Read Zarma Proverbs 6 Bible Online

Proverbs 6 - Zarma bible

Proverbs 6

¹Ay izo, da ni na ni gorokasin yadda sambu, Da ni jin ka kamba kar yaw se,

²Ni me sanno na ni zorti, Ni me sanno na ni di nooya.

³Sohõ ay izo, kala ni ma woone te ka ni boŋ kaa kambe, Za kaŋ a ciya ni jin ka furo ni gorokasin kambe ra: Koy ka ni boŋ kaynandi ka ŋwaaray ni gorokasino gaa.

⁴Ma si ni moy no jirbi, Ni mo-kuurey mo, i ma si dusungu.

⁵Hala ni ma yana nda ni boŋ jina, Danga jeeri kaŋ fun kolikoy kambe ra, Danga curo kaŋ fun nga hirriko kambe ra.

⁶Ma koy nkondo do, nin hawfuno. Ma laakal d'a teerey ka te laakal.

⁷Nga wo, a sinda jine boro wala jine funa wala bonkooni.

⁸Kulu nda yaadin, a ga nga ŋwaaro soola kaydiya ra, A ga nga ŋwaaro margu-margu heemar waate.

⁹Kala waati fo no ni go ga jirbi, nin hawfuno? Waati fo no ni ga tun ni jirbo gaa?

¹⁰A cindi jirbi kayna, a cindi dusungu kayna, Da kambe koli kayna ka kani jina --

¹¹Yaadin gaa no ni talkatara ga kaa ni gaa danga zay cine, Ni jaŋa mo danga sooje cine.

¹²Boro yaamo, ilaalo no, A ga dira nda me-ka-say.

¹³A ga nga moy kar, a ga salaŋ nda nga cey, A ga cabeyaŋ te nda nga kambayzey.

¹⁴Garkasay go a bina ra. A ga laala ceeci han kulu, a ga kormoto say-say.

¹⁵Woodin se a masiibey ga kaŋ a boŋ baaru si, I g'a ceeri nda waasi -- woodin mo safari si.

¹⁶Hari iddu go no kaŋ Rabbi ga konna, Oho, hala iyye zaati kaŋ a bina g'i fanta:

¹⁷Mo boŋbeeraykoy, da deene tangarikom, Da kambey kaŋ yaŋ ga boro kaŋ sinda taali wi,

¹⁸Da bine kaŋ ga hari laalo miila, Da cey kaŋ ga zuru nda waasi ka koy hasaraw teeyaŋ do,

¹⁹Da tangari seeda kaŋ ga tangari ci, Da boro kaŋ ga fitina daŋ nya-izey nda care game ra.

²⁰Ay izo, ma ni baaba lordi gaay, Ni nya lordey mo, ma s'i furu.

²¹Ni m'i haw ni bina ra duumi, Ni m'i sarku ni jinda gaa.

²²Saaya kaŋ ni goono ga dira, i ga furo ni jine. Saaya kaŋ ni goono ka kani, i ga ni hallasi. Saaya kaŋ ni mo hay mo, i ga fakaaray ni se.

²³Zama i lordey ya fitilla no, I dondonandiyaŋey mo kaari no. Dondonandiyaŋ kaseetiyaŋ ya fundi fondo no.

²⁴I ga ni hallasi wayboro laalo gaa, Ka ni hallasi wayboro yaw me-kaano gaa.

²⁵Ma s'a booriyaŋo bini ni bina ra, A ma si ni di da nga mo karyaŋo.

²⁶Waykuuru sabbay se ŋwaari kayna ga bisa boro gaabi, Wayboro zina-teeri mo ga fundi darzakoy koli.

²⁷E! Boro ga danji daŋ ni gande ra ni bankaaray ma jaŋ ka ton, wala?

²⁸Wala ni ga danj'ize taamu ce taamey ma jaŋ ka kukure?

²⁹Yaadin no boro kaŋ ga margu nda nga gorokasin wande go. Boro kaŋ lamb'a gaa kulu si taali alhakku yana bo.

³⁰I si donda zay, d'a zay zama a ma nga fundo kungandi waati kaŋ a maa haray.

³¹Amma d'i n'a di, a g'a yeti sorro iyye. A windi arzaka kulu no a g'a bana nd'a.

³²Boro kaŋ na zina te da wayboro sinda fahamay no. Boro kaŋ na goy woodin te, Nga bumbo fundo no a goono ga ceeci nga ma halaci.

³³Marayyaŋ nda kaynandiyaŋ no a ga di. I s'a haawi tuusu mo.

³⁴Zama canse wo boro futay no, A si fay d'a bo, banayaŋ zaaro ra.

³⁵A baa si nda fansa kulu. A futa si kani, baa ni n'a no nooyaŋ boobo.