Read Zarma Joshua 19 Bible Online

Joshua 19 - Zarma bible

Joshua 19

¹I na baa hinkanta kaa Simeyon se, danga Simeyon izey kunda nooya i almayaaley boŋ. I tubo go mo Yahuda izey tubo bindi ra.

²Tubo kaŋ i du neeya: Beyer-Seba no, danga Seba nooya, da Molada,

³da Hazar-Suwal, da Bala, da Ezem,

⁴da Eltolad, da Betul, da Horma,

⁵da Ziklag, da Bayt-Markabot da Hazar-Zusa,

⁶da Bayt-Lebeyot, da Saruhan, birni way cindi hinza nda ngey kawyey.

⁷Ayin, da Rimmon, da Eter, da Asan, birni taaci nooya da ngey kawyey,

⁸da kawyey kulu kaŋ yaŋ goono ga birney din windi, kal a ma koy hala Baalat-Beyer (Rama Negeb wano nooya). Woodin yaŋ no ga ti Simeyon izey kunda tubo, i almayaaley boŋ.

⁹Yahuda izey tubo ra no i du Simeyon izey tubu, zama Yahuda izey tubo baa gumo i se. Woodin se no Simeyon izey du ngey tubo i wano bindi ra.

¹⁰I na baa hinzanta kaa Zabluna izey se i almayaaley boŋ. I baa hirro koy ka to Sarid.

¹¹I hirro ziji koyne wayna kaŋay haray ka koy hala Marala, kala Dabbeset, a koy ka to koyne hala Yokneyam jine, gooro gaa.

¹²Za Sarid wayna funay haray a siiri ka koy wayna funay haray, ka koy Kislot-Tabor. Hirro ga ye ka fatta koyne ka koy Daberat. A ziji ka koy Yafiya.

¹³Za noodin binde a zaa ka guna wayna funay hala Gat-Hefer, ka koy Et-Kazin. A fatta koyne Rimmon haray ka salle ka koy hala Neya.

¹⁴A boŋ no hirro siiri ka ye azawa kambe haray ka koy hala Hannaton. A go ga fun Ifta-El, gooro batamey do haray.

¹⁵I du Kattat, da Nahalal, da Simron, da Idala, da Baytlahami, birni way cindi hinka nooya da ngey kawyey.

¹⁶Zabluna izey tubo nooya i almayaaley boŋ, birni woodin yaŋ da ngey kawyey.

¹⁷I na baa taacanta kaa Isakar se, danga Isakar izey i almayaaley boŋ.

¹⁸I hirro mo ga to wo kaŋ ga koy Yezreyel, da Kesullot, da Sunem,

¹⁹da Hafarayim, da Siyon, da Anaharat,

²⁰da Rabba, da Cison, da Ebez,

²¹da Remet, da En-Gannim, da En-Hadda, da Bayt-Pezzez.

²²Koyne, hirro ye ka kubay da Tabor, da Sahazuma, da Bayt-Semes. I hirro go ga fun Urdun do haray, birni way cindi iddu nda ngey kawyey nooya.

²³Isakar izey tubo nooya i almayaaley boŋ, birney da ngey kawyey nooya.

²⁴I na baa guwanta kaa Aser izey kunda se, i almayaaley boŋ.

²⁵I hirro ga ti Helkat, da Hali, da Beten, da Aksaf,

²⁶da Allammelek, da Amad, da Misal. A koy ka to hala Karmel wayna kaŋay, da Sihor-Libnat.

²⁷A ye ka siiri koyne ka koy wayna funay haray, hala Bayt-Dagon. A to Zabluna mo, da Efta-El azawa kamba, ka koy Bayt-Emek da Neyel. A fatta koyne ka koy Kabul haray kambu wow,

²⁸da Ebron, da Rehob, da Hammon, da Kana, ka koy hala Zidon beero gaa.

²⁹Hirro ye ka siiri koyne ka koy Rama, ka koy Tir kaŋ gonda birni cinari beeri mo. Hirro ye ka siiri ka koy Hosa, a go ga tun teeko do haray da Hebel ka koy Akzib.

³⁰Umma da Afek da Rehob mo go a ra. Birni waranka cindi hinka nooya da ngey kawyey.

³¹Aser izey tubo nooya i almayaaley boŋ, birni woodin yaŋ da ngey kawyey.

³²I na baa iddanta kaa Naftali izey se, danga Naftali izey i almayaaley boŋ.

³³I hirro ga tun Helef, za shen* tuuro kaŋ go Zaanannim ra din gaa, ka koy Adami-Nekeb, da Yabneyel, ka koy Lakkum. A ga fun Urdun haray.

³⁴Hirro ye ka siiri wayna kaŋay haray ka koy Aznot-Tabor, a fatta noodin koyne hala Hukkok, ka kubanda Zabluna dandi kambe. A kubanda Aser wayna kaŋay, da Yahuda mo Urdun gaa, wayna funay haray.

³⁵Birney kaŋ yaŋ gonda cinari mo, Zidim no, da Zer, da Hammat, da Rakkat, da Cinnerot,

³⁶da Adama, da Rama, da Hazor,

³⁷da Kedes, da Edrey, da En-Hazor,

³⁸da Iron, da Migdal-El, da Horem, da Bayt-Anat, da Bayt-Semes, birni way cindi yagga da ngey kawyey.

³⁹Naftali izey kunda tubo nooya i almayaaley boŋ, birney woodin yaŋ da ngey kawyey.

⁴⁰I na baa iyyanta kaa Dan izey kunda se i almayaaley boŋ.

⁴¹I baa hirro ga ti Zora, da Estayol, da Iri-Semes,

⁴²da Saalabbin, da Ayyalon, da Itla,

⁴³da Elon, da Timna, da Ekron,

⁴⁴da Elteke, da Jibbeton, da Baalat,

⁴⁵da Yehud, da Bene-Berak, da Gat-Rimmon,

⁴⁶da Mayarkon, da Rakkon, da nga hirro kaŋ ga guna Yaffa.

⁴⁷Dan izey hirro ziji ka bisa woodin yaŋ gaa, zama Dan izey ziji ka koy ka Lesam wongu. I n'a kar da takuba k'a ŋwa mo. I n'a ta ka goro a ra mo, ka maa daŋ Lesam gaa ka ne a se Dan, i kaayo Dan maa boŋ.

⁴⁸Dan izey kunda tubo nooya i almayaaley boŋ, birni woodin yaŋ da ngey kawyey.

⁴⁹Yaadin no i na laabo fayyaŋey ban d'a, tubey se a hirro boŋ. Israyla izey binde na Yasuwa, Nun izo, no tubu ngey bindi ra.

⁵⁰Rabbi lordo boŋ i n'a no birno kaŋ a ŋwaaray, kaŋ ga ti Timnat-Sera, Ifraymu tondey laabo ra. Kal a na birno cina ka goro a ra.

⁵¹Woodin yaŋ, ngey no ga ti tubey kaŋ Alfa Eliyezar da Yasuwa, Nun izo, da kaayey windey arkusey, da Israyla izey kundey fay kurne boŋ. Woodin te Silo kwaara ra, Rabbi jine, kubayyaŋ hukumo me gaa. Yaadin no i na laabo fay-fayyaŋo ban d'a.