Read Zarma Numbers 33 Bible Online

Numbers 33 - Zarma bible

Numbers 33

¹Israyla izey dirawey neeya waato kaŋ i fun Misira laabo ra, i sasareyaŋey ra, Musa nda Haruna banda.

²Musa n'i dirawey d'i zumbuyaŋey do hantum, Rabbi sanno boŋ. Mate kaŋ i dirawey te d'a neeya:

³Handu sintina jirbi way cindi gu hane no i tun Ramses. Paska* suba no Israyla izey fatta nda gaabi kwaaray Misirancey jine.

⁴I fatta waato kaŋ cine Misirancey goono ga ngey hay-jiney kulu fiji, kaŋ yaŋ Rabbi kar i ra. Misira toorey boŋ mo no Rabbi na ciito te.

⁵Israyla izey binde tun Ramses ka koy ka zumbu Sukkot.

⁶I tun Sukkot ka koy zumbu Etam kaŋ go saaji bambata me gaa.

⁷I tun Etam ka ye Pi-Hahirot haray, kaŋ go Baal-Zefon jine, ka zumbu Migdol jine.

⁸I tun Pi-Hahirot ka gana teeko bindo ra ka bisa ka furo ganjo ra. I to jirbi hinza ga dira Etam ganjo ra ka koy zumbu Mara.

⁹I tun Mara ka koy to Elim. Elim gonda hari-mo way cindi hinka, da teenay nya wayye. I zumbu noodin.

¹⁰I tun Elim ka koy zumbu Teeku Cira jarga.

¹¹I tun Teeku Cira jarga ka koy zumbu Sin ganjo ra.

¹²I tun Sin ganjo ra ka koy zumbu Dofka.

¹³I tun Dofka ka koy zumbu Alusa.

¹⁴I tun Alusa ka koy zumbu Refidim. Noodin no jama mana du hari kaŋ i ga haŋ.

¹⁵I tun Refidim ka koy zumbu Sinayi ganjo ra.

¹⁶I tun Sinayi ganjo ra ka koy zumbu Binikomey Saarayey do.

¹⁷I tun Binikomey Saarayey do ka koy zumbu Hazerot.

¹⁸I tun Hazerot ka koy zumbu Ritma.

¹⁹I tun Ritma ka koy zumbu Rimmon-Perez.

²⁰I tun Rimmon-Perez ka koy zumbu Libna.

²¹I tun Libna ka koy zumbu Rissa.

²²I tun Rissa ka koy zumbu Kehelata.

²³I tun Kehelata ka koy zumbu Safer tondo do.

²⁴I tun Safer tondo do ka koy zumbu Harada.

²⁵I tun Harada ka koy zumbu Makelota.

²⁶I tun Makelota ka koy zumbu Tahat.

²⁷I tun Tahat ka koy zumbu Tara.

²⁸I tun Tara ka koy zumbu Mitka.

²⁹I tun Mitka ka koy zumbu Hasmona.

³⁰I tun Hasmona ka koy zumbu Moserot.

³¹I tun Moserot ka koy zumbu Bene-Yaakan.

³²I tun Bene-Yaakan ka koy zumbu Gudgoda.

³³I tun Gudgoda ka koy zumbu Yobata.

³⁴I tun Yobata ka koy zumbu Aborona.

³⁵I tun Aborona ka koy zumbu Eziyon-Geber.

³⁶I tun Eziyon-Geber ka koy zumbu Zin ganjo ra, kaŋ ga ti Kades.

³⁷I tun Kades ka koy zumbu Hor tondo, kaŋ go Edom laabo jarga tanjay.

³⁸Alfa Haruna kaaru Hor tondo boŋ ka bu noodin Rabbi sanno boŋ. Alwaati woodin a to jiiri waytaaci afo si da handu gu da zaari fo za Israyla izey Misira laabu funyaŋo ka kaa alwaati woodin.

³⁹Haruna gonda jiiri zangu nda waranka cindi hinza kaŋ gaa a bu Hor tondo boŋ.

⁴⁰Kanaanancey koy fo, kaŋ se i ga ne Arad, kaŋ go Kanaana laabo ra da goray Negeb haray, a maa i ne Israyla izey go fonda boŋ ga kaa.

⁴¹I tun Hor tondo do ka koy zumbu Zalmon.

⁴²I tun Zalmon ka koy zumbu Punon.

⁴³I tun Punon ka koy zumbu Obot.

⁴⁴I tun Obot ka koy zumbu Iye-Abarim, kaŋ go Mowab laabo me gaa.

⁴⁵I tun Iye-Abarim ka koy zumbu Dibon-Gad.

⁴⁶I tun Dibon-Gad ka koy zumbu Almon-Diblatayim.

⁴⁷I tun Almon-Diblatayim ka koy zumbu Abarim tondey ra, Nebo jine.

⁴⁸I tun Abarim tondey ra ka koy zumbu Mowab batamey ra, kaŋ ga maan Urdun isa, naŋ kaŋ i ga Yeriko kwaara fonnay.

⁴⁹I na gata sinji noodin Urdun jarga za Bayt-Yesimot kwaara ka koy Abel-Zittim, Mowab batamey ra nooya.

⁵⁰Kala Rabbi salaŋ Musa se waato kaŋ i go Mowab batamey ra, Urdun jarga, naŋ kaŋ boro ga Yeriko fonnay.

⁵¹A ne: «Ni ma salaŋ Israyla izey se ka ne: D'araŋ na Urdun daŋandi ka furo Kanaana laabo ra,

⁵²kal araŋ ma laabo gorokoy kulu gaaray araŋ jine, pat! I toorey mo, tondi nda bundu nda guuru waney, araŋ m'i kulu bagu-bagu, k'i tudey boŋ sududuyaŋ nangey halaci.

⁵³Araŋ ga laabo din ŋwa ka goro a ra, zama ay na laabo no araŋ se, a ma ciya araŋ wane.

⁵⁴Araŋ ma tubo fay kurne boŋ d'araŋ windey boŋ. Boro boobo i m'i no i tubo kaŋ ga baa. Borey kaŋ si baa mo, i m'i no kayna. Boro kulu ga du wo kaŋ me kurna na ni no. A ga ciya araŋ wane araŋ kaayey kundey boŋ.

⁵⁵Amma d'araŋ mana laabo din gorokoy kulu gaaray araŋ jine parkatak, i borey kaŋ yaŋ araŋ ga naŋ ga ciya araŋ se danga ndaaniyaŋ araŋ moy ra. I ga ciya danga karjiyaŋ araŋ carawey ra mo. I ga ciya araŋ se ibareyaŋ laabo kaŋ ra araŋ ga furo ka goro din ra.

⁵⁶A ga ciya mo, ay ga kokor ka te araŋ se mate kaŋ cine ay waadu ya te i se.»