Read Zarma Numbers 10 Bible Online

Numbers 10 - Zarma bible

Numbers 10

¹Rabbi salaŋ Musa se koyne ka ne:

²«Ni ma kaakaaci hinka te da nzarfu, danay goy no ni g'i te d'a. Ni g'i kar jama ceeyaŋ se, da gata dirawey mo se.

³Waati kaŋ i n'i kar, jama kulu ma margu ni do kubayyaŋ hukumo meyo jine.

⁴Da afolloŋ no i kar, kulu jine borey hinne no ga margu ni do, danga Israyla zambarey jine borey nooya.

⁵D'araŋ kar da gaabi, gatey kaŋ go wayna funay haray no ga fonda di.

⁶D'araŋ kar da gaabi sorro hinkanta, gatey kaŋ go dandi kambe ma tun dirawo se. I g'i kar da gaabi i dirawey se.

⁷Amma d'araŋ ga jama margu, araŋ ma kar, amma manti nda gaabi.

⁸Alfa Haruna izey, ngey no ga kaakaacey kar. Woodin ma ciya araŋ se farilla kaŋ ga duumi araŋ zamaney kulu ra.

⁹D'araŋ koy wongu araŋ laabo ra, ka gaaba nda ibare kaŋ goono g'araŋ gurzugandi, kal araŋ ma kaakaacey kar da gaabi. Rabbi araŋ Irikoyo ga fongu araŋ gaa, a g'araŋ faaba mo araŋ ibarey kambe ra.

¹⁰Woodin banda araŋ farhã zaaro ra, da zaari hanney ra, da handu taji kayyaŋey hane mo, araŋ ma kaakaacey kar araŋ sargay kaŋ i ga ton boŋ, d'araŋ saabuyaŋ sargayey boŋ. I ma woodin te hal i ma ciya fonguyaŋ hari araŋ Irikoyo jine. Ay ya Rabbi no, araŋ Irikoyo.»

¹¹A ciya mo, jiiri hinkanta handu hinkanta, jirbi waranka hane, kala buru yuuma ziji Irikoy nangora seeda boŋ ka koy beene.

¹²Israyla izey mo tun ngey dirawo se ka fatta Sinayi ganjo ra. Buro koy ka zumbu Paran ganjo ra.

¹³Woone ga ti diraw sintina kaŋ i te Rabbi sanno boŋ, Musa banda.

¹⁴Sintina day, Yahuda izey gata liiliwalo no ka bara jina ngey sasara ra. Aminadab ize Nason no ga ti kunda din jine bora.

¹⁵Isakar izey kunda marga jine bora mo ga ti Zuwar ize Natanel.

¹⁶Zabluna izey kunda marga jine bora mo ga ti Helon ize Eliyab.

¹⁷I na Irikoy nangora zumandi. Gerson izey da Merari izey, ngey kaŋ goono ga Irikoy nangora jare na fonda di.

¹⁸Waato din gaa no Ruben gata liiliwalo na fonda di ngey sasara ra. A kunda marga jine bora ga ti Sedeyur ize Elizur.

¹⁹Simeyon izey kunda marga jine bora mo ga ti Zuri-Sadday ize Selumiyel.

²⁰Gad izey kunda marga jine bora mo ga ti Reyul ize Eliyasaf.

²¹Kohat izey na fonda di i banda. I go ga nangu hananta jinayey jare. Borey kaŋ jin din mo ga Irikoy nangora sinji hala woone yaŋ ga kaa.

²²Woodin banda Ifraymu izey liiliwalo na fonda di ngey sasara ra. A kunda marga jine bora ga ti Amihud ize Elisama.

²³Manasse izey kunda marga jine bora ga ti Pedazur ize Gamaliyel.

²⁴Benyamin izey kunda marga jine bora mo ga ti Gedayoni ize Abidan.

²⁵Woodin banda Dan izey gata liiliwalo na fonda di, gatey kulu kokoranta nooya. I koy ngey sasara ra. A kunda marga jine bora ga ti Ami-Sadday ize Ahiyezer.

²⁶Aser izey kunda marga jine bora ga ti Okran ize Pajiyel.

²⁷Naftali izey kunda marga jine bora ga ti Enan ize Ahira.

²⁸Yaadin no Israyla izey dirawo go d'a i sasarey ra, saaya kaŋ i ga fonda di.

²⁹Musa ne nga anzuray Reyul, Midiyance izo Hobab se: «Iri go diraw ra ka koy to nango kaŋ Rabbi ci ka ne: Ay g'araŋ no nd'a. Ni ma kaa iri banda, iri mo ga booriyaŋ te ni se, zama Irikoy na gomni salaŋ Israyla boŋ.»

³⁰A ne Musa se: «Ay si koy, amma ay ga koy ay bumbo laabo ra, ay dumey do.»

³¹Musa ne a se: «Ay ga ni ŋwaaray, ma si iri naŋ, za kaŋ ni bay iri ga gata sinji ganjo ra. Ni ga ciya iri se danga mo.

³²A ga ciya mo, da ni kaa iri banda, oho, a ga ciya, gomni kulu kaŋ Rabbi ga te iri se, yaadin no iri mo ga te ni se.»

³³I dira ka fun Rabbi tondo do ka jirbi hinza diraw te. Rabbi sappa sundurko mo go i jine jirbi hinza dirawo din ra, a goono ga fulanzamyaŋ nangu ceeci i se.

³⁴Rabbi buru yuuma mo go i boŋ do beene zaari, saaya kaŋ i ga tun gata do.

³⁵A ciya mo saaya kaŋ sundurko ga fonda di, kala Musa ma ne: «Ya Rabbi, ma tun! Ni ibarey ma say-say. Ngey mo kaŋ yaŋ ga wangu nin ma zuru ni jine.»

³⁶Da sundurko ga zumbu mo, Musa ma ne: «Ya Rabbi, ma ye ka kaa hala Israyla ize zambar-zambarey do.»