Read Zarma Lamentations 3 Bible Online

Lamentations 3 - Zarma bible

Lamentations 3

¹Ay no ga ti bora kaŋ di taabi Rabbi futa goobo do.

²A n'ay candi k'ay daŋ ay ma dira kubay ra, Manti kaari ra bo.

³Daahir no, a na banda bare ay gaa, A ga nga kamba bare ay se zaaro me-a-me.

⁴A naŋ ay hamo d'ay kuuro ma soobay ka zabu, A n'ay biriyey ceeri-ceeri mo.

⁵A na cinariyaŋ te k'ay koli ka bare da forti nda taabi.

⁶A n'ay gorandi kubay nangey ra, Danga borey kaŋ bu za gayyaŋ.

⁷A n'ay windi nda kali kal ay si hin ka fatta. A n'ay guuru-say sisiro tiŋandi ay se.

⁸Oho, d'ay hẽ, ay ce, Ay goono ga gaakasinay ceeci, A ga wangu ay adduwa se.

⁹A na fonda daabu ay jine da tondi jabante yaŋ, Hal ay fondayzey siiri.

¹⁰Sanda urs* cine no a go ga gum ay se, Da muusu beeri cine kaŋ go nga tuguyaŋ nango do.

¹¹A n'ay kambandi ka kaa fonda ra, a n'ay tooru-tooru, A fay d'ay faaji ra.

¹²A na nga biraw candi, A n'ay ciya goo hari hangaw se.

¹³A naŋ nga tonga ra hangawey m'ay fun hal ay ganda ra.

¹⁴Ay ciya hahaarayaŋ hari ay jama kulu se d'i dooni hari mo, zaari me-a-me.

¹⁵A n'ay toonandi nda forti, A n'ay bugandi nda absint* hari mo.

¹⁶A n'ay hinjey ceeri nda tond'izeyaŋ, A n'ay daabu nda boosu.

¹⁷Ni n'ay fundo furu k'a moorandi laakal kanay, Ay dinya baa haŋ kaŋ ti albarka.

¹⁸Ay ne: «Ay gaabo ban, Hala nda beeje kaŋ ay ga sinji Rabbi gaa.»

¹⁹Ma fongu ay kankamo d'ay yawtaray gora gaa, Kaŋ ga ti absint da hari forto.

²⁰Daahir hala hõ ay bina goono ga fongu i gaa, Hal ay gungum ka ye ganda.

²¹Amma ay goono ga fongu hayey wo hal ay goono ga beeje sinji:

²²Rabbi baakasinay suujo se no iri mana halaci, Zama a bakarawo si ban.

²³A ga taji no susubay kulu. Ni naanayo ya ibeeri no!

²⁴Ay fundo ne: «Rabbi ya ay baa no, Ay binde ga beeje sinji a gaa.»

²⁵Rabbi ya gomnikoy no borey kaŋ g'a hangan se, Da fundo kaŋ g'a ceeci din se.

²⁶A ga boori no boro ma beeje sinji ka dangay ka Rabbi faabayaŋ batu.

²⁷A ga boori no boro se a ma taabi dondon za nga zankatara waate.

²⁸A ma goro nga hinne ka dangay, Zama woodin no Rabbi dake a boŋ.

²⁹A ma nga meyo daŋ laabu ra, Zama hambara a gonda beeje.

³⁰A ma nga garba no boro kaŋ g'a kar se, A ma to nda wowi haŋyaŋ.

³¹Zama Koy Beero si boro furu hal abada.

³²Baa day a na bine saray daŋ, Kulu nda yaadin a ga ye ka bakar nga baakasinay suuji booba boŋ.

³³Zama manti ibaay boŋ no Rabbi ga taabi wala bine saray dake Adam-izey boŋ.

³⁴I ma ndunnya ra hawantey kulu taamu-taamu,

³⁵I ma boro ganji haŋ kaŋ ga wazibi a se Beeray-Beeri-Koyo jine,

³⁶I ma boro cimo siirandi ciito do, Koy Beero mana yadda nda woodin yaŋ.

³⁷May no ga ci, a ma to mo, Da manti Koy Beero lordi no?

³⁸Masiiba nda gomni, Manti i kulu ga fun Beeray-Beeri-Koyo me ra no?

³⁹Yaadin gaa binde, mate no? Boro fundikooni ga guuni-guuni d'i n'a gooji nga zunubey sabbay se no?

⁴⁰Iri ma fintalyaŋ te, Iri m'iri muraadey neesi, Iri ma bare ka ye Rabbi do haray.

⁴¹Iri m'iri biney d'iri kambey sambu beene Irikoy gaa beena ra ka ne:

⁴²«Iri na taali te, iri murte _ni gaa|_, Ni mo, ni mana iri yaafa.»

⁴³Ni na ni boŋ didiji nda futay k'iri gaaray. Ni wi, ni mana bakar mo.

⁴⁴Ni tugu buru ra zama adduwa kulu ma si bisa ka koy ni do.

⁴⁵Ni n'iri ciya ziibi nda fisi ndunnya dumey game ra.

⁴⁶Iri ibarey kulu na ngey meyey feeri iri gaa.

⁴⁷Joote nda guusu hirrimi da halaciyaŋ da lemunyaŋ ga ti iri wane.

⁴⁸Ay mundey go ga dooru ka fun ay moy ra sanda gooru hari cine, Ay borey ize wayo halaciyaŋo sabbay se.

⁴⁹Ay moy go ga mundi dooru kaŋ sinda kayyaŋ, I mana naŋ,

⁵⁰Hala Rabbi kaŋ go beene ma guna ka di.

⁵¹Ay moy g'ay bina daŋ a ma maa doori zama ay go ga di ay gallo wandiyey kulu taabey.

⁵²Ngey kaŋ yaŋ ciya ay ibarey sabaabu kulu si, I n'ay gaaray da himma danga curayze cine.

⁵³I n'ay fundo pati guuso ra, I n'ay catu nda tondiyaŋ.

⁵⁴Haro din kulu no ka soobay ka gana ay boŋ, Hal ay ne: «I n'ay halaci.»

⁵⁵Ya Rabbi, guuso kaŋ ku gumo, Hal a daba gaa no ay na ni maa ce.

⁵⁶Ni maa ay jinda. Ma si ni hangey lutu d'ay hẽ ka gaakasinay ceeci.

⁵⁷Hano kaŋ hane ay na ni ce, Ni maan, ni ne ay ma si humburu.

⁵⁸Ya nin Koy Beero, ni faasa ay se k'ay fundo fansa*.

⁵⁹Ya Rabbi, ni di kankamo kaŋ i te ay se, Ni m'ay sabaabo ciiti dumbu.

⁶⁰Ni di banayaŋ da me-hawyaŋ kulu kaŋ i goono ga te ay boŋ.

⁶¹Ya Rabbi, ni maa i wowey d'i me-hawyaŋ kulu kaŋ i goono ga te ay boŋ,

⁶²Da borey kaŋ tun ay se yaŋ din guuni-guuney, Da dabarey kaŋ i goono ga gurum ngey biney ra ay boŋ zaari me-a-me.

⁶³Kala ni ma guna i gora d'i tunyaŋo. Ay ciya i se dooni hari.

⁶⁴Ya Rabbi, ni ga alhakku bana i gaa, I kambe goyey hina me.

⁶⁵Ni g'i no bine ra danawtaray, Kaŋ ga ti ni laaliyaŋo i se.

⁶⁶Ni m'i gaaray da futay k'i halaci i ma ban Rabbi beeno wo cire.