Read Zarma Luke 2 Bible Online

Luke 2 - Zarma bible

Luke 2

¹Jirbey din ra no hini sanni fo fun Kaysar* Agustos* do ka ne i ma laabey borey hantum.

²I na hantumyaŋ sintinay wo te waato kaŋ Cirinyos ga ti Suriya laabo koy.

³Kal i kulu koy zama i m'i hantum, boro kulu koy nga kwaara do.

⁴Yusufu mo ziji ka fun Nazara kwaara ra, Galili* laabo do, ka koy Yahudiya laabo ra, hala Dawda kwaara do, kaŋ se i ga ne Baytlahami, zama nga wo Dawda dumi no, d'a kuray boro mo.

⁵A koy zama i m'a hantum, nga nda nga wandiyo Maryama, kaŋ gonda gunde.

⁶A go no binde, waato kaŋ i go noodin, kala jirbey to kaŋ a ga hay.

⁷A na nga hay-jina hay, alboro. A n'a didiji nda zaara-zaarayaŋ k'a jisi garba fo ra, zama nangu si no i se yaw fuwo ra.

⁸Kurukoyaŋ go no laabo din ra, kaŋ yaŋ ga kani saajo ra ka ngey alman kuro batu cino ra.

⁹Kala Rabbi malayka fo kaa i do, Irikoy darza mo kaari i windanta. I humburu mo gumo.

¹⁰Amma malayka ne i se: «Wa si humburu, zama a go, ay kande araŋ se baaru hanno fo, farhã bambata wane, kaŋ ga ciya boro kulu wane.

¹¹Zama i na Faabako hay araŋ se hunkuna Dawda kwaara ra, Rabbi Almasihu no.

¹²Woone mo ga ciya araŋ se alaama: araŋ ga attaciriya fo gar didijante kaŋ go ga kani garba fo ra.»

¹³Kala sanni si, beene marga bambata fo go noodin malayka banda ga Irikoy kuku ka ne:

¹⁴«Darza go Irikoy gaa beene beena ra, ndunnya ra mo baani go borey game ra, kaŋ Irikoy ga maa i kaani.»

¹⁵Waato kaŋ malaykey fay d'ey ka ye beena ra, kala kurukoy ne ngey nda cara se: «Wa naŋ iri ma koy hala Baytlahami ka di hayo kaŋ te, kaŋ Rabbi n'iri bayrandi nd'a.»

¹⁶I kaa da waasi. Kal i na Maryama nda Yusufu gar, da attaciriya kaŋ go garba ra ga kani.

¹⁷Waato kaŋ i di a, i na sanno dede kaŋ malaykey ci ngey se zanka din boŋ.

¹⁸Borey kulu kaŋ maa dambara nda hayey kaŋ kurukoy ci i se.

¹⁹Amma Maryama na hayey wo kulu gaay k'i lasaabu nga bina ra.

²⁰Kurukoy ye, i goono ga Irikoy beerandi k'a kuku hayey wo kulu boŋ kaŋ ngey maa, da kaŋ ngey di mo, mate kaŋ cine i ci i se.

²¹Waato kaŋ jirbi ahakkanta to kaŋ i ga zanka dambangu*, i n'a maa daŋ Yesu, maa kaŋ malayka ci za Yesu mana te gunda ra.

²²Waato kaŋ i hanandiyaŋo jirbey to mo, Musa asariya* boŋ, kal i konda Yesu hala Urusalima* kwaara zama i m'a salle Rabbi se.

²³Mate kaŋ i n'a hantum Rabbi asariya ra ka ne: «Alboro hay-jine kulu, boro m'a fay waani k'a ye Rabbi se.»

²⁴I koy mo zama ngey ma sargay* no mate kaŋ Rabbi asariya ci, danga: «Koloŋay hinka wala tantabal ize hinka.»

²⁵Guna mo, boro fo go no Urusalima kaŋ maa Simeyon. Boro adili no, kaŋ ga humburu Irikoy mo, kaŋ goono ga Israyla kunfa batu.

