Read Zarma Proverbs 9 Bible Online

Proverbs 9 - Zarma bible

Proverbs 9

¹Laakal na nga fuwo cina, A na bonjare iyye jabu a se.

²A na nga almaney wi, a na nga duvaŋo* hanse, A na nga taablo daaru mo.

³A na nga koŋŋey donton, Kwaara tudey boŋ a goono ga jinde sambu ka ne:

⁴«Boro kulu kaŋ sinda carmay ma gana ka kaa ne.» Boro kaŋ jaŋ fahamay mo, a ga ne a se:

⁵«Kaa k'ay ŋwaaro ŋwa, Ka duvaŋo kaŋ ay hanse din haŋ.

⁶Wa fay da carmay-jaŋay ka funa. Wa gana fahamay fonda ra.»

⁷Boro kaŋ na dondako gooji, Haawi no a goono ga candi ka kande nga boŋ gaa. Boro kaŋ kaseeti boro laalo gaa mo ga wowi candi ka kande nga boŋ gaa.

⁸Ma si kaseeti dondako gaa, a ma si konna nin. Ma kaseeti laakalkooni gaa, a ga ba nin.

⁹Ma laakalkooni dondonandi, nga mo ga tonton da laakal. Ma adilante dondonandi, a ga tonton da bayray.

¹⁰Rabbi humburkumay ya laakal sintinay no, I ma Hananyankoyo bay, nga mo fahamay no.

¹¹Zama ay do no ni jirbey ga te iboobo, Ni jiirey mo ga tonton.

¹²Da ni gonda laakal, ni boŋ se no ni gonda laakal. Da ni ga dondayaŋ te mo, ni hinne no g'a jare.

¹³Wayboro kaŋ sinda laakal, kosongu boobo no a ga te, Saamo no si hay kulu bay.

¹⁴A ga goro nga windo me gaa kwaara ra. A go tudo boŋ da nga tita ka goro.

¹⁵Zama a ma borey kaŋ ga bisa yaŋ ce, Borey kaŋ yaŋ ga ngey fondey di sap-sap.

¹⁶Boro kaŋ si caram ma gana noodin. Nga mo kaŋ sinda fahamay, waybora ma ne a se:

¹⁷«Zaytaray harey ya yuyaŋ no, }waari mo kaŋ i ŋwa tugante ga kaan no.»

¹⁸Day a mana bay kaŋ buukoyaŋ go noodin, Waybora din yawey go Alaahara guusey ra mo.