Read Zeme Naga JENESIS 12 Bible Online

JENESIS 12 - Zeme Naga bible

JENESIS 12

¹Tingwang ne Abrambe je, “Ning ram ning dei, ning kiduîme, zai ning peu ki sâu ze I ne ningchu ngualiarabe heram ’mbe tatchu lau.

²Ning chaname misongga bam ra I ne ningchu pei gu, zai penui â hezat kedibe kau chang gu lei. Nang zene ’nnamgaibe kau chang ra I ne ningchu ’nnam gai gu, zai ning ji tew’ndi gai gu lei.

³Ningchu ’nnamgaime je I ne ’nnam gai gu, kane ningchu desetkaime je I ne deset kai gu lei. Zai nang gene pezat leine je I ne ’nnam gai gu lei,” ze kacheu de lei.

⁴Abrambe pe tingkum riaksena ze mengeu chang dege, Tingwang ne pechu ranggaibeibe luigum ze Haran gene pa zuapat ti de lei; zai Lotbe du pe pamtew tat ti de lei.

⁵Abrambe pe nâu Saraile benai pe kinapeu na Lotbe, zai pe heurâ ramme benai Haran gene ngaume pe guâ ka’ngguame je ngua lu Kanaanram tat ra zuapat ti de lei. Kanaanram ge penui chang dege,

⁶Abrambe heram tatpelatat ze Shekem ge More gu ’mpubang riâ tatchang di de lei. Chipauting ge Kanaanme chipau dei ge lung bam rei de lei.

⁷Abrambe suage Tingwang ne liâ ze, zai acheu sa ze, “Ning chaname je peirabe ram ze aipau heram ze de lei,” ze kacheu de lei. Chidadege Tingwang pechu liâpeu je kellum ra Abrambe ne herâtewbe bâmra tew gai de lei.

⁸Chipau chângge Bethel gene naimikpat ’mbia pa tat’nduâtat ze peloa’ntûm ge pe gu hetiamki liâm gai de lei, naimik kêu ’mbia Bethel bam zai naimik pat ’mbia namdi bambe kakge bam de lei. Chige du pa ne herâtewbe-kaira tew gai lu, Tingwang je kakellum de lei.

⁹Zai pa tebeîtew-’nduâtat ze Negebram ’mbia tat kai de lei.

¹⁰Kanaan ge â herakûm wang di de lei; chidadege â herakûm ranbi-bidibe ziegene Ijip ’mbia tingkat bam gai ra Abrambe tat ti de lei.

¹¹Ijipram zuagut ra heramrai tatka tena dege, pe nâu Saraile je pa ne, “Nang â ’mpuimi heleuyi kau de lei.

¹²Ijipme ningchu ngau dezai nang â a nâu lei, ze ’nning gai gu, zai achu penui ne tewchat ku de lei, kane ningchu â ring ra pei bu de lei.

¹³Nang â a kinapui lei, ze penui je acheu be lau; dezai ning ziegene achu du ring ra pei bu, zai achu du hereiheka bu lei,” ze rang gai bei de lei.

¹⁴Ijipram lung zuagut gap dege â pe nâu â heleu yi lei be Ijipme ne ngau de ngaupat ti de lei.

¹⁵Zai heguangsinpeu ramme Saraile je ngau lu dadege â Pharaobe je pe rasam satoa gai bei de lei; zai pechu Pharaobe ki ge teigut kai bei de lei.

¹⁶Pe ziegene Abrambe je du hereiheka zun bei, zai pe hangge melidung, getumsei ramme, hekunmerângsei ramme, pe guâ ’ngguarame ’mpuimi benai ’mpeumi ramme, hekunmerângpui ramme zai put-hu ramme pei bei de lei.

¹⁷Kane Abrambe nâu Saraile ziegene Tingwang ne Pharaobe benai pe kiduîme je herarît keteube ramme ne tewsâ bei de lei.

¹⁸Dadege Pharaobe ne Abrambe je kû lu pechu, “Achu nang ’ndaikau tâ tew gai bei lau? ’Ndaitew ze pa ze â ning nâu lei be ranglia mak lau?

¹⁹’Ndaitew ze ‘Pa â a kinapui lei,’ ze kacheu lau, chipauziegene I pechu a nâu hang lube zeu? Chidaze acheuzai aige ni, pechu ngua lu tat te zu lau,” ze pechu kacheu de lei.

²⁰Dadege Pharaobe ne pe gu ziemmena je lang gai bei ze Abrambe benai pe nâu zai pe gu bambe ramme leine tei lu ze heram gene hela ’mbe gepâutua gai bei de lei.