²⁶Biya Hanno go a gaa mo. Biya Hanna jin k'a bayrandi kaŋ a si di buuyaŋ kala nd'a di Rabbi Almasihu jina.

²⁷Biya _Hanna|_ ra no a furo Irikoy* windo ra waato kaŋ hayrey kande zanka Yesu zama ngey ma te a se asariya alaada boŋ.

²⁸Kala Simeyon n'a sambu nga kambey ra ka Irikoy saabu ka ne:

²⁹«Sohõ, ya Koy Beero, ma naŋ ay, ni tamo ma dira baani, ni sanno boŋ.

³⁰Zama ay moy di ni faaba

³¹kaŋ ni soola ndunnya borey kulu jine.

³²Annura no kaŋ ga bangay ndunnya dumey se, darza mo no Israyla se, kaŋ ga ti ni wane jama.»

³³Baabo da nyaŋo mo, i dambara nda hayey kaŋ yaŋ i goono ga ne a boŋ.

³⁴Kala Simeyon na albarka gaara i se, ka ne a nyaŋo, Maryama se: «Guna, Irikoy na zanka wo jisi Israyla boro boobo kaŋyaŋo d'i tunyaŋo se. A ga goro alaama mo kaŋ i ga jance.

³⁵Hala ni bumbo mo, takuba ga ni fundo gooru, zama bine boobo miiley ma bangay.»

³⁶Wayboro annabi fo mo go no, kaŋ jiirey baa, kaŋ maa Hannata. Fanuwel ize way fo no, Aser kunda boro no. A wandiyotara banda a te jiiri iyye da nga kurnye.

³⁷A ciya wayboro kaŋ kurnye bu mo hal a to jiiri wahakku cindi taaci. A si fay da Irikoy windo mo. A goono ga sududu nda mehaw da adduwa mo cin da zaari.

³⁸A kaa mo saaya din ra. Kal a na Irikoy saabu gumo. A na zanka din ciine te borey se kaŋ ga Urusalima fansayaŋo batu.

³⁹Waato kaŋ i na hayey kulu kaŋ Rabbi asariya ci din ban, kal i ye Galili laabo ra hal ngey kwaara, Nazara.

⁴⁰Zanka mo, a beeri, a te gaabi, a to da laakal. Irikoy gomno mo go a boŋ.

⁴¹Jiiri kulu a hayrey ga koy Urusalima Paska bato* do.

⁴²Waato kaŋ zanka to jiiri way cindi hinka, i ziji ka koy bato do alaada boŋ.

⁴³Kaŋ i na jirbey toonandi, i goono ga ye ka kaa, kala zanka Yesu goro banda Urusalima ra. A hayrey sind'a baaru.

⁴⁴Kaŋ i go ga tammahã a go jama ra, i te zaari fo diraw, gaa no i n'a ceeci dumey da mo-ka-bayrayey game ra.

⁴⁵I mana di a mo, kal i ye Urusalima, i goono g'a ceeci.

⁴⁶Hala jirbi hinza banda i di a Irikoy windo ra. A goono ga goro asariya* dondonandikoy game ra ka hangan i se, g'i hã mo.

⁴⁷Borey kaŋ yaŋ maa r'a mo dambara nd'a fahama d'a tuyaŋey.

⁴⁸Kaŋ hayrey di Yesu, i dambara. Kala nyaŋo ne a se: «Ay izo, ifo se no ni na woone te iri se? Guna, in da ni baaba, iri go ga ni ceeci nda bine saray.»

⁴⁹Yesu mo ne i se: «Ifo se no araŋ g'ay ceeci? Wala araŋ mana bay a ga tilas no ay ma bara ay Baabo muraado ra?»

⁵⁰Amma i mana faham da sanno kaŋ a ci ngey se.

⁵¹A koy i banda ka do Nazara kwaara, a soobay i ganayaŋo ra mo. Amma nyaŋo na hayey din kulu jisi nga bina ra.

⁵²Yesu goono ga beeri laakal da gaaham da gaakuri ra, Irikoy do da borey mo do.