Read Zeme Naga JENESIS 17 Bible Online

JENESIS 17 - Zeme Naga bible

JENESIS 17

¹Abrambe kum riaksekui ze sekui chang dege, Tingwang ne Abrambe je liâ ze, pechu, “I â reziechibe Hera de lei; a suage tat lau zai hetiâk ga ze bam lau.

²I benai ning kakge I ne samhat kai gu lei, zai misongga ze pung-ze-sabe ning hangge I pei gu lei,” ze rang gai de lei.

³Chidadege â Abrambe ’ngkum kâukeu gai de lei; zai Hera ne pechu,

⁴“Pie le lau, a gu samhetkaibe ning dage la de lei, zai nang ne pezat misonggame peu chang gu lei.

⁵Ning ji ze Abrambe ze kû dai ra mak lei, kane ning ji ze Abrahambe ze kû ra de lei; pezat misonggame peu hang ningchu I ne tew gai ’ndi daseu.

⁶Heluîhing ze ning chaname misongga bam ra I ne ningchu pei gai gu lei; zai pezat misongga ze nang gene pat ra I pei gu, zai heguangme ning dagene zuapat ku lei.

⁷Zai betingbeta I benai nang zai ning chaname rehei lunghangdairame kakge I ne ning Rapeu chang ze bam ra I a gu samhatkaibe tew’ntip kai gu lei.

⁸Zai nang benai ning chângge ning chaname hang chuna ningnui ’nnaigaibe Kanaan ram leine betingbeta ningnui gu chang ra I ne pei gai gu lei; zai I ne penui Rapeu chang ra de lei,” ze kacheu de lei.

⁹Dadege Hera ne Abrahambe je, “Nang du I samhatkaibe ze tei ra de lei, nang benai ning chaname ning chai ge rehei lungkeu tâne aize tei bam ra de lei.

¹⁰I benai nang zai ning chângge ning chaname rehei ge du tei bam ra aize a gu samhatkaibe de lei: Ningnui ruage ’mpeumi leine rumgeten kam ra lei.

¹¹I benai ning kakge samhatkai’ndibe chibam ra ’nchetkaibe hang ningnui rumgeten ra lei.

¹²Ningnui ruage ’mpeumi napoine hezie desatne kau je rumgeten ra lei, ningnui gu rehei wangkeu tâne ’mpeumi leine, ningnui ki gene lungkeube kau mei, nune ningnui chaname makbe kau hesangme ningnui ne rangkâng ne luilube kau mei sede rumgeten ra lei,

¹³ning ki gene lungkeume benai ningnui gu rangkâng ne luilume ’nteumena je rumgeten gai ra lei. Chidezai a gu samhatkaibe ze ning gu hemeipum ge betingbeta samhatkaibe chang gu lei.

¹⁴’Mpeumi mige rumgeten makbe kau je â pezatme dagene tuâpat kai ’nde ra lei; pa ne a gu samhatkaibe tewpâng ’ndi de lei,” ze kacheu de lei.

¹⁵Zai Hera ne Abrahambe je, “Ning nâu Saraile ze kû ta ra de lei, kane Sarale ze pe ji hang de lei.

¹⁶Pechu I ’nnam gai gu, zai pa gene ning na ’mpeumi napoine I pei gu lei; pechu I ’nnam gai gu, zai pa ne pezat misonggame pui chang gu lei; hezat leine gu heguangme pe dagene pat ku lei,” ze kacheu de lei.

¹⁷Dadege Abrahambe kâukeu ’ngkum gai lu ka’nnui de lei, zai pe lung gene ’nning ze, “’Mpeumi kum haî chang di hena bamchi duî semei? Zai Sarale kum riaksekui chang di sede hena lung gu rei semei?” kacheu de lei.

¹⁸Zai Abrahambe ne Hera je, “Hei Ishmaelbe peireige chang gai de ra nang ne pei be laîzai neu!” ze kacheu de lei.

¹⁹Kane Hera ne, “Mak lei, ning nâu Sarale dagene ning na ’mpeumi lungkeu gu lei, zai pe ji hang Isaakbe ze nang ’ntak kai ra lei. A gu samhatkaibe pe dage benai pe chaname hangge betingbeta bam bam ra I kai gu lei.

²⁰Ishmaelbe deu ge nang gekiambe kuâ seu lu de lei; pie le lau, pechu I ’nnam gai gu lei, pe dage heluîhing ze misongga ze pungbi-bi ze bam ra I ne tew gai gu lei; pa ne heguang kereu-ze-kename peu chang gu lei, zai pezat kedibe hang pechu I ne tew gai gu lei.

²¹Kane a gu samhatkaibe â ning na Isaakbe, mâ-kum chuna ting riâ wangchang dezai Sarale dagene lungkeurapeu dage kai gu lei,” ze kacheu de lei.

²²Pechu ’mpau kam gai lu dege, Hera â Abrahambe je sâu nan ze chu di de lei.

²³Dadege Hera ne pechu ranggaibeibe luigum ze, chipau mai gîm sing ge, Abrahambe ne pe na Ishmaelbe zai kebangme pe ki gene lungkeume benai rangkâng ne luilume leine Abrahambe ki ge ’mpeumi leine je pa ne rumgeten gai de lei. Hera ne pechu ranggaibe luigum zeu.

²⁴Pechu rumgeten-gaibe ting ge Abrahambe â kum riaksekui ze sekui chang di de lei.

²⁵Zai pe na Ishmaelbe â kum kereu ze kechum ge pechu rumgeten gai de lei.

²⁶Chipau mai gîmsing ge Abrahambe benai pe na Ishmaelbe je rumgeten gai de lei;

²⁷zai Abrahambe gu ziemmena leine, pe ki gene lungkeume zai rangkâng ne luilume hesangme leine je du chipau mai ge pechu nguarumgeten gai de lei.