Read Zeme Naga JENESIS 19 Bible Online

JENESIS 19 - Zeme Naga bible

JENESIS 19

¹Hegî dege Sodom ge Tinggîm angelme hangna wangbe luage Lotbe â namdi keriekemui ge ’ntau bam de lei. Penai je Lotbe ngau dege, pa zuachu lu penai je hedau ra pat te lei, zai penai suage kedei ge kei’ngkumkeu lu,

²pa ne, “A pau kena gau, ningnai guâ ka’ngguapeu ki ge tat kai ze rêu gai ra I ningnai je kiâm lei, zai ningnai pî hui le lau; hechua dezai chuzisi lu ningnai ’mpuî ra ’mbe tat dai dui lei,” ze kacheu de lei. Penai ne, “Acheu me lei; anai â puidi ge bamtingba du lei,” ze acheu bei de lei.

³Kane pa ne pa teleichi ze, gang-desangbeibe ziegene Lotbe ki ’mbe penai tat ti de lei; zai pa ne penai hangge luube-teseu teleu gai de lei, zai ’nduihîkaimakbe tingku lang lu penui teu de lei.

⁴Kane penai jeikeu gai makge Sodom namdi ge bamme gechîng-hena zai ziemmena kebam leine wang ze heki tuaguâ ’ndi de lei;

⁵dadege penui ne Lotbe je kû ze, “Ning ki ge nemai muî ziemmena zuagutkaidime ’ndaige la lau? Anui tailam penai je nguapat kai lau, penai je anui nguajei ra hangge zeu,” ze ka’nrung de lei.

⁶Lotbe pe chaige ’ngkam kainam gai nan ze penui tailam zuapat lu,

⁷penui je, “A puiname gau, ningnui je I kiam lei, mi ngaudaulakbe tâ tew gai se lau.

⁸Pie le lau, aige a na heleume hangna ’mpeumi je ’nnagaimakbe kau lamui lei; I ne ningnui dage penai je nguapat kai be che lei, dezai ningnui ne tewnei-neibe tak penai peireige tew zu lau; kane aibe kena peireige â mâ de tew gai se lau, penai â a ki ge hesang chang ze rêube kau daseu,” ze kacheu de lei.

⁹Kane penui ne kak ze, “’Mbia de lau,” ze kacheu de lei. Zai penui ne sa dai ze, “Aipau peu ze hesang chang ze lunggaileube kau, pa ne samram ra mei! Chunage penai peireige suadu ningchu tew’mmihâm gai bu lei,” ze kacheu de lei. Chidadege Lotbe je penui ne chuinup-getiegut ze ’ngkam sîmbagut ra gum bam di de lei,

¹⁰kane chi ziemmena hangna zene penai ba getuapat lu Lotbe je kilûng ’mbe teigut lu, ’ngkam kainam gai ’ndi de lei.

¹¹Zai penai ne chi ziemmena ramme kedi-kechei sa makze ’nteumena hela ge bamme leine je penui mik tewchit kam ’ndi de lei, chidadege â kemuiki peu ze kemitrua leisei bam kam di de lei.

¹²Chidadege chi ziemmena hangna ne Lotbe je, “Aige ning gu ziemmena mige â larei mei? Ning chame, zai ning name, ’mpuimi ramme benai ’mpeumi ramme, zai mige ning gu ziemmena namdi lungge bamme, chime leine je namdi lung gene hela ’mbe ngua’mbia tat te lau;

¹³aipau bâm ze anai tew’nsia gai gu daseu, aige lungme bau peireige saka’nsiabe ramme misongga ze Tingwang masuage wangchangdibe ziegene, Tingwang ne aipau bâm ze tew’ngga gai ra anai je lang gai de lei,” ze kacheu de lei.

¹⁴Chidadege Lotbe ne tatpat lu pe chame, pe na heleume je nguakelaktewrame hangna je, “Zuachu kelua zu lau, aipau bâm gene ’mbia de lau; Tingwang ne aipau namdi ze tew’ngga zi gu de lei,” ze acheu bei de lei. Kane hepâ-henuitew ze kakeliangbe hang pechu ’nning gai ’ndi de lei.

¹⁵Hechua bapat dege â tinggîm angel’mpeu hangna ne Lotbe je gecheu kelua ze, “Chu zu lau, namdi je tewsabe gene ningnui je du rû’ngga mak ra hangge ning nâu zai ning na heleu’mpui hangna aige bamme je ngua le lau,” ze acheu bei de lei.

¹⁶Kane Lotbe â gîngtie di de lei; chidadege tinggîm angel’mpeu hangna ne pechu zai pe nâu zai pe na ’mpuimi hangna ba ’nzapgap lu Tingwang ne pechu ka’nggiabe ziegene namdi gene hela ’mbe penai ne nguapat kai bei de lei.

