Read Zeme Naga JENESIS 11 Bible Online

JENESIS 11 - Zeme Naga bible

JENESIS 11

¹Railangbe ting â kedeireime leine helad kat runne bam zai samkie ramme du ’nzuâkam ze bam de lei.

²Tingbia ’mbia ne hetîtigut dadege Shinar ramme bekâm yibe ngau lu chige lung di de lei.

³Penui karai kat-kat je sa ze, “Kei lei! hegamkâng ramme teleu lu rû zu kei lei” ze kacheu de lei. Chidadege teleurabe hang hegam zai pecham hang mâta bam di de lei.

⁴Penui ne sa ze, “Namdi tewchu ze hulangbe ’mpûm ze â tinggîm tûngchangrabeki tew zu kei lei, chidezai kedeirei ge anui ji di ze anui je tewtimrarip kai mak ra hangge zeu,” ze kacheu lei.

⁵Chidadege ziemmena name ne tewgaibe namdi benai heki hube pie ra hangge Tingwang wangkeu de lei,

⁶zai pa ne rang ze, “Pie le lau, penui ’nteumena zat kat zai hekuâ-helad kat runne rei de lei; chuna â penui tew ra ka’nningbe ze bepîbang runne rei de lei. Penui tew ra ’nningpatkaibe tewchilakrabe mâ de bam dai ra mak te lei!

⁷Kei lei, wangkeu zu kei lei, zai penui lad tewteguak kai be kei lei, dezai peize kat-kat lad chita de ra hangge zeu,” ze kacheu de lei.

⁸Chigum ze Tingwang ne penui je kedeirei pebâm gechâm-châm ’mbe hûrarip kai bei de lei, zai penui namdi tewchube ze sau di de lei.

⁹Chipauziegene chi namdi ji ze Babel ze ku de lei, chige Tingwang ne kedeireime leine lad tewteguakkaibeibe ziegeneu, zai chipau bâm gene Tingwang ne penui je kedeu ’mbe kedeirei pebâm gechâm-châm ’mbe hûtimrarip kai bei de lei.

¹⁰Aime bau ze Shembe dagene piakeume bau de lei. Shembe pe tingkum haî kat chang di dadege, pe na ’mpeumi, Arpakshadbe je duinaibe châng pakenabe kum ge lung de lei;

¹¹zai Arpakshadbe je lunglube chângge, Shembe kum haî mengeu ring-hang gai dai ze pe name kêdame ’mpeumi benai ’mpuimi je du lungkeu gai kadai de lei.

¹²Arpakshadbe kum himreu ze mengeu chang di dadege, pe na hangkat bam di de lei, chize Shelabe de lei;

¹³chipau chângge du kum haî medai ze kechum ringchang gai lu pe name kêdame ’mpeumi benai ’mpuimi je du lungkeu gai kadai de lei.

¹⁴Shelabe pe tingkum himreu ge pe na ’mpeumi hangkat bam di de lei, pe ji â Eberbe de lei;

¹⁵chipau chângge du, kum haî medai ze kechum ring gai lu pe name kêdame ’mpeumi benai ’mpuimi ramme je du lungkeu gai kadai de lei.

¹⁶Eberbe pe tingkum himreu ze medai chang dege, pe na ’mpeumi, Pelegbe bam di de lei;

¹⁷chipau chângge du, pa kum haî medai ze himreu ring gai lu pe name kêdame ’mpeumi benai ’mpuimi je du lungkeu gai kadai de lei.

¹⁸Pelegbe pe tingkum himreu chang dege, pe na ’mpeumi, Reube bam di de lei;

¹⁹chipau chângge, kum haî na ze sekui ring gai lu pe name kêdame ’mpeumi benai ’mpuimi je du lungkeu gai kadai de lei.

²⁰Reube pe tingkum himreu ze kena chang dege, pe na ’mpeumi, Serugbe bam di de lei;

²¹chipau chângge, kum haî na ze sena ring gai lu pe na kêdame ’mpeumi benai ’mpuimi je du lungkeu gai kadai de lei.

²²Serugbe pe tingkum himreu chang dege, pe na ’mpeumi, Nahorbe bam di de lei;

²³chipau chângge kum haî na pa ring gai lu pe name kêdame ’mpeumi benai ’mpuimi je du lungkeu gai kadai de lei.

²⁴Nahorbe pe tingkum ’ngkai ze sekui chang dege, pe na ’mpeumi, Terabe bam di de lei;

²⁵chipau chângge, pa kum haî kat ze kereu ze sekui ring gai lu pe name kêdame ’mpeumi benai ’mpuimi je du lungkeu gai kadai de lei.

²⁶Terabe pe tingkum riaksena chang dege, pe na hangchum, Abrambe, Nahorbe, zai Haranbe bam di de lei.

²⁷Abrambe, Nahorbe, zai Haranbe peu Terabe dagene piakeume ze aime bau de lei. Haranbe ze Lotbe peu de lei,

²⁸zai Babilonram (Kaldia) ge pechu lungkeugaibe namdi Ur gene pe peu ring bam ze Haranbe â chai di de lei.

²⁹Abrambe nâu ji â Saraile lei, zai Nahorbe nâu ji â Milkale lei, Milkale benai Iskale peu â Haranbe lei.

³⁰Saraile â pe na ga ze bam bam de lei.

³¹Terabe ne pe na Abram benai pe chapeu Lotbe, Haranbe na zai pe mupui Saraile Abrambe nâu je ngua lu Babilonram ge Ur namdi sâu ze Kanaanram ’mbe tat ti de lei. Haran riâ penui tatchang ze chige lung ze bam di de lei.

³²Zai Terabe pe tingkum haî na ze mengeu ring gai lu ze Haran gene chai di de lei.