Read Zeme Naga JENESIS 25 Bible Online

JENESIS 25 - Zeme Naga bible

JENESIS 25

¹Abrahambe pe nâu hangge kêdapui, pe ji Keturale kacheupui je lu kadai de lei.

²Chipaupui dagene Zimran, Jokshan, Medan, Midian, Ishbak, zai Shuah je lungkeu de lei.

³Jokshan â Sheba benai Dedanbe peu de lei. Zai Dedanbe chaname â Asshurme, Letushme, zai Le-umme, aime bau de lei.

⁴Midian name â Epha, Epher, Hanok, Abida zai Eldaa de lei. Aime leine Keturale chaname de lei.

⁵Abrahambe ne pe gu kebambe leine Isaakbe je pei bei de lei.

⁶Kane pa ring ze bambe luage pe nâu nausîpui ne pe dage pe name lungkeugaime hangge pe gu kela ramme pei de lei. Chidadege aime pe name je pe na Isaakbe dagene kedeu ’mbe naimik pat ’mbia ge heram bam ’mbe langtua ’ndi de lei.

⁷Abrahambe chîng-kezuzie di ze gechipau riâ chang ze pa ringbe tingkum ze haî kat ze riaksena ze mengeu lei.

⁸Abrahambe chîng-kezuzie di pe chuilutud kai ze chai di de lei. Zai pe ting wangchang dege pe paume raw ge bai gai ’ndi de lei.

⁹Pe na kena Isaakbe benai Ishmaelbe ne pechu Zoharbe Het’mpeu na Ephronbe gu helu Mamre gene naimik pat ’mbia bambe ge Mak-pela hekâuki ge bai gai bei de lei.

¹⁰Aipau bâm ze â Abrahambe ne Hethme dagene luilube bâm de lei; Abrahambe benai pe nâu Sarale je chige bai gai de lei.

¹¹Abrahambe chaidibe chângge Hera ne pe na Isaakbe je ’nnam gai bei de lei. Zai Isaakbe â Beer-lahai-roi ge bam de lei.

¹²Sarale lângtewpui Ijip’mpui, Hagarle dagene lungkeube, zai Abrahambe na Ishmaelbe

¹³name â aime de lei, meraibe gene henalangbe riâ pesin-perin rawkeu gai de lei: Nebaiothbe, Kedarbe, Adbeelbe, Mibsambe,

¹⁴Mishmabe, Dumabe, Massabe,

¹⁵Hadadbe, Temabe, Jeturbe, Naphisbe, zai Kedemabe.

¹⁶Penui dagene zat kereu ze kena rehei piakeu de lei, zai penui ji ramme gene penui gu keloa ramme benai penui rêugaileube bâm ji ramme hangge ’ntak kai bei de lei.

¹⁷Ishmaelbe â pa chaibe ting ge pe tingkum haî kat ze himreu ze sena riâ chîngchang di de lei.

¹⁸Ishmaelbe chaname â Habila gene Shur heram kena kakge Ijip gene naimik pat ’mbia Assiriaram tatbe ’mpuî ge lung ze bam de lei. Penui â Abrahambe chaname kêdame dagene bamchâmcheî ze bam de lei.

¹⁹Aize Abrahambe na Isaakbe rasam de lei.

²⁰Mesopotamia ge bampeu Aram’mpeu Bethuelbe na heleu’mpui zai Labanbe sipui Rebekale je pe nâu hang lube ting ge Isaakbe â pe tingkum hedai chang di de lei.

²¹Rebekale hena lung mak ze bambe ziegene Tingwang dage pe nâu deu hanggene Isaakbe â kie de lei, Tingwang ne pa gekiebe kak bei ze pe nâu Rebekale ’mpung di de lei.

²²Pe na hangna pe lung gene penai kat-kat je timpheu ze bam di dadege Rebekale ne, “Aigum dizai â, ’ndaigum ze I ringchi ra lau?” kacheu de lei. Dadege Tingwang dagene ’mmêt ra pa tat te lei.

²³Tingwang ne pechu, “Ning gu nebâm lungge heram zat kena la de lei; ziemmena zat kena châmcheîbe kau je nang lungkeu gu lei. Hangkatpeu ne kêdapeu sua â peranchi bi gu lei; pe sipeu ne pe kinapeu guâ ’nggua gu lei,” ze rang gai de lei.

²⁴Pa hena lungrabe ting chang di de lei, zai pe na ’mpeumi kena ’mpinlungrabe ze nebâm ge bam de lei.

²⁵Meraibe â gierebeu zai pe pum du mâ-gêu mechua kaibe gum ze lungkeu lei, chidadege pe ji hang Esaube ze ’ntak kai de lei.

²⁶Pakenabe poine â Esaube pîmesui zamgit lu ze lungkeu de lei, chipauziegene pe ji hang Jakobbe ze ’ntak kai de lei. Penai je lungbe ting ge Isaakbe â kum riakseruk chang di de lei.

²⁷Penai hangna chîngchu di de lei, zai Esaube â heteu tewchibe kau zai hela ’mpuangruanei kau chang di de lei, kane Jakobbe â pe kuâneu-neimakbe kau, zai pe kilûng kahekuîbe kau chang di de lei.

²⁸Isaakbe ne Esaube je hung de lei, pa ne heteu tewkauwangbe ji ramme pa teu ra ngauchi dadegeu. Kane Rebekale ne Jakobbe je hung de lei.

²⁹Mai kat â Jakobbe kunra lang bam ze Esaube hênam ’mbene wang de lei. Zai pa ’njei-desang di de lei.

³⁰Zai Esaube ne Jakobbe je, “I ’njei-desang de lei, chi ning gu hegi giebe gêsa I teu ra pei lau,” kacheu de lei. (Chipauziegene pechu Edom ze ku de lei).

³¹Jakobbe ne, “Railangbe ge nang meraibe changbe gu hedam zua gai raî lau,” acheu bei de lei.

³²Esaube ne, “I chai ra chang di bam ze a hangge gechîngbe dam ze ’ndaikau tâu la lau?” ze acheu bei lei.

³³Jakobbe ne, “A dage hat kai raî lau,” ze acheu bei de lei; chidadege pa hat kai de lei, zai pe gu meraibe changbe dam ze Jakobbe je zua gai bei de lei.

³⁴Chidadege â Jakobbe ne Esaube je tingku benai pa kunra langbe pei bei de lei. Pa teu ze sak kai lu dege, zuachu dai lu pa tatrabe ’mpuî ’mbe tat ti de lei. Aigum ze Esaube â pe gu meraibe gu hedam ze ’nning’nna gai nan tai de lei.