Read Zeme Naga JENESIS 18 Bible Online

JENESIS 18 - Zeme Naga bible

JENESIS 18

¹Zai tîngna lumperîsi ge Abrahambe pe ki kemui ge ’ntau lage pechu Tingwang ne Mamre gu ’mpubang zeu gene liâ de lei.

²Pe ma-’ngngangrakchu lu pie gai de lei, zai pie le lau, ziemmena hangchum pe suage sap laleu de lei, penui je pa ngau lu dege, penui je hedau ra pa hetiamki kemui gene pakpat ti de lei, zai kedei ge kâukeu ’ngkumpit kai lu ze,

³pa ne, “A pau gau, ning mikngau ge ngau’nggiaduibe zat I chang zai â ning guâ ka’ngguapeu je tat’ngka se lau.

⁴Hedui kecheîne teipat lu ningnui pî hui gai che lei, zai hingbang kang gene sau zun gai le lau,

⁵peize ningnui ranchi bi ra ningnui hang tingku kâng I tei gu rei lei, chipau châng dezai ningnui tat ra de lei, ningnui guâ ka’ngguapeu dage ningnui ne zuamie bei daseu,” ze acheu bei de lei. Dadege penui ne kak ze, “Nang ne sabe luî ze tew zu lau,” ze kacheu de lei.

⁶Zai Abrahambe ne hetiamki lung ’mbe Sarale tailam pakchin gut lu, pechu, “Kelua ze dekuî yilangbe gum chum tuakpat lu zai kenei lu ze hemang gene lang gai zu lau,” ze rang gai bei de lei.

⁷Zai Abrahambe â pakpat lu pe gu kauruidung ruage getumpoine hemei ’nchiap zai teuyi-peretsetbe kau kelâng lu, pe guâ ka’ngguapeu, kelua ze helangrapeu je pei bei de lei.

⁸Zai pa ne tungdui tewhialube zai tungdui zai getumpoine pa ne penui hang langgailube hemei ji ze teipat lu penui suage kaipat kai bei de lei; zai penui mâ-teube luage pa â hingbang kangge penui taige sapkua bam de lei.

⁹Penui ne pechu, “Ning nâu Sarale ’ndaige la lau?” ze ka’nneu de lei. Zai pa ne, “Hetiamki lungge pa â la lei,” ze acheu bei de lei.

¹⁰Tingwang ne, “keriakting dezai I wang dai sing gu lei, zai ning nâu Sarale ’mpeumi napoine lungkeu gu lei,” ze rang gai bei de lei. Zai Sarale â pe chai ’mbe kemuiki ge sap lu ze ’ngking bam de lei.

¹¹Abrahambe benai Sarale â chîng-kezuzie di de lei; zai Sarale â ’mpuimi tak gene pe nîsiabe sau di de lei.

¹²Chipauziegene Sarale pe runne pe lung gene ’nnui ze, “I chîng di chaine zai a napeu lei ze chîng di chaine I a pumritpat ku rei semei?” ze kacheu de lei.

¹³Tingwang ne Abrahambe je, “’Ndaitew ze Sarale ’nnui ze, ‘I chîng di chaine henalung gu run semei,’ ze kacheu lau? ze kacheu de lei.

¹⁴Tingwang hangge mâ de tewchilakrabe la se mei? Ranggai’ndibe hî keriakting ge ning dage wang dai sing gu zai Sarale ’mpeumi napoine lungkeu gu de lei,” ze kacheu de lei.

¹⁵Kane hingdibe ziegene Sarale ’ngkim ze, “I â ’nnui me lei,” ze kacheu de lei. Kane pa ne, “Nang ka’nnui sing de lei,” ze kacheu lei.

¹⁶Chidadege chipau bâm gene ziemmena ramme zuapat lu Sodom ’mbia heguapie gai de lei; zai Abrahambe ne penui je ’mpuîki ngualia gai ra ngua-gepâupat te lei.

¹⁷Tingwang ne, “I tâtewrabe ze Abrahambe dagene I tei’mbai ra se mei?

