Read Zarma Matthew 1 Bible Online

Matthew 1 - Zarma bible

Matthew 1

¹Yesu Almasihu kaajo tira neeya, Dawda izo, Ibrahim ize.

²Ibrahim na Isaka hay, Isaka mo na Yakuba hay, Yakuba na Yahuda nda nga nya-izey hay,

³Yahuda na Farisa nda Zera hay Tamar gaa, Farisa mo na Hezron hay, Hezron na Arama hay,

⁴Arama na Aminadab hay, Aminadab na Nason hay, Nason na Salmon hay,

⁵Salmon na Buwaza hay Rahab gaa, Buwaza na Obida hay Ruta gaa, Obida na Yasse hay,

⁶Yasse mo na Bonkoono Dawda hay. Dawda mo na Suleymanu hay Uriya wande zeena gaa,

⁷Suleymanu mo na Rehobowam hay, Rehobowam na Abiya hay, Abiya na Asa hay,

⁸Asa na Yehosafat hay, Yehosafat mo na Yoram hay, Yoram na Uzziya hay,

⁹Uzziya na Yotam hay, Yotam na Ahaz hay, Ahaz na Hezeciya hay,

¹⁰Hezeciya na Manasse hay, Manasse na Amon hay, Amon na Yosiya hay,

¹¹Yosiya na Yekoniya nda nga nya-izey hay dira ka koy Babila* yaŋo alwaato ra.

¹²Dira ka koy Babila banda, Yekoniya na Salitila hay, Salitila na Zerubabel hay,

¹³Zerubabel na Abihud hay, Abihud na Eliyacim hay, Eliyacim na Azura hay,

¹⁴Azura na Zadok hay, Zadok na Ahima hay, Ahima na Aliyuda hay,

¹⁵Aliyuda na Eliyezar hay, Eliyezar na Mattana hay, Mattana na Yakuba hay,

¹⁶Yakuba na Yusufu, Maryama kurnyo, hay, Maryama kaŋ gaa i na Yesu, kaŋ se i ga ne Almasihu, hay.

¹⁷Kaayey kulu za Ibrahim gaa ka koy Dawda gaa, iway cindi taaci no. Dawda gaa ka koy Babila koyyaŋ diraw, nga mo iway cindi taaci no. Babila koyyaŋ diraw banda mo ka kaa Almasihu gaa, kaay way cindi taaci no.

¹⁸Mate kaŋ Yesu Almasihu hayyaŋo bara nd'a neeya: alwaato kaŋ i na hiijay alkawlo te a nyaŋo Maryama nda Yusufu game ra, za i mana care kubay jina, i na Maryama gar da gunde Biya* Hanna do.

¹⁹A kurnyo Yusufu binde, zama nga wo boro adili no, a si ba nga m'a daŋ batama, a miila nga m'a taŋ tuguyaŋ ra.

²⁰Amma za a goono ga woodin fongu nga bina ra, kal Rabbi* malayka bangay a se hindiri ra ka ne a se: «Yusufu, Dawda izo, ma si humburu Maryama hiija, naŋ a ma ciya ni wande, zama izo kaŋ go a gunda ra din, Biya Hanno do wane no.

²¹A ga ize aru hay, ni g'a maa daŋ Yesu mo, zama nga no ga nga borey faaba i zunubey gaa.»

²²Woodin kulu mo, a ciya no zama i ma Rabbi sanno kaŋ a ci annabi* do din toonandi kaŋ ne:

²³«Guna, wandiyo ga te gunde, a ga ize aru hay mo, i g'a maa daŋ Immanuwel,» (danga, Irikoy go iri game ra nooya.)

²⁴Yusufu tun nga jirbo gaa ka te sanda mate kaŋ cine Rabbi malayka na nga lordi* nd'a. A na nga wando sambu.

²⁵Amma a man'a bay wayboro, kal a na izo hay. A n'a maa daŋ Yesu.