Read Zeme Naga JENESIS 22 Bible Online

JENESIS 22 - Zeme Naga bible

JENESIS 22

¹Chipau chângge Hera ne Abrahambe je kedak ze, pechu, Abrahambai! kacheu de lei. Zai Abrahambe ne kak ze, “Aige I la lei,” acheu bei de lei.

²Hera ne pechu, “Ning na hangkat gap bambe Isaakbe, nang hung-kadesangbe na je ngua lu ze Moria dei ’mbe tatchu lau, chige tat ze kedeiloa kat I ne ningchu teiliagairabe deiloa ge pechu rûkambe-râtewbe ze peipat kai lau,” ze rang gai de lei.

³Chigum ze bechai mai hechuasûn dege Abrahambe herâtewrabe hang hechingria lu, hekunmerângne ching ge kai lu, zai Isaakbe benai pe guâ ka’ngguame hangna je ngua lu, Hera ne pechu ranggaibeibe bâm ’mbe tat ra zuachu di de lei.

⁴Pakechumbe mai chang dege kedeu ’mbene chipau bâm ze Abrahambe ngau di de lei.

⁵Chidadege pa ne pe guâ ka’ngguame je, “Aige hekunmerângne je reîkua lau, ’mpeumi napoine anai chilia tat ze kellum gu rei lei, dezai ningnai tailam helatwang dai gu lei,” ze rang gai de lei.

⁶Abrahambe ne Isaakbe je herâtewrabe-ching ze pua ra pei bei de lei, zai pa ne kêdareîne benai hemi mechingkâng tei de lei. Penai ’nzangtat lage,

⁷Isaakbe ne, pe peu Abrahambe je, “A peu!” kacheu de lei. Pa ne, “A na gau, aige I la lei,” kacheu de lei. Isaakbe ne, “Hemi benai heching nang tei be â I ngau da kane herâtewrabe hangge melipoine ’ndaige la lau?” ze ka’nneu de lei.

⁸Abrahambe ne kak ze, “Hera ne rûkambe-râtewrabe hang â melipoine pei gu lei,” acheu bei de lei. Zai penai hangna ’nzangtat bam de lei.

⁹Hera ne pechu ranggaibe bâm wangchang dege, Abrahambe ne herâtewbe bâm teleu gai lu, pe peireige heching kua gai de lei. Pe na Isaakbe je pi lu herâtewbe bâm ge heching kuagaidailube peireige ’njei gai de lei.

¹⁰Dadege pe na je tewchat kai ra pe gu kêdareîne huachu gai sûn di de lei.

¹¹Kane Tinggîm ’mbene Tingwang gu tinggîm angel’mpeu ne pechu kû ze, “Abrahambai, Abrahambai!” ze kacheu de lei. Pa ne kak ze “Aige I la lei,” kacheu de lei.

¹²Zai Hera ne, “Napoine peireige ning bahuâ kai gai se lau, zai pe peireige mâ de tew gai se lau; chuna â nang â Hera kuâ pheuchi zai pechu hingchibe kau de lei be I chî de lei, ning na hangkatgap bambe poine je achu peiraumakbe ziegeneu,” ze kacheu de lei.

¹³Dadege Abrahambe heguarua gai dege meli’nsei reheupuîtum ge pe kie gene migit lu bambe pa ngau de lei. Pa tat ze chize teiwang lu pe na kelei ge chize ne rûkambe-râtewbe pei gai de lei.

¹⁴Chidadege Abrahambe ne chipau bâm ji hangge “Tingwang ne pei gu lei,” acheu ze ’ntak kai de lei. Zai nemai riâ chang ze ziemmename ne, “Tingwang gu kedeiloa peireige chize pei gai bu lei,” ze acheu sa bambe luigum zeu.

¹⁵Tinggîm ’mbene tinggîm angel’mpeu ne Abrahambe je pakenabe kû gai dai ze,

¹⁶“I sing ne deseu gai de lei, nang ne aipau tâ tew gai, zai ning na hangkat gap bampeu je peipat-raumakbeibe ziegene

¹⁷ningchu I ne ’nnam gai sing ra run lei, zai ning chaname heluîhing ze tinggîm ge hegi ramme bambe gum zai sungkling kung ge deseî bambe gum ze bam ra misongga tewpung gai gu lei. Zai ning chaname ne penui teureime gu keriekemui ze penui gu chang gu lei,

¹⁸zai ning chaname gene kedeirei zatme leine hangge ’nnamgaibe chang gu lei, nang ne a kuâpheubeibe ziegeneu,” ze kacheu de lei.

¹⁹Chidadege â Abrahambe pe guâ ka’ngguame hangna tailam helatwang kadai de lei, zai penui zuachu lu ’nteumena Abrahambe lungbe bâm Beer-sheba ’mbe tat ti de lei.

²⁰Aipau châng bamhang gai dege, pe kinapeu Nahorbe dagene pe nâu Milkale ne napoine hangdesat lungkeu gai de lei be Abrahambe chî di de lei:

²¹Uzbe ze meraipeu, Buzbe ze pe kinapeu, zai Arambe peu Kemuelbe,

²²Kesedbe, Hazobe, Pildasbe, Jidlapbe, Bethuelbe, zai

²³Rebekale peu. Abrahambe kinapeu Nahorbe dagene pe nâu Milkale ne aime pe na ’mpeumi hangdesat lungkeu gai de lei.

²⁴Nahorbe gu nausîpui Reumale ne Teba, Gaham, Tahas, zai Maaka je lungkeu de lei.