¹⁸Abrahambe â pezat dibe benai peranchibe zat chang gu, zai pa gene kedeirei pezat leine je ’nnam gai gu lei be ngaukâ lu zeu? Chize mak lei,

¹⁹pe name benai pe kiduîme pe chaige rehei lunghangdairamme je peling benai ka’nzeibe tâ tewbe gene Tingwang gu ’mpuî ge tatchi le ra penui je gecheu gai ra I ne pechu kelâng gai ’nde lei; chidezai Tingwang ne pa sam hatkai’ndibe ze Abrahambe peireige teiwanggaichi le ra hangge zeu,” ze kacheu de lei.

²⁰Chidadege Tingwang ne Abrahambe je, “Sodom benai Gomorra je sa’nsia ze ka’nrungbe kuâ kie-desangdibe ziegene zai penui hemui-desangdibe ziegene,

²¹penui je saka’nsiabe kuâ a dage seuchangbe luigum ze tâu mei be pie ra I wangkeu gu lei; zai chize acheu me lei dizai â I chî gu lei,” ze kacheu de lei.

²²Chidadege ziemmena hangna â chipau bâm sâu ze Sodom ’mbe tat ti de lei; kane Abrahambe â Tingwang suage sapbam gerei lei.

²³Dadege Abrahambe Tingwang taige wang ’nna bi lu, “Ziemmena kapelingbe kau je du nang ne ziemmena kesiame suage tew’ngga gai ra run de semei?

²⁴Namdi lungge ziemmena kapelingbe kau hangrengeu bâm lêuzai chige hangrengeume bambe ziegene du namdi ze ’nzâ makze nang tew’ngga gai ra semei?

²⁵Chigumbe tâ tewgairabe ze ning dagene deutau ze peize bam de lau, kapelingbe kau je kesiame ruage tewchat’mpam gai ra zai â pelingtewbe kau lei ze ziemmena kesiame riâ ge keu gai gu de zeî lau! Ning dagene chize peize deutau de lau! Kedeirei leine gu samrampeu ne tâ peling tew mak ra semei?” ze kacheu de lei.

²⁶Tingwang ne kak ze, “Sodom ge ziemmena kapelingbe kau hangrengeu I peudau lu zai â penui ziegene namdi luî I ’nsak kai gu lei,” ze kacheu de lei.

²⁷Abrahambe ne sa dai ze, “Pie le lau, I kedeiniamoîne benai timbun gumbe runne kau ne Tingwang je ’mpau ra a runne achu peipat kai de lei.

²⁸Samne-sam hangrengeu chang ra hangge hangmengeu ’nsang mak lêuzai se? Hangmengeu ’nsangmakbeibe ziegene namdi luî nang ne tew’nsia kam gai gu mei?” ze kacheu de lei. Dadege pa ne, “Hedai ze mengeu bâm laleu bei zai â chize I ne tew’nsia ra mak lei,” ze kacheu de lei.

²⁹Pa ne pechu ’mpau dai ze, “Samnesam hanghedai dau lêuzai se?” kacheu de lei. Pa ne kak ze, “Hanghedai hang ziegene chize I tew’nsia ra mak lei,” ze kacheu de lei.

³⁰Dadege pa ne “Hei peize Tingwang pe râta gai se lau, I sa gai gu rei lei. Samnesam hanghimreu runne dau lêuzai se?” ze kacheu de lei. Pa ne kak ze, “Hanghimreu chige bamdau zai â chipau tâ ze I tew gai ra mak lei,” kacheu de lei.

³¹Pa ne, “Pie le lau, I gumbe kau ne Tingwang je ’mpau ra a runne achu peipat kai de lei. Samnesam hang’ngkai dau lêuzai se?” kacheu de lei. Pa ne kak ze, “Hang’ngkai ziegene chize I tew’nsia ra mak lei,” ze kacheu de lei.

³²Dadege pa ne, “Hei peize Tingwang pe râta gai se lau, luakat I sahekap kai gu rei lei. Samnesam hangkereu dau lêuzai se?” ze ka’nneu de lei. Pa ne kak ze, “Hangkereu hang ziegene chize I tew’nsia ra mak lei,” ze kacheu de lei.

³³Dadege Tingwang ne Abrahambe je ’mpau kam gai lu dege, Tingwang â tat ti de lei; zai Abrahambe pe ki lam helatwang dai di de lei.