara ni hinne wane, Manti nin da yaw margante wane.

¹⁸Ni hari mwa ma goro albarkante, Ma te farhã nda ni zankataray wando.

¹⁹A ma te danga jeeri baakasinaykoy, Danga meena kaŋ ga boori. A fafey ma wasa ni se waati kulu, A baakasina ma ni bina kaanandi han kulu.

²⁰Zama ifo se no, ay izo, ni bina ga daray waykuuru banda, Hala ni ma wayboro yaw ganday?

²¹Zama boro te-goyey, Rabbi jine no i go. A ga boro laawaley kulu sasabandi mo.

²²Boro laalo laalayaŋo ga ye k'a di, I g'a gaay mo da nga zunubi korfey.

²³A ga bu dondonandiyaŋ-jaŋey sabbay se. A saamotaray beero ra no a ga te boŋdaray.