Read Zarma Joshua 15 Bible Online

Joshua 15 - Zarma bible

Joshua 15

¹Yahuda izey kunda baa mo i almayaaley se koy ka to Edom hirro gaa, ka koy Zin saajo gaa, dandi kamba haray; dandi kamba gaa no.

²I dandi kambe hirro mana fun kala Ciiri Teeko me gaa, do-meyo kaŋ ga dandi kamba guna.

³A ye ka fatta Akrabbim zijiyaŋo dandi kamba, a bisa ka koy Zin, a ye ka ziji ka gana Kades-Barneya, ka gana Hezron do, a ziji ka gana ka koy Addar, a bare ka ye Karka,

⁴a bisa ka gana Azmon, ka fatta Misira gooro do haray. A hirrey mo go ga fun Teeku Beero gaa haray. Woodin no ga ciya araŋ hirro dandi kambe hara.

⁵Wayna funay hirro mo, Ciiri Teeko no, ka koy hala Urdun isa bananta. Azawa kamba hirro mo ga tun teeko do-meyo gaa Urdun bananta.

⁶Hirro ga ziji mo ka koy Bayt-Hogla, a bisa Bayt-Arba se azawa kambe hirro, a ziji koyne ka koy Bohan Ruben izey tondo gaa.

⁷Hirro ye ka ziji ka koy Debir za Akor gooro gaa. Yaadin mo no, azawa kamba go ga guna Jilgal haray, kaŋ go Adummin zijiyaŋo gaa haray, a go gooro se dandi kamba. Hirro bisa ka koy En-Semes harey gaa, nangey kaŋ yaŋ i ga fun go En-Rogel haray.

⁸Hirro ye ka ziji ka gana Hinnom gooro gaa ka koy Yebus jabo gaa dandi kambe (Urusalima nooya.) Hirro ziji koyne ka koy tondo kaŋ go ga salle Hinnom gooro jine din boŋ bindi ra, wayna kaŋay haray, kaŋ go Refayim bananta azawa kambe.

⁹I na hirro candi koyne tondo boŋ bindo ra ka koy Neftowa mansaara do, ka fatta noodin kala Efron tondo birney do. I hirro candi ka koy Baala, kaŋ ga ti Ciriyat-Yeyarim.

¹⁰Hirro ye ka windi koyne Baala ka fun a wayna kaŋay Seyir tondo gaa, a bisa ka koy Yeyarim tondo jarga azawa kambe, Kesalon nooya. A zumbu koyne ka koy Bayt-Semes, ka gana Timna.

¹¹Hirro ye ka gana ka fun Ekron jarga azawa kamba. I na hirro candi ka koy Sikkeron, ka bisa ka koy Baala tondo gaa, a fatta Yabneyel haray. Hirro mana fun kala Teeku Beero gaa.

¹²Wayna kaŋay hirro mo koy ka to hala teeko beero da nga tasasa gaa. Woodin no ga ti Yahuda izey hirro meyey nangu kulu, i almayaaley boŋ.

¹³A na Kaleb, Yefunna izo no baa Yahuda izey game ra, Rabbi lordo kaŋ a te Yasuwa se din boŋ. A n'a no Ciriyat-Arba. Arba woodin ya Anak baaba no (noodin no ga ti Hebron).

¹⁴Kaleb mo na Anak ize hinza gaaray ka dirandi noodin, ngey neeya: Sesay, da Ahiman, da Talmay, kaŋ yaŋ ga ti Anak izey.

¹⁵Noodin no a ye ka ziji ka koy ka Debir gorokoy wongu. Waato din Debir maa ga ti Ciriyat-Sefer.

¹⁶Kala Kaleb ne: «Bora kaŋ na Ciriyat-Sefer kar k'a ŋwa mo, ay g'ay ize wayya kaŋ se i ga ne Aksa hiijandi bora se.»

¹⁷Kala Otniyel, Kenaz izo, Kaleb nya-ka-fo-sina ize na kwaara ŋwa. Kaleb mo na nga ize wayya Aksa hiijandi a se.

¹⁸A ciya mo, saaya kaŋ cine Aksa kaa kurnyo do, a na kurnyo daŋ a ma fari ŋwaaray nga baabo gaa. A zumbu ka fun nga farka boŋ. Kaleb mo ne a se: «Ifo no ni ga ba?»

