Read Zarma Lamentations 5 Bible Online

Lamentations 5 - Zarma bible

Lamentations 5

¹Ya Rabbi, ma fongu nda haŋ kaŋ du iri. Ma guna ka di iri haawo.

²I n'iri tubey ta ka no yawey se, K'iri windey mo no laabu fo boroyaŋ se.

³Iri ya alatuumiyaŋ no, iri sinda baaba, Iri nyaŋey mo kurnyey bu.

⁴Iri go g'iri haŋyaŋ harey day da nzarfu. Iri tuuri, kala hay boŋ no iri ga du a.

⁵Borey kaŋ n'iri gaaray n'iri ce kondo ŋwa. Iri farga, i si g'iri no fulanzamay mo.

⁶Iri na kambe salle Misirancey da Assiriyancey gaa, Zama iri ma du ŋwaari kaŋ ga wasa iri se.

⁷Iri baabey na zunubi te, i si no mo, Kal iri m'i taaley alhakko sambu.

⁸Bannyayaŋ go g'iri may, Iri sinda boro kulu kaŋ g'iri faaba i kambe ra.

⁹Iri fundey kataru no iri goono ga du ŋwaari nd'a, Saajo ra borey takuba sabbay se.

¹⁰Iri kuurey koroŋ sanda feema cine, Haray dunga korno sabbay se.

¹¹I na wayborey sara Sihiyona ra, Da wandiyey mo Yahuda kwaarey ra.

¹²I na mayraykoyey sarku i kambey gaa, I mana arkusey beerandi mo.

¹³Sahãkooney na hinji sambu ka duru, Zankey go ga kati tuuri jaraw cire.

¹⁴Arkusey ban faada meyey ra, Arwasey mo fay da dooni teeyaŋ.

¹⁵Iri biney farhã ban, Iri gaani kulu bare ka ciya bu baray.

¹⁶Koytaray fuula fun iri boŋey gaa ka kaŋ. Kaari iri sohõ! Zama iri na zunubi te.

¹⁷Woodin se no iri biney yangala, Woodin se mo no iri moy te kusa-kusa.

¹⁸Sihiyona tondo ciya kurmu. Zoŋoyaŋ go ga bar-bare noodin.

¹⁹Nin ya Rabbi, ni go no hal abada. Ni karga go no zamana ka koy zamana.

²⁰Ifo no ka naŋ ni ga dinya iri gaa duumi? Ifo se no ni n'iri furu banda za gayyaŋ?

²¹Ya Rabbi, m'iri ye ni do haray. Iri mo, iri ga bare ka ye ka kaa. M'iri jirbey tajandi sanda doŋ waney cine.

²²Da manti ni n'iri furu parkatak no, Ka futu iri gaa gumo mo.