Read Zarma Luke 3 Bible Online

Luke 3 - Zarma bible

Luke 3

¹A go no mo, Kaysar* Tiberiyus koytara jiiri way cindi guwanta, kaŋ Bilatos* Buntus gonda koytaray Yahudiya laabo ra, Hirodus* mo go Galili laabo bonkooni, a kayno Filibos mo te Ituriya nda Tarakonitis laabo se bonkooni, Lisaniyas mo go yaadin Abiliya laabo ra,

²kaŋ Hanana nda Kayafa gonda alfagataray dabaro, waato din no Irikoy sanno kaa Yohanna do, Zakariya izo kaŋ go ganjo ra.

³Yohanna koy laabey kulu ra kaŋ ga maan Urdun* isa. A goono ga tuubi baptisma waazu zunubi yaafayaŋ sabbay se.

⁴Mate kaŋ i n'a hantum annabi Isaya tira ra ka ne: «Boro fo kaŋ goono ga kuuwa ganjo ra jinda go ga ne: ‹Wa Rabbi fonda soola, w'a fondayzey sasabandi!

⁵I ga gooru kulu toonandi, tondi kuukey da fandu kulu mo, i g'i ye ganda. Isiirey ga ye ka kay soosay, gurbi-gurbey mo ga ye ka te banda folloŋ.

⁶Fundikooni kulu mo ga di Irikoy faaba.› »

⁷Yohanna goono ga salaŋ borey marga se kaŋ yaŋ kaa zama a ma te i se baptisma. A ne: «Araŋ wo gazama izey! May no k'araŋ kaseeti ka ne araŋ ma zuru bona kaŋ goono ga kaa se?

⁸Araŋ ma te-goy cabe kaŋ ga saba nda tuubiyaŋ. Wa si sintin ka ne araŋ biney ra: ‹Ibrahim ga te iri se baaba.› Zama ay ga ci araŋ se: Irikoy gonda hina kaŋ ga izeyaŋ kaa Ibrahim se baa tondey wo gaa.

⁹Baa sohõ i na deesi dake tuurey tiksey gaa. Yaadin gaa, tuuri kulu kaŋ siino ga ize hanno hay, i g'a wi k'a catu danji ra.»

¹⁰Kala borey marga n'a hã ka ne: «To, da yaadin no, ifo no iri ga te?»

¹¹A tu ka ne i se: «Boro kaŋ gonda kwaay hinka, kal a ma no boro kaŋ sinda se. Boro kaŋ gonda ŋwaari mo, a ma te yaadin.»

¹²Jangal taakoyaŋ kaa mo zama i ma te ngey se baptisma. I ne a se: «Alfa, ifo no iri ga te?»

¹³Kal a ne i se: «Araŋ ma si ta ka bisa wo kaŋ i kosu araŋ se din me.»

¹⁴Soojeyaŋ mo n'a hã ka ne: «Iri wo, ifo no iri ga te?» A ne i se: «Araŋ ma si boro kulu toonye, araŋ ma si haawa boro kulu gaa mo. Araŋ ma maa kaani mo d'araŋ banando.»

¹⁵Borey go hanganyaŋ gaa, i kulu mo goono ga guna ngey biney ra Yohanna boŋ ka di hala nga ya Almasihu no.

¹⁶Kala Yohanna tu ka ne i kulu se: «Ay wo, hari no ay goono ga baptisma te d'a araŋ se, amma bora kaŋ ga bisa ay dabari go kaa, nga kaŋ ay mana to naŋ kaŋ ay ga ce daŋ a ce ra. Nga no ga baptisma te araŋ se da Biya Hanno da danji mo.

¹⁷A fando go a kamba ra, hal a ma nga karayaŋ nango hanandi hal a ma boori. A ga alkama margu ka daŋ nga barma ra, amma a ga duwo ton da danji kaŋ i si hin ka wi.»

¹⁸Yaamaryaŋ sanni fooyaŋ go no mo iboobo kaŋ Yohanna goono ga Baaru Hanna waazu nd'a jama se.

¹⁹Amma waato kaŋ a deeni bonkoono Hirodus gaa, a kayno wando sanni ra (wando maa Hirodiya), a deen'a gaa mo goy meerey kaŋ a te sabbay se,

²⁰kala koyo ye ka woone tonton i kulu boŋ kaŋ a na Yohanna daabu kaso ra.

²¹A go no mo, waato kaŋ a na baptisma te borey kulu se ka ban, kaŋ a te Yesu se baptisma, Yesu mo goono ga adduwa, kala beena feeri.

²²Biya Hanna mo zumbu a boŋ da gaaham alhaali danga koloŋay cine. Jinde fo mo fun beena ra ka ne: «Nin no ga ti ay Izo kaŋ ay ga ba. Ay ga maa ni kaani gumo.»

²³Yesu bumbo, waato kaŋ a sintin dondonandiyaŋ, a to sanda jiiri waranza cine. A go (mate kaŋ i tammahã) Yusufu ize, kaŋ ga ti Heli wane,

²⁴Matata wane, Lawi wane, Malki wane, Yanna wane, Yusufu wane,

²⁵Matatiya wane, Amos wane, Nahoma wane, Hasali wane, Najay wane,

²⁶Mata wane, Matatiya wane, Simona wane, Yusufu wane, Yoda wane,

²⁷Yohanan wane, Risa wane, Zerubabel wane, Salitila wane, Neri wane,

²⁸Malki wane, Addi wane, Kosama wane, Almadama wane, Heri wane,

²⁹Yasuwa wane, Eliyezar wane, Yorima wane, Matata wane, Lawi wane,

³⁰Simeyon wane, Yahuda wane, Yusufu wane, Yonana wane, Eliyacim wane,

³¹Maliya wane, Mayna wane, Matata wane, Natan wane, Dawda wane,

³²Yasse wane, Obida wane, Buwaza wane, Salmon wane, Nason wane,

³³Aminadab wane, Admin wane, Arama wane, Hezron wane, Farisa wane, Yahuda wane,

³⁴Yakuba wane, Isaka wane, Ibrahim wane, Tera wane, Nahor wane,

³⁵Serug wane, Rehu wane, Peleg wane, Heber wane, Sela wane,

³⁶Kaynama wane, Arpaksadu wane, Sem wane, Nuhu wane, Lameku wane,

³⁷Matusala wane, Annuhu wane, Yaredu wane, Mahaleyel wane, Kaynama wane,

³⁸Enosu wane, Sita wane, Adamu wane, Irikoy wane.