¹⁷Zai penai ne penui je hela nguapat kai lu dege, “Ring le ra hangge pak chu lau; ’nchai ’nriakpie se lau, zai bekâm ramme ge sau gai se lau; peloa ramme ge pak kai de lau, ningnui je rû’ngga mak ra hangge zeu,” ze rang gai bei de lei.

¹⁸Kane Lotbe ne penai je, “Hei a pau kena gau, chize â mak te lei;

¹⁹pie le lau, ning guâ ka’ngguapeu je nang ne ’nchâ bei, zai achu tew’nringgaibe ge ning ’nggiadi-desang ze teilia bei de lei; kane peloaram ’mbe â I paktatchi lak te lei, mâ-geze ’ndaikau wangchang mei dizai â I chai gu daseu.

²⁰Pie le lau, wîbe keloa ge â paktat kai ra na de lei, zai chize â keloa kecheibe kau lei. Chige I pak’mbia gai ra pei lau—chize keloa poine mak ti lau?—dezai I ringpat tu de lei!” ze kacheu de lei.

²¹Pa ne pechu, “Pie le lau, aipau nang ne kiebe deu ge du I lun bei de lei, nang rangbe keloa ze I tew’ngga ra mak lei.

²²Kelua ze chilia ’mbia pak kai de zu lau; chipau bâm nang chang de mak tâne mâ de I tewchi lak daseu,” ze acheu bei de lei. Chipauziegene chipau keloa ji ze Zoar ze ku de lei.

²³Zoar keloa ge Lotbe gutchanggaibe luage naimik pat ti de lei.

²⁴Chidadege tinggîm ge Tingwang dagene Sodom benai Gomorra peireige tingchu getaube benai hemi ruikeu ra Tingwang ne tew gai bei de lei;

²⁵zai pa ne chi namdi ramme, bekâm ramme leine, zai namdi ge ziemmena bamme leine zai mâ-hîmra ramme leine tew’nsia kam ’ndi de lei.

²⁶Kane Lotbe nâu ze pe napeu chai ’mbene pie gai bei de lei, dadege pa ’nchaîchutum mi gai di de lei.

²⁷Zai Abrahambe â pa Tingwang suage sapkailube bâm ’mbe hechuasûn ze tat ti de lei;

²⁸zai Sodom benai Gomorra zai bekâm ramme leine pa pie’nsukkeu gai dege, pie le lau, hemang kuiki gene mika patbe gum ze chipau heram gu mika kalui ze bambe ngau de lei.

²⁹Kane Hera ne bekâm ge namdi ramme tewka’nsiabe luage, Hera ne Abrahambe je ’nningdau de lei, zai pa ne Lotbe bambe namdi ramme tewka’nsiabe bâm gene Lotbe je pak’mbia de ra lang gai bei de lei.

³⁰Chunage Lotbe â Zoar ge bamhingdibe ziegene pe na heleume hangna je ngua lu chigene zuapat ze peloaram ’mbe tat ze hekâuki ge bam di de lei.

³¹Pe na heleu’mpui chîngpui ne pe kinapui je, “Anai peu â chîng de da zai aipau dei ge anai je kelaktew ze ngualungrabe kau ’mpeumi hangkatte ’ngga de lei.

³²Kei lei, anai peu je wain guîmeneu gai be kei lei, dezai anai pe dage jei gai lu anai name hang ngau le ra hangge zeu,” ze kacheu de lei.

³³Chidadege chipau mai tingmuî ge wain guî de lei; chîngpui ne gut lu pe peu dage jei gai de lei; pa â pe na heleu’mpui jeikaugaibe du zai zuachudaidibe du chî mak lei.

³⁴Zai bechaibe mai ge, pe sipui ne pe kinapui je, “Pie le lau, ’nzimai tingmuî ge I anai peu dage jei de lei; nemai muî ge du pechu wain guî dai kei lei; zai nang du gut ze pe dage jei gai le lau, dezai anai peu dagene anai hena bam le ra hangge zeu,” ze kacheu de lei.

³⁵Chipau mai muî ge du penai ne pechu wain guî de lei; zai pe kinapui ne chu lu pe peu dage jei gai de lei; zai pa â pe na heleu’mpui jeikaugaibe benai chudaidibe mâ de chî mak lei.

³⁶Aigum ze Lotbe na heleume hangna ze penai peu dagene napoine bam di de lei.

³⁷Chîngpui ne ’mpeumi napoine lungkeu de lei, zai pe ji Moab ’ntak kai de lei; nemai riâ chang ze pa ze Moabme zat leine peu chang ze la lei.

³⁸Pe kinapui du ’mpeumi napoine lungkeu ze pe ji hang Benammi ze ’ntak kai de lei; nemai riâ chang ze pa ze Ammonme zat leine peu chang ze la lei.