Read Zeme Naga JENESIS 26 Bible Online

JENESIS 26 - Zeme Naga bible

JENESIS 26

¹Abrahambe ting ge herakûm wangbe runne makse, herakûm pakenabe chipau dei ge wang kadai de lei. Isaakbe â Gerar ge Philistinme gu heguang Abimelekbe dage tat te lei.

²Zai Tingwang ne Isaakbe je liâ ze pechu, “Ijip ’mbe wangkeu se lau; aipau ram ge nang bam ra I ne ranggairabe bâm ge bam lau.

³Aige ’nnai ze bam lau, dezai ning dage I bam gu, zai ningchu ’nnam gai bu lei. I ne nang benai ning chaname hangge aipau ram leine pei kam gai gu lei. Ning peu Abrahambe dage I hatkai’ndibe ze I tewpui gai gu lei.

⁴Tinggîm ge hegi ramme bambe gum ze, ning chaname misongga bam ra I ne pei gu lei, zai aipau ram leine ze penui hangge I pei gai gu lei. Ning chaname dage I ’nnamgaibe zene pezat leine hangge ’nnamgaibe chang gu lei.

⁵Abrahambe ne a kuâ pheu zai I ne ranggaibe tei, zai a gu samde ramme, zai a gu hingde rawdiakkaibe ramme, zai hingde ramme teibe ziegene ningchu I ’nnam gai gu lei,” ze rang gai de lei.

⁶Dadege Isaakbe â Gerar ge lung ze bam de lei.

⁷Chige bamme ne pe nâu deu ge getei bei dadege, pe nâu je pe kinapui hangge pa sa’ndam gai de lei, Rebekale â heleu-yi dadege pe nâu lei ze acheu bei dezai chige bamme ne Rebekale je lulerabe hanggene pechu tewchat ra hing de lei.

⁸Chipau bâm ge beting tiesangge pa lunghang gai dege heguang Abimelekbe pe gu muicheiki gene piekeu gai dege Isaakbe benai Rebekale kat-kat je ’nrai bambe ngau de lei.

⁹Abimelekbe ne Isaakbe du kûwang lu pechu, “Pa â ning nâu de zeî lau! ’Ndaitew ze pa â a kinapui lei, ze nang acheuchi lu lau?” ze kacheu de lei. Pa ne kak ze, “I ne ’nninggaibe ge pa â a nâu lei bei dezai achu tewchat ’nde ra I hing de lei,” acheu bei de lei.

¹⁰Abimelekbe ne, “Anui je nang ’ndaikau tew gai lau? A gu ziemmena ruage mige leize sêukâla ze ning nâu je nguaduibe kau de zeî lau, zai nang ne kahemuibe anui peireige teiwanggaibe chang gu de zeî lau,” ze kacheu de lei.

¹¹Abimelekbe ne ’nteumena ’ntîng ra rang gai ze, “Aipau peu benai pe nâu peireige pe ba deigaibe kau je â tewchat ’ndu lei,” ze acheu bei de lei.

¹²Zai Isaakbe chipau dei ge helei ling gai de lei, zai linggaibe tingkum ge bak haî kat riâ pa ngau lu de lei. Pechu Tingwang ne ’nnam gai bei dadegeu.

¹³Pa tâtew pungbi-bi ze keheupeu chang di de lei.

¹⁴Pe gu melidung ramme benai getumdung zai pe guâ ka’ngguame misongga ze bamdibe ziegene Philistinme pechu hemimeu di de lei.

¹⁵Chidadege penui ne pe peu Abrahambe ringbe ting ge pe guâ ka’ngguame ne dekuaki kuigaibeibe ramme leine kuichim kam ’ndi de lei.

¹⁶Chidadege Abimelekbe ne Isaakbe je, “Anui dagene tat te zu lau; nang ne anui suadu rezie chibi-bi di daseu,” kacheu de lei.

¹⁷Dadege Isaakbe tat ze Gerar kâm ge pe ki liâm gai lu, tingkat chige ’nnai gai de lei.

¹⁸Pe peu Abrahambe ting ge kuigaidiakbe dekua ramme Philistinme ne tewchim’ndibe dekuaki ramme pa ne kui-rechi wang kadai de lei. Pe peu ne ’ntakkaidiakbe ji ramme ne dekuaki ji ramme hangge pa du kû kadai de lei.

