Read Zarma Numbers 34 Bible Online

Numbers 34 - Zarma bible

Numbers 34

¹Rabbi salaŋ Musa se ka ne:

²«Ni ma woone ci Israyla izey se ka ne: D'araŋ furo Kanaana laabo ra, (laabo mo ga ciya araŋ se tubu, sanda laabu kulu kaŋ go Kanaana laabo hirrey ra),

³kal araŋ ma hirri candi. Dandi kambe haray a ga tun Zin saajo ra, Edom casanta. Araŋ dandi kambe haray hirro ga tun Ciiri Teeko me gaa, wayna funay haray.

⁴A ga windi Akrabbim gangara se dandi kambe haray ka gana ka koy to Zin. A ga bisa noodin ka soobay dandi kambe haray kal a ma koy to Kades-Barneya, ka gana kala Hazar-Addar, ka bisa noodin kala Azmon.

⁵Za Azmon no hirro ga windi kala boro ma koy to Misira gooro gaa, ka do hala Teeku Beero gaa, nango kaŋ a ga ban.

⁶Wayna kaŋay hirro mo ma ciya Teeku Beero, nga no ga te araŋ se hirri wayna kaŋay haray.

⁷Araŋ azawa kambe haray hirro mo neeya: za Teeku Beero gaa araŋ ma hirri tondi yaŋ daŋ kala Hor tondo gaa.

⁸Za Hor tondo gaa araŋ ma lasaabu kala Hamat kwaara meyo gaa. Araŋ hirro ma koy ka to Zadada mo,

⁹a ma gana ka koy to Zifron, a ma kokor Hazar-Enon do haray. Woodin no ga ti araŋ azawa kambe haray hirro.

¹⁰Araŋ wayna funay hirro mo, araŋ m'a lasaabu za Hazar-Enon ka koy Sefam.

¹¹Za Sefam a ma zulli kala Ribla, kaŋ go Ayin se wayna funay haray. Hirro ma bisa ka zulli Cinneret teeko jabo gaa wayna funay haray,

¹²ka Urdun isa gana ka dandi. Hirro ma koy ka ban Ciiri Teeko me gaa dandi kamba haray. Woodin no ga ti araŋ laabo d'a hirrey a casanta kuray kulu.»

¹³Kala Musa ci Israyla izey se ka ne: «Woodin no ga ti laabo kaŋ araŋ ga tubu kurne boŋ, kaŋ Rabbi ne i m'a no kunda yagga nda jara se.

¹⁴Zama Ruben izey kunda, i kaayey windey boŋ, da Gad izey kunda ngey mo i kaayey windey boŋ du ngey tubo, ngey nda Manasse ra jara.

¹⁵Kunda hinka nda jara din du ngey tubo Urdun banda, Yeriko se wayna funay haray.»

¹⁶Rabbi salaŋ Musa se koyne ka ne:

¹⁷«Wa maa: borey kaŋ yaŋ ga laabo fay-fay araŋ se tubu, i maayey neeya: Alfa Eliyezar, da Nun izo Yasuwa, ngey no g'a fay.

¹⁸Araŋ ma koy fo suuban kunda fo kulu ra kaŋ yaŋ ga laabo fayyaŋo te.

¹⁹I maayey neeya: Yahuda kunda ra, Yefunna izo Kaleb.

²⁰Simeyon izey kunda ra, Amihud izo Semuyel.

²¹Benyamin kunda ra, Kislon izo Elidad.

²²Dan izey kunda ra, koy fo kaŋ maa Bukki, Yogli izo.

²³Yusufu izey ra: Manasse izey kunda ra, koy fo kaŋ maa Hanniyel, Efod izo.

²⁴Ifraymu izey kunda ra, koy fo kaŋ maa Kemuwel, Siftan izo.

²⁵Zabluna izey kunda ra, koy fo kaŋ maa Elizafan, Parnaka izo.

²⁶Isakar izey kunda ra, koy fo kaŋ maa Paltiyel, Azzan izo.

²⁷Aser izey kunda ra, koy fo kaŋ maa Amihud, Selomi izo.

²⁸Naftali izey kunda ra mo, koy fo kaŋ maa Pedahel, Amihud izo.»

²⁹Woodin yaŋ no ga ti borey kaŋ yaŋ Rabbi lordi ka ne i ma tubo fay-fay Israyla izey se Kanaana laabo ra.