Read Zarma Luke 1 Bible Online

Luke 1 - Zarma bible

Luke 1

¹Ya nin ay jine bora Tiyafilos, boro boobo na anniya haw ka hayey din baarey hantum kaŋ yaŋ tabbat no, i n'i te iri game ra.

²Za sintina moy seedey da Sanno saajawkoy mo n'i no iri se.

³Woodin sabbay se no ay mo di a ga boori ay ma hantum ni se. Zama ay na hayey din kulu guna-guna soosay, za sanno fuuma d'a fonda boŋ mo.

⁴Ay mo go ga hantum ni se hala ni ma sanno kaŋ i na ni dondonandi nd'a din tabbatandiyaŋo bay.

⁵Waato kaŋ Hirodus* gonda Yahudiya koytaray, alfaga* fo go no kaŋ a maa ga ti Zakariya, Abiya kuray boro no. A wando maa Alizabata, Haruna* dumo gaa n'a fun.

⁶I boro hinka mo adilanteyaŋ no Irikoy jine. I goono ga dira Rabbi lordey d'a farilley kulu ra, taali kulu si.

⁷Amma i sinda ize, zama Alizabata wo waygunu no. I boro hinka mo jiirey baa.

⁸A go no, Zakariya go nga alfagataray goyo gaa Irikoy jine, nga alwaato boŋ.

⁹Alfagataray alaada boŋ kurne n'a daŋ a ma furo Irikoy* fuwo ra ka dugu ton.

¹⁰Jama kulu mo go taray ga adduwa te dugu tonyaŋo alwaato ra.

¹¹Rabbi malayka* fo mo bangay Zakariya se. A goono ga kay dugu tonyaŋ feema jarga, kambe ŋwaaro gaa haray.

¹²Zakariya laakalo tun waato kaŋ a di a, a humburu mo.

¹³Amma malayka ne a se: «Ma si humburu Zakariya, zama Irikoy maa ni ŋwaara. Ni wando Alizabata mo ga ize alboro fo hay ni se. Ni g'a maa daŋ Yohanna.

¹⁴Ni ga farhã ka te bine kaani, boro boobo mo ga farhã a hayyaŋo sabbay se.

¹⁵Zama a ga te boro beeri no Rabbi jine. A si duvan* wala baji dumi kulu haŋ. A ga to mo nda Biya* Hanno za nyaŋo gunda ra.

¹⁶A ga Israyla* ize boobo bare k'i ye Rabbi ngey Irikoyo do haray.

¹⁷A ga koy Rabbi jine mo nda Iliya* biya*, d'a dabaro mo, zama a ma baabey biney bare k'i ye izey do haray, a ma hanga sandey ye i ma dira adilantey* laakalo ra, a ma jama soolante mo margu Rabbi se.»

¹⁸Zakariya ne malayka se: «Ifo gaa no ay ga woodin bay? Zama ay ya dottijo no, ay wande mo jiirey baa.»

¹⁹Malayka mo tu ka ne a se: «Ay no Jibraylu, kaŋ ga kay Irikoy jine. Irikoy n'ay donton no zama ay ma salaŋ ni se, ay ma kande ni se baaru hanno wo.

²⁰Guna, ni ga dangay, ni si du ka salaŋ mo koyne kala han kaŋ hane hayey din ga te, za kaŋ ni mana cimandi ay sanney se, kaŋ Irikoy ga toonandi ngey alwaato ra.»

²¹Jama mo go taray ga Zakariya batu. Kal i dambara nda gayyaŋo kaŋ a te Irikoy fuwo ra.

²²Waato kaŋ a fatta, a si hin ka salaŋ i se. I bay mo kaŋ a di bangayyaŋ fo Irikoy fuwo ra. Nga mo, a soobay ka te i se dedandiyaŋ, ka goro beebe.

²³A go no mo, kaŋ a goyo jirbey ban, a koy nga kwaara.

