Read Zeme Naga JENESIS 15 Bible Online

JENESIS 15 - Zeme Naga bible

JENESIS 15

¹Aipau chângge keliâbe gene Tingwang gu sam Abrambe dage wang de lei, “Hing se lau, Abram gau, I ze ning gu hinggei de lei; ning gu getoabehi di-desang gu lei,” ze kacheu de lei.

²Kane Abrambe ne kak ze “Hei Tingwang Hera gau, achu nang ’ndaikau pei ra lau? I â chuna riâ du a na ga ze larei da zai a ki heurâ teirapeu â Damaska’mpeu Eliezerbe daseu?” ze kacheu de lei.

³Zai Abrambe ne “Pie le lau, a haîhik hang nang ne achu pei gai mak lei; zai a ki ge kebang hangkat lungkeupeu ne a ki-heurâ ze tei gu de zeî lau,” ze kacheu de lei.

⁴Zai pie le lau, Tingwang gu sam pe dage wang ze, “Aipaupeu ne ning heu ramme tei ra mak lei; ning na gîmsing ne ning heu ramme nguaheu gu lei,” ze kacheu de lei.

⁵Dadege Tingwang ne pechu hela nguapat lu, pechu, “Tinggîm ’ngngangchu pie gai lu hegi ramme nang seikam dui mei ze sei gai ni lau; ning chaname du chigumbe riâ bam gu lei,” ze kacheu de lei.

⁶Zai Tingwang je pa ’nnumka’mmi de lei; zai pa ne pechu ka’nzeibe kau hang riam gai bei de lei.

⁷Dadege Tingwang ne pechu, “Aipau ram ze ning hang pei gai ra Kaldiaram Ur gene ningchu nguapatkaipeu, Tingwang ze I de lei,” kacheu de lei.

⁸Kane pa ne sa ze, “Hei Tingwang Hera gau, aize a ram hang chang gu de lei be ’ndaigum ze I chî le ra lau?” kacheu de lei.

⁹Tingwang ne pechu, “Getum poine kum chum kau kat, kemeipui kum chum kau kat, kemei’nsei kum chum kau kat, zai temaune kat benai depeine kat a dage teiwang gai lau,” ze kacheu de lei.

¹⁰Dadege pa ne airamme Hera dage teiwang gai lu, pa’mpi-pi dângtap kai lu, pe pumdâng ramme teikedetrim ze ’nria kena teleu gai de lei; kane ’nruine kena ze â dângtap kai mak te lei.

¹¹Aipau herum ge Lawai ramme liamkeu de lei, kane Abrambe ne guâtua ’ndi de lei.

¹²Naimikkeube riâ chang dege, Abrambe jeihungkeu di de lei, zai kehingbe benai kemuîbe pe peireige wangchang di de lei.

¹³Tingwang ne Abrambe je, “Ning chaname â miramme dei ge hesang chang ze bam gu lei; kum haî medai riâ chige penui kebang chang gu zai penui je tewsâ gu lei;

¹⁴kane penui je kebang hang tewgaibe kau zat je I ne tewsâ gu lei, zai chi hesangram penui sâu dai dezai, penui heurâ misongga ze penui ne tei lu zuapat dai gu lei.

¹⁵Nang â ning peume lam temichai ze tat ku lei; chîng’mmihâm gai dezai ningchu â bai gai gu lei.

¹⁶Rehei medai chang dezai aige penui lungwang dai gu lei; Amorme gu hemui tâ tewbe ’nsang gai mak larei daseu,” acheu bei de lei.

¹⁷Naimik keu di, zai muî de muî di dege, pie le lau, hemi kaluibe benai hemimelei taubenbe keleu ze hekaune pumdâng ramme kakgene tatpelatat ti de lei.

¹⁸Chipau mai ge Tingwang ne Abrambe dage samhat kai ze, “Ning chaname hangge aipau heram ze I pei lei, Ijipram geuki gene Euphrates geuki riâ

¹⁹Kenme ram, Kenizme ram, Kadmonme ram,

²⁰Hethme ram, Perizme ram, Rephaimme ram,

²¹Amorme ram, Kanaanme ram Girgashme ram, zai Jebusme ram riâ chang zeu,” ze kacheu de lei.