Read Zarma Proverbs 7 Bible Online

Proverbs 7 - Zarma bible

Proverbs 7

¹Ay izo, m'ay sanney haggoy, M'ay lordey jisi ni bina ra.

²M'ay lordey haggoy ka funa, Ay dondonandiyaŋey mo danga ni mo gure cine.

³Ni m'i haw ni kambayzey gaa. Ni m'i hantum ni bina walhã boŋ.

⁴Ma ne laakal se: «Ni ya ay wayme no.» Ma fahamay mo te ni dumi.

⁵Zama i ma ni hallasi ka ni wa da waykuuru, Nga, wayboro yaw sanni kaanokoy.

⁶Ay windo finetarey gaa ay niigaw, daabirjo ra haray.

⁷Kala borey kaŋ yaŋ sinda carmay game ra ay di arwasu fo. Ay n'a fayanka arwasey kaŋ sinda fahamay ra.

⁸A goono ga waybora fuwo batama casu. A na fonda di ka koy a kwaara haray,

⁹Wiciri kambu, almaari haray, cin kubay biyo ra.

¹⁰A binde, a go, a kubay da wayboro fo kaŋ gonda waykuuru bankaaray da bina kaŋ ga bar-bare.

¹¹Kaŋ kusuumante no, wayboro boŋ-ibaay-koy, A cey si kay nga windo ra.

¹²Han fooyaŋ a go fondey gaa, Han fooyaŋ a go batamey ra, Fondo gaarey kulu boŋ a goono ga lamba.

¹³Waybora din binde na arwaso di k'a garbe sunsum. A n'a guna da mo-koogay ka ne a se:

¹⁴«Saabuyaŋ sargayyaŋ go ay do hunkuna, Ay n'ay sarto bana.

¹⁵Woodin se no ay fatta ka ni kubay. Ay na ni moyduma ceeci da anniya, Ay di nin mo.

¹⁶Ay n'ay dima daaru nda kunta baano yaŋ, Misira kaymi suubanante no.

¹⁷Ay na waddi nda zawul da alowes* da cirinfi say-say ay daarijo gaa.

¹⁸Iri ma koy ka baakasinay haŋ ka kungu ka kani hala susubay, Iri ma maa kaani iri boŋ se da baakasinay.

¹⁹Zama windikoyo si no, A koy naaruyaŋ hala nangu mooro.

²⁰A konda nooru foola nga kamba ra, Hando farso no a ga ye ka kaa.»

²¹Waybora hin a da nga me kaana, A n'a halli da nga deena kaana.

²²Arwaso n'a gana fap! folloŋ, Danga haw kaŋ ga koy faawa do, Wala mo danga hawante kaŋ ga koy saamo goojiyaŋ do.

²³Hala hangaw n'a hay haama ra, Danga curo kaŋ ga cahã ka koy hirrimi do, A mana bay mo kaŋ nga fundo se no i n'a te.

²⁴Sohõ binde, ay izey, wa hanga jeeri ay se. Araŋ ma haggoy d'ay me sanney.

²⁵Ma si naŋ ni bina ma miila ka koy waybora din teerey do haray, Ma si kamba ka koy a fondey ra.

²⁶Zama a na boro boobo maray ka zeeri. Oho, borey kaŋ yaŋ a wi kulu ya kunda bambata no.

²⁷A windo ya Alaahara fondo no, A ga zulli no ka koy buuyaŋ fuwey do.