²⁴Jirbey din banda Alizabata, Zakariya wando te gunde. A na nga boŋ tugu handu gu ka ne:

²⁵«Ya-cine no Rabbi te ay se, hano kaŋ hane a bakar ay se, zama a m'ay jance haro ganandi borey jine.»

²⁶A go no koyne, a handu iddanta ra, kala Irikoy na malayka Jibraylu donton a ma koy kwaara fo do Galili laabo ra, kaŋ maa Nazara.

²⁷A ma koy wandiyo fo do kaŋ i ga ba k'a hiijandi alboro fo se. Albora maa ga ti Yusufu, Dawda dumo boro no. Wandiya mo maa Maryama.

²⁸Malayka furo a do ka ne a se: «Fofo, nin kaŋ du gomni. Rabbi go ni banda.»

²⁹Amma Maryama laakalo tun gumo sanno sabbay se. A goono ga miila nga bina ra hala fooyaŋ woofo dumi no woone.

³⁰Kala malayka ne a se: «Ma si humburu, Maryama, zama ni du gaakuri Irikoy do.

³¹Guna mo, ni ga te gunde, ni ga ize aru hay, ni g'a maa daŋ Yesu mo.

³²A ga ciya mo boro beeri, i ga ne a se Koy Beero kaŋ bisa ikulu Ize no. Rabbi Irikoy g'a no a kaayo Dawda koytara karga.

³³A ga koytaray ŋwa Yakuba dumey boŋ hal abada, a koytara mo sinda me.»

³⁴Maryama mo ne malayka se: «Mate no woodin ga te ka te d'a, za kaŋ ay mana alboro bay?»

³⁵Malayka tu ka ne a se: «Biya Hanno ga zumbu ni boŋ. Koy Beero kaŋ bisa ikulu dabaro no ga te ni se yuumay. Woodin sabbay se no, izo kaŋ ni ga hay din, i ga ne a se Ihanna, Irikoy Ize.

³⁶Guna mo, ni nya-ka-fo-sina Alizabata gonda ize nga gunda ra, nga nda nga zeena. Woone mo ga ti a handu iddanta, nga kaŋ waato i ga ne a se waygunu.

³⁷Zama sanni si Irikoy do kaŋ ga jaŋ dabari.»

³⁸Maryama ne: «Guna, ay ya Rabbi koŋŋa no. I ma te ay se mate kaŋ ni ci din.» Kala malayka n'a naŋ.

³⁹Maryama tun jirbey din ra ka koy da waasi tondey kuukey laabo ra, Yahudiya kwaara fo do.

⁴⁰A furo Zakariya fuwo ra ka Alizabata fo.

⁴¹A go no mo, waato kaŋ Alizabata maa Maryama fooyaŋo, kala attaciriya sar Alizabata gunda ra. Nga mo to nda Biya Hanno.

⁴²A na nga jinda sambu nda gaabi ka ne: «Ni ya albarkante no wayborey game ra, albarkante mo no ni gundayzo.

⁴³Man ay to mo, hala ay Rabbo nya ma kaa ay do?

⁴⁴Zama guna, waato kaŋ ni fooyaŋo jinda furo ay hangey ra, kala attaciriya sar ay gunda ra, farhã sabbay se.

⁴⁵Albarkante no ni kaŋ cimandi kaŋ Irikoy ga haya kaŋ nga ci ni se toonandi.»

⁴⁶Maryama mo ne: «Ay bina ga Rabbi beerandi,

⁴⁷Ay biya mo ga farhã Irikoy ay Faabakwa se.

⁴⁸Zama a na nga koŋŋa kaynandiyaŋo guna, Hal a go, ne ka koy jine zamana kulu izey ga ne ay se albarkante.

⁴⁹Zama nga kaŋ ga ti Hinkoyo, A te ay se hari bambata yaŋ, A maa ya Ihanna mo no.

⁵⁰A suujo go baabey da ngey waddey gaa ka koy izey da ngey waddey gaa, Ngey kaŋ yaŋ ga humbur'a gaa no.

