Read Zarma Proverbs 8 Bible Online

Proverbs 8 - Zarma bible

Proverbs 8

¹Laakal mana ce no? Fahamay mana nga jinda tunandi bo?

²Batamey ra da fondey bindo ra da fondey kubayyaŋ do a go ga kay.

³Da meyey gaa, nangey kaŋ borey ga furo kwaara ra, Da furoyaŋ meyey do, a go ga jinde sambu ka ne:

⁴«Ya araŋ alborey, araŋ no ay go ga ce. Ay jinda mo go ga koy Adam-izey do haray.

⁵Araŋ kaŋ sinda carmay, wa faham da laakal. Araŋ mo, saamey, wa goro nda bine kaŋ ga faham.

⁶Wa hanga jeeri ay se, Zama ay ga muraaduyaŋ kaŋ gonda beeray salaŋ. Ay meyo feeriyaŋ ya hari kaŋ ga saba no.

⁷Zama ay meyo ga cimi ci, Laala mo fanta hari no ay deena se.

⁸Ay me sanney kulu, adilitaray ra no i go, Haŋ kaŋ ga siiri si no i ra, wala haŋ kaŋ si saba.

⁹Taray kwaaray no i go boro kaŋ ga faham se, I ga saba mo borey kaŋ ga du bayray se.

¹⁰M'ay dondonandiyaŋey ta, manti nzarfu. Ma bayray ta ka bisa wura suubanante.

¹¹Zama laakal boori nda tondi hiir'ize caadante yaŋ. Hay kulu kaŋ boro ga ba si kar a gaa.

¹²Ay, Laakal, ay na haggoyyaŋ ciya ay nangoray. Ay du bayray da laakal kaŋ ga haggoy.

¹³Rabbi humburkumay ga ti boro ma konna ilaalo. Boŋbeeray da fooma nda fondo laalo da me-ka-say, ay ga konn'ey.

¹⁴Saaware ya ay wane no, da laakal hanno. Ay ya fahamay no, ay gonda hina.

¹⁵Ay do no bonkooney ga may, Mayraykoyey mo ga ciiti dumbu.

¹⁶Ay do no jine borey ga may, Ngey nda laabukoy kayney mo, Kaŋ yaŋ ga ti laabo cimi-ciiti-teekoy kulu.

¹⁷Ay ga ba ay baakoy, Borey kaŋ yaŋ g'ay ceeci nda himma mo ga du ay.

¹⁸Duure nda beeray go ay banda, Oho, da arzaka kaŋ ga duumi da adilitaray mo.

¹⁹Ay nafa ga bisa wura, Oho, a bisa wura hansante. Ay riiba mo bisa nzarfu suubanante.

²⁰Ay ga dira adilitaray fondey ra da cimi ciiti laawaley bindo ra.

²¹Zama borey kaŋ yaŋ ga ba ay, Ay ma naŋ i ma duure tubu, Ay m'i jisiri nangey toonandi.

²²Ay ya Rabbi wane no za a muraadey mana sintin, Za a goy sintinayey jine, doŋ waney.

²³Za zamana kaŋ ga duumi jine, za sintina, Za ndunnya mana baa te no i n'ay sinji.

²⁴Za guusuyaŋey si no i n'ay fattandi, Za hari-moy kaŋ yaŋ harey ga baa si no.

²⁵Za tondey mana sinji, Za tudey jine no i n'ay fattandi.

²⁶Za a mana laabo da saajey te jina, Za a mana laabu baano sintina te ndunnya ra.

²⁷Alwaato kaŋ a na beeney soola, ay go no. Saaya kaŋ a na teeko moyduma windi sanda korbay cine.

²⁸Saaya kaŋ a na beene batama gaabandi, Saaya kaŋ guusuyaŋey hari-moy te gaabi.

²⁹Saaya kaŋ a na teeko hirro daŋ a se, Zama haro ma si a lordo daaru, Alwaato kaŋ a na ndunnya sinjiyaŋ jeero te.

³⁰Saaya din ay go a do, goni no goy ra. Zaari kulu ay ya a farhã hari no, Han kulu mo ay ga farhã a jine.

³¹Ay ga farhã ndunnya ra kaŋ ga ti a wane, Ay kaani maayaŋo go Adam-izey do mo.

³²Sohõ binde, ay izey, wa hanga jeeri ay se, Zama albarkante no borey kaŋ yaŋ ga haggoy d'ay fondey.

³³Wa maa dondonandiyaŋ. Araŋ ma te laakal, araŋ ma s'a muray mo.

³⁴Albarkante no boro kaŋ ga maa ay se, Kaŋ zaari kulu a ga batu ay windi meyey bundey gaa.

³⁵Zama nga kaŋ ga du ay, fundi no a ga du, A ga du gaakuri Rabbi do mo.

³⁶Amma boro kaŋ ga zunubi te ay se, A goono ga nga fundo toonye. Boro kulu kaŋ ga konna ay, buuyaŋ no a ga ba.»