Read Zeme Naga JENESIS 23 Bible Online

JENESIS 23 - Zeme Naga bible

JENESIS 23

¹Sarale kum haî kat ze ’ngkai ze sena riâ ring gai de lei.

²Zai Sarale â Kiriath-arba (chize Hebron) Kanaan dei gene chai gai de lei; zai Sarale chaidibe ze Abrahambe desui ze bam de lei.

³Pe nâu kechaipum ’njei bambe bâm pa sâu ze Hethme dage tat ze,

⁴“I â hesangkedeu’mpeu chang ze aige ningnui ruage lung ze bam de lei; kedei gêsa achu zua gai lau, chidezai a nâu je I bai gai ra hang,” ze kacheu de lei.

⁵Hethme ne penui je kak ze,

⁶“A pau gau, anui kuâ ’ngking le lau. Nang anui ruage besuitewpeu peranchibe kau lei; anui gu heraw ramme ruage yilangbe kelâng lu ze ning gu kechaipum bai gai le lau; anui ruage mi-mige leize ning gu kechaipum bai gai ra hangge pe gu heraw peirau ra mak lei; makchai ning gu kechaipum bai gai ra nam ra mak lei,” kacheu de lei.

⁷Chidadege Hethme, pe deiname dage, Abrahambe chu lu kei’ngkumkeu gai de lei.

⁸Dadege pa ne penui je, “Aige a gu kechaipum bai gai ra ningnui ne hezuâ gai zai â Zoharbe na Ephronbe je

⁹pe gu helupua ge Mak-pela kâuki achu zua gai ra kiâm gai lau. Aige ningnui chuna ’nteumena suagene pemî singbe gene achu zua gai ra ’nneu gai lau, chidezai herawloa hangge I lui le ra hang,” kacheu lei.

¹⁰Chunage Ephronbe â Hethme je ngua’ntau bam de lei; zai Het’mpeu, Ephronbe ne pe gu namdi keriekemui ge gutme leine, Hethme geseube gene Abrahambe je kak ze,

¹¹“Mak lei, a pau gau, a kuâ ’ngking gai lau; helu I ne ningchu pei gai de lei, zai chige hekâuki bambe ze I ne ningchu pei gai lei; baudime name bambe gene chize I ningchu pei gai lei; ning gu kechaipum ze bai gai le lau,” ze kacheu de lei.

¹²Kane Abrahambe ne Hethme dage, kei ’ngkumkeu lu,

¹³haimena seu le ra hangge Ephronbe je, “A kuâ ’ngking gai ra hangge ningchu I kiam lei. I ne ning gu helu ze peluî lui ne ra de lei. Pemî hangge I ne peibe ze lu le lau, dezai chige a nâu je bai ra de lei,” kacheu de lei.

¹⁴Ephronbe ne Abrahambe je kak ze,

¹⁵“A pau gau, kedei mi â gepût-rangkâng haî medai runne lei, chize â anai kakge ’ndaikau lau? Chige ning nâu je bai gai le zu lau,” ze kacheu de lei.

¹⁶Abrahambe ne Ephronbe je hezuâ gai de lei, zai Abrahambe ne Ephronbe hangge baudime seube gene ranggaibe riak luigum ze, helîkahedetme teibe rît luigumbe gene gepût-rangkâng haî medai pa ne ’nchupat kai bei de lei.

¹⁷Chigum ze Mamre gene naimik pat ’mbia Mak-pela ge Ephrobe gu helu benai chige hekâuki bambe, zai helupua riâ chang ze helu lungge hechingbang bambe leine Abrahambe gu chang di de lei.

¹⁸Hethme chige wangherua gai ze bamme leine ne chize Abrahambe gu kedei chang di de lei be chigaihâ de lei.

¹⁹Chidadege Abrahambe ne pe nâu Sarale je Mamre naimikpat ’mbia Mak-pela gu hênam hekâuki (chize Hebron) Kanaan dei ge bai gai de lei.

²⁰Chigum ze helu benai chige hekâuki bambe ze Abrahambe ne herawloa hang luilube dei chang de ra Hethme ne pei gai de lei.