⁵¹A na gaabi cabe nda nga kamba. A na borey kaŋ gonda boŋbeeray ngey biney saawarey ra din say-say.

⁵²A na gaabikooney zeeri ka kaa ngey koytaray kargey ra, Ka talkey beerandi.

⁵³A na harayzey kungandi nda hari hanno yaŋ, Amma arzakantey, a n'i sallama kambe koonu.

⁵⁴A na nga tamo Israyla gaa, Zama nga ma fongu nda suuji,

⁵⁵Mate kaŋ cine a ci iri kaayey, Ibrahim da nga banda mo se hal abada.»

⁵⁶Kala Maryama goro Alizabata do sanda handu hinza cine, waato din gaa no a ye fu.

⁵⁷A go no mo, Alizabata jirbey to kaŋ a ga hay, hala mo a na ize alboro hay.

⁵⁸A gorokasiney d'a nya-ka-fo-siney maa kaŋ Rabbi na nga suuji beero cabe a se. I farhã mo a banda.

⁵⁹Kala jirbi ahakkante hane i kaa zama ngey ma zanka dambangu*. I ho k'a maa ce Zakariya, a baabo maa.

⁶⁰Amma nyaŋo tu ka ne: «Manti yaadin no. I ga ne a se Yohanna.»

⁶¹I tu ka ne a se: «Ni dumo ra boro kulu si no kaŋ i g'a ce nda maa woodin.»

⁶²Kal i te dedandiyaŋ baabo se, k'a hã maa kaŋ no a ga ba i m'a ce d'a.

⁶³Nga mo, a na walhã hã ka hantum: «A maa ga ti Yohanna.» Hala boro kulu dambara.

⁶⁴Sahãadin-sahãadin, Irikoy na baabo meyo fiti, a n'a deena taŋ mo, hal a salaŋ ka Irikoy sifa.

⁶⁵Humburkumay kaa gorokasiney kulu gaa. Yahudiya tondey laabo kulu ra mo borey na baarey din ciinay te.

⁶⁶Borey kulu kaŋ maa mo n'i jisi ngey biney ra ka ne: «Zanka wo binde, mate no a ga bara nd'a? Zama haciika Rabbi kambe go a banda.»

⁶⁷Kala baabo, Zakariya to nda Biya Hanno ka annabitaray te ka ne:

⁶⁸«I ma Rabbi Israyla Irikoyo sifa, Zama a kaa ka nga borey kunfa, ka fansa te i se.

⁶⁹A na faaba hilli fo tunandi iri se nga tamo Dawda dumo ra.

⁷⁰Mate kaŋ Irikoy ci din annabi* hanney meyey ra, Za doŋ zamaney waney.

⁷¹Hal a m'iri faaba iri ibarey gaa, D'iri konnakoy kulu kambe ra mo.

⁷²A ma suuji te iri kaayey se, Ka fongu nda nga sappa hanna,

⁷³Zeyaŋo boŋ kaŋ Irikoy ze d'a iri kaayo Ibrahim se,

⁷⁴Hal a m'iri no iri ma faaba iri ibarey kambey ra, Iri ma may Irikoy se humburkumay si.

⁷⁵Iri ma Irikoy gana hananyaŋ da adilitaray ra, Hal iri aloomarey me.

⁷⁶Oho, nin mo zanka kayna, I ga ne ni se Koy Beero kaŋ bisa ikulu wane annabi, Zama ni ga furo Rabbi jine k'a fondey soola.

⁷⁷Ni ga faaba bayray no a borey se ngey zunubey yaafayaŋo do,

⁷⁸Irikoy bina suujo sabbay se, Kaŋ a do no a kande beene mo boyaŋo iri do.

⁷⁹Ngey kaŋ yaŋ go kubay ra da buuyaŋ biyo ra mo ga goro, Nga no ga kaari i gaa. A g'iri cey daŋ baani fonda ra mo.»

⁸⁰Zanka binde beeri ka te gaabi biya ra. A goro saajey ra hala jirbey kaŋ i n'a cabe Israyla se.