¹⁹Izo ne: «M'ay no albarka. Za kaŋ ni n'ay daŋ Negeb* laabo ra, m'ay no hari zuru mo.» Kal a n'a no hari zuru moyaŋ, wo kaŋ yaŋ go beene da wo kaŋ yaŋ go ganda cire mo.

²⁰Woone no ga ti Yahuda izey tubu i kundey almayaaley boŋ:

²¹Yahuda izey kunda birney kaŋ yaŋ ga mooru Edom hirro gaa Negeb haray: Kabseyel, da Eder, da Yagur,

²²da Cina, da Dimona, da Adada,

²³da Kedes, da Hazor, da Itnan,

²⁴da Zif, da Telem, da Beyalot,

²⁵da Hazor-Hadata, da Ciriyat-Hezron (nga no ga ti Hazor),

²⁶da Amam, da Sema, da Molada,

²⁷da Hazar-Gadda, da Hesmon, da Bayt-Pelet,

²⁸da Hazar-Suwal, da Beyer-Seba, da Biziyotiya,

²⁹da Baala, da Ayim, da Ezem,

³⁰da Eltolad, da Kesil, da Horma,

³¹da Ziklag, da Madmanna, da Sansanna,

³²da Libeyot, da Silhim, da Ayin, da Rimmon. I kulu birni waranka cindi yagga no, da ngey kawyey i banda.

³³Safela ra kwaarey neeya: Estayol, da Zora, da Asna,

³⁴da Zanowa, da En-Gannim, da Tappuwa, da Enam,

³⁵da Yarmut, da Adullam, da Soko, da Azeka,

³⁶da Saarayim, da Aditayim, da Gedera, da Gederot-Ayim, birni way cindi taaci nooya da ngey kawyey.

³⁷Zenan, da Hadasa, da Migdal-Gad,

³⁸da Dilan, da Mizpe, da Yokteyel,

³⁹da Lacis, da Bozkat, da Eglon,

⁴⁰da Kabbon, da Lamam, da Citlis,

⁴¹da Gederot, da Bayt-Dagon, da Naama, da Makkeda, birni way cindi iddu nooya da ngey kawyey.

⁴²Libna, da Eter, da Asan,

⁴³da Yefta, da Asna, da Nezib,

⁴⁴da Keyla, da Akzib, da Maresa, birni yagga nooya da ngey kawyey.

⁴⁵Ekron d'a kwaarey d'a kawyey.

⁴⁶Za Ekron gaa ka koy teeko gaa, wo kulu kaŋ yaŋ go Asdod tanjay, nga nda i kawyey.

⁴⁷Asdod d'a kwaarey d'a kawyey, Gaza d'a kwaarey d'a kawyey, hal a ma kaa Misira gooro gaa, da Teeku Beero, d'a tasasa.

⁴⁸Tondey laabey ra mo i du: Samir, da Yattir, da Soko,

⁴⁹da Danna, da Ciriyat-Sanna (Debir nooya),

⁵⁰da Anab, da Estemo, da Anim,

⁵¹da Gosen, da Holon, da Jilo, birni way cindi fo nooya da ngey kawyey.

⁵²Arab, da Duma, da Esan,

⁵³da Yanim, da Bayt-Tappuwa, da Afeka,

⁵⁴da Humta, da Ciriyat-Arba (Hebron nooya), da Ziyor, birni yagga nooya da ngey kawyey.

⁵⁵Mawon da Karmel, da Zif, da Yuta,

⁵⁶da Yezreyel, da Yokneyam, da Zanowa,

⁵⁷da Kayin, da Jibeya, da Timna, birni way nooya da ngey kawyey.

⁵⁸Halhul, da Bayt-Zur, da Gedor,

⁵⁹da Maarat, da Bayt-Anot, da Eltekon, birni iddu nooya da ngey kawyey.

⁶⁰Ciriyat-Baal (danga Ciriyat-Yeyarim nooya), da Rabba, birni hinka nooya da ngey kawyey.

⁶¹Saajo ra i gonda: Bayt-Arba, da Middin, da Sekaka,

⁶²da Nibsan da Ciiri Birno, da En-Gedi, birni iddu nooya da ngey kawyey.

⁶³Yebusancey ciine ra binde, ngey kaŋ yaŋ goono ga goro Urusalima kwaara, Yahuda izey si hin k'i gaaray, amma Yebusancey goono ga goro Urusalima Yahuda izey banda hala hunkuna.