Read Zeme Naga JENESIS 16 Bible Online

JENESIS 16 - Zeme Naga bible

JENESIS 16

¹Chunage Abrambe nâu, Saraile henalung makze bam rei de lei. Pe luntewpui Ijip’mpui pe ji Hagarle kacheupui bam de lei;

²dadege Saraile ne Abrambe je, “Pie le lau ni, Tingwang ne achu hena bam ra pei mak te lei; a lângtewpui je ngua gai be du lau; pe dagene a hangge napoine ngau le leu gu mei zeu,” ze rang gai bei de lei. Dadege Saraile sam ze Abrambe seutâu gai di de lei.

³Chidadege Abrambe Kanaanram ge kum kereu bamdibe châng ne pe nâu Saraile ne pe lângtewpui, Ijip’mpui Hagarle je pe napeu Abrambe nâu hang peipat kai bei de lei.

⁴Dadege Hagarle je Abrambe ngua gai bei dege, pe pumritpat ti de lei; zai Hagarle ze pa ’mpung di de lei be chî di dege â pe pai Saraile je pa ngau’nna di de lei.

⁵Chidadege Saraile ne Abrambe je, “Achu tew’ngkuigai’ndibe ze peize ning peireige keu gai de lau! I ne a lângtewpui je nang ne ngua gai ra pei gai de lei, zai pa ’mpung di de lei be pa chî di dege â achu pa ngau’nna di de lei. Peize nang benai a kakge Tingwang ne samram gai be lau!” ze kacheu de lei.

⁶Kane Abrambe ne Saraile je, “Pie le lau, ning lângtewpui â ning gu rezie kangge lamui de zeî lau; nang ne pechu tewnei-neibe tak tew zu lau,” ze acheu bei de lei. Chidadege â Saraile ne pechu tewsâ bei de lei, zai pa paktat ti de lei.

⁷Shur ’mbe tatbe ’mpuîki ge, hênam ge hedui depin bambe gene Hagarle je Tingwang gu tinggîm angel’mpeu kahedau de lei.

⁸Dadege pa ne, “Saraile lângtewpui Hagarle gau, ’ndai’nggene nang wang, zai ’ndai’ngge nang tat kai ra lau?” ze kacheu de lei. Pa ne kak ze, “A pai Saraile dagene I pak’mbiatat lei,” ze kacheu de lei.

⁹Tingwang gu tinggîm angel’mpeu ne pechu, “Ning pai tailam helatwang dai ze pe guâ ’nggua dai zu lau,” ze acheu bei de lei.

¹⁰Chidadege pa ne pechu sa’nduâtat ze, “Ning chaname sei de seikamchi lak ze misongga bam ra I ne pei gai gu lei,” ze kacheu de lei.

¹¹Dadege Tingwang gu tinggîm angel’mpeu ne pechu, “Pie le lau, nang ’mpung da, zai ’mpeumi napoine lungkeu gu de lei; pe ji â Ishmael ze nang ’ntak kai ra lei; Tingwang ne nang kahereube kuâ ’ngking gai bei daseu.

¹²Kane ning na â hênam gu hekunmerângne gum bam gu lei; haimena peireige pe bahuâ kai gu, zai haimena ne pe peireige du penui bahuâ kai gu lei. Zai pe kiduîme je ’ngkailak luisui ze pa bam gu lei,” ze kacheu de lei.

¹³Chidadege pechu ka’mpaupeu, Tingwang ji pa ne kû gai ze, “Nang â kengaube Rapeu de lei;” pa ne, “Tingwang je I ngau sing lu run de mei zai pechu I ngaulube chângge I ring ze bam run de semei?” ze kacheu dadegeu.

¹⁴Chipauziegene chipau dekua ji ze Beer-la hai-roi ze kû gai de lei; aize â Kades benai Bered kakge la lei.

¹⁵Zai Hagarle ne Abrambe na ’mpeumi lungkeu gai de lei; Abrambe ne pe na ji hang Ishmaelbe ze ’ntak kai de lei.

¹⁶Hagarle ne Ishmaelbe je lungkeube ting ge Abrambe pe kum riakdesat ze seruk chang di de lei.