¹⁹Isaakbe guâ ka’ngguame ne bekâm ge dekuaki su gai ze, heduidepin sudau lu de lei.

²⁰Gerar ge melireîme ne Isaakbe gu melireîme je hegei ze, “Aipau dui ze anui gu lei,” kacheu de lei. Chipauziegene dekuaki ji hang Esek ze ’ntak kai de lei, penui ne pechu kahegeibe ziegeneu.

²¹Isaakbe guâ ka’ngguame ne pakenabe dekuaki kui gai kadai de lei, zai chipau dekuaki deu ge du hegeipat kadai de lei, chidadege Isaakbe ne pe ji hang Sitna (desiesiabe) ze ’ntak kai de lei.

²²Chigene pa tatchâmpat dai ze, pakechumbe dekuaki kui gai kadai de lei. Aipau dekuaki deu ge â kahegeibe ga di de lei, chidadege pa ne dekuaki ji hang Rehoboth (letlagaibe), ze ’ntak kai de lei. Pa ne acheu sa ze, “Tingwang ne anui bâm hangge lat kai de lei, zai aipau dei ge anui pung-ze-sa ze bam gu daseu,” ze kacheu de lei.

²³Chipau bâm sâu ze Isaakbe â Beer-sheba ’mbe tat ti de lei.

²⁴Chipau mai tingmuî ge Tingwang ne pechu liâ ze, “I â ning peu Abrahambe Rapeu lei; hing se lau, ning dage I la lei. A guâ ka’ngguapeu Abrahambe dage I deseugai’ndibe ziegene ningchu I ’nnam gai gu zai ning chaname misongga ze bam ra I ne pei gu lei,” ze kacheu de lei.

²⁵Chipau bâm ge Isaakbe herâtewbe bâm teleu gai lu, Tingwang je kakellum de lei. Pa bamrabe hetiamki chige liâm’nsapchu gai lu, zai pe guâ ka’ngguame ne dekuaki kêdabe kui kadai de lei.

²⁶Gerar ’mbene Abimelekbe pe gu kaladdeipeu Ahuzzathbe benai hereikangme ruage besuitewpeu Phikolbe je ngua lu Isaakbe dage zuamie de lei.

²⁷Isaakbe ne penui je, “’Ndaitew ze ningnui a dage wang lau, ningnui achu ngaugailak ze ningnui dagene kelituâ-tuâ lu zeu?” ze kacheu de lei.

²⁸Penui ne kak ze, “Tingwang â ning dage bam lei be anui chî’nchichiak te lei, chipauziegene anui kakge samhatbe bam ra yi lei, ze anui ’nning gai de lei.

²⁹Anui je nang tew’nsia mak ra ning dagene samhatbe bam kei lei, anui ningchu deîzatge du mak, zai mâ de kesiatew mak, kane keyibe runne tew gai zai desieyi ze ningchu tat ra ’mpat kai bei gum zeu. Nang â chunage â Tingwang ne ’nnamgaibeibe kau chang de lei,” kacheu de lei.

³⁰Dadege Isaakbe ne penui hangge luube-teseu teleu gai de lei, zai penui teu ze sak te lei.

³¹Hechua dege chuzisi lu ze kat-kat dage kadeseu de lei; zai Isaakbe ne penui je gepâupat kai bei de lei, zai desieyi ze pe dagene penui tatrimna di de lei.

³²Chipau mai ge Isaakbe guâ ka’ngguame wang lu pechu, penui kuigailube dekuaki rasam salia de lei, penui ne pechu, “Anui ne hedui peudau lu de lei,” kacheu de lei.

³³Pa ne chipau dekuaki ji hangge Shiba (Kadeseube) ze ’ntak kai de lei; chipauziegene chuna ting chang ze chipau namdi ji Beer-sheba ze kû bam de lei.

³⁴Esaube kum hedai chang di dege, Hethme heleume hangna Be-eribe na Judithle benai Elonbe na Basemathle je pe nâu hang lu de lei.

³⁵Penai ziegene Isaakbe benai Rebekale lungsui tew’nsia-desang di de lei.