Read Zeme Naga JENESIS 27 Bible Online

JENESIS 27 - Zeme Naga bible

JENESIS 27

¹Isaakbe â chîng di, zai pe mik ngau ta di de lei. Pe na meraipeu Esaube je kûwang lu, pa ne pechu, “A na gau,” kacheu de lei. Zai pa ne kak ze, “I aige la lei,” kacheu de lei.

²Isaakbe ne, “I â chîng de lei, I chairabe mai du chita de lei.

³Ning gu bai’mpi benai hetu ramme tei lu, hênam ’mbe tat ze, a hangge hekaune tewchat le lau.

⁴I ne teuneibe luigum ze chi teuyi-kadesangbe hetak ze a hangge helang gai lau, I teu gai ra hangge teiwang lau, chidezai I chai makge ningchu I ’nnam gai ra hangge zeu,” kacheu de lei.

⁵Pa ne Esaube je ka’mpaube luage Rebekale â ’ngking bam de lei. Chipauziegene Esaube hênammie ra tat ti dadege,

⁶pa ne Jakobbe je, “Ning sipeu Esaube je ning peu ne,

⁷‘A hangge hekaune teiwang ze teuyibe hetak helang gai lau, chidezai I teu gai lu, I chairabe suage Tingwang masuage ningchu ’nnam gai be ra hang,’ ze ranggaibe I seu de lei.

⁸Chidaze a na gau, chunage a kuâpheu lau, zai I ne ranggaibe luî tew lau.

⁹Pedung ruagene tat ze kemeipoine peleuyibe kena a dage teiwang gai lau, chidezai chize ne ning peu ka’nchâbe luigum ze pa teuneibe hetak I ne helang gai bu lei.

¹⁰Pa teu gai ra nang ne teigut kai ra de lei, dezai pa chairabe suage ningchu peize pa ne ’nnam gai ra hangge zeu,” kacheu de lei.

¹¹Kane Jakobbe ne pe pui je, “Esaube â pe gêulungbungbe kau, zai I â ’ndiaupiaube kau lei be nang chî de lei.

¹²A peu ne achu deî ra chang, zai I ne pechu chuo ze duai lei be chî di lêuzai â ’nnamgairabe kelei ge kadesetbe a runne a peireige teiwang gai gu de lei,” acheu bei de lei.

¹³Pe pui ne, “A na gau, ning peireige desetkairabe ze a peireige peize keu gai de lau, a kuâ lu gai lau zai tat ze kemeipoine kena a dage teiwanggairabe runne nang â tew gai be lau,” kacheu de lei.

¹⁴Chidadege pa ne tat ze kemeipoine kena teiwang lu pe pui je pei bei ze pa ne pe peu ’nning luigum ze lang gai bei de lei.

¹⁵Zai Rebekale ne Esaube puâ yilangbe pe ki ge bambe ramme tei lu, Jakobbe je luak kai bei de lei.

¹⁶Pa ne Jakobbe ba ge kemei gei ne kai bei, zai pe guangtie pegêugabe ’nchui ge du kai bei de lei.

¹⁷Chidadege chi teuyibe hetak benai tingku pa ne langlube ze Jakobbe je bala gai bei de lei.

¹⁸Chidadege Jakobbe pe peu dage tat ze, “A peu,” kacheu de lei; pe peu ne, “I aige la lei, a na gau, nang ’ndaipeu lau?” kacheu lei.

¹⁹Jakobbe ne kak ze, “I â ning na meraipeu Esaube lei. Nang ne rangbe luigum ze I tew gai de lei; chu ze ’ntau le lau, zai I ne hemei ning hang teiwangbe teu gai zu lau, dezai achu nang ’nnam gai le ra hangge zeu,” acheu bei de lei.

²⁰Isaakbe ne, “A na gau, ’ndaigum ze nang aipau depêu-peu kelua lu se lau?” kacheu de lei. Jakobbe ne kak ze, “Tingwang ning Rapeu ne achu keduîbe peigaibeibe ziegene de lei,” acheu bei de lei.

²¹Isaakbe ne Jakobbe je, “A na gau, wang’nna bi lau, dezai ningchu I deî gai lu, nang ze a na Esaube run de mei nune mak mei be chî le ra hangge zeu,” kacheu de lei.

²²Jakobbe pe peu Isaakbe tailam wang’nna di de lei, zai pe peu ne deî gai lu dege, “Ning kuâ â Jakobbe kuâ da, kane ning ba kena â Esaube ba de zeî lau,” kacheu de lei.

²³Pe ba ramme â Esaube ba gum ze pegêu gechuînung bam bei dadege Jakobbe je pe peu â chî ta di de lei, chipauziegene pechu ’nnam gai de lei.

²⁴Pa ne sa dai ze, “Nang a na Esaube run de semei?” kacheu de lei. Jakobbe ne, “Eu lei, I ze de lei,” acheu bei de lei.

²⁵Chidadege Isaakbe ne, “Chize a tailam teiwang zu lau, dezai a na ne teiwangbe mei ji I teu gai lu ningchu ’nnam gai be ra hangge zeu,” kacheu de lei. Dadege Jakobbe ne teiwang bei ze pa teu gai de lei; zai wain sak ra hang du pa ne teiwang gai bei de lei.

²⁶Chidadege pe peu Isaakbe ne pechu, “A na gau, wang’nna lu achu keput kai lau,” kacheu de lei.

²⁷Chidadege pa wang’nna lu pe peu je keput kai de lei; zai pe paî (pe puâ) rîm ’ngnguî gai lu dege, pechu ’nnam gai ze Isaakbe ne acheu sa ze, “Pie le lau, a na rîm â Tingwang ne ’nnamgaibeibe hênam rîm gum de lei!

²⁸Peize Hera ne ning hangge tinggîm gu kezikdui, zai kedei keyibe zai chêu benai wain misongga ze bam ra pei gai be lau.

²⁹Peize ziemmena leine ne ning guâ ’nggua lau, zai heram leine ne peize ning suage keikeu lau. Ning sikina peireige peize nang ne samram lau; zai ning pui ne lungkeube na ramme ne peize ning dage keikeu lau. Peize ningchu desetkaibe kau ramme leine je deset kai be lau, zai ningchu ’nnamgaibe kau leine je ’nnam gai be lau,” ze rang gai de lei.

³⁰Jakobbe peireige Isaakbe ne ’nnam kam gai lu, zai pe peu Isaakbe dagene pa zuapat gap kai dege, pe sipeu Esaube heteurui ra tat lu wang de lei.

³¹Pa du teuyibe hetak helang zun lu ze pe peu dage teiwang de lei. Zai pe peu je pa ne, “A peu gau, chu ze ’ntau le lau, zai I ne teiwangbe mei ji teu gai zu lau, dezai achu nang ’nnam gai ra hangge zeu,” kacheu de lei.

³²Pe peu Isaakbe ne, “Nang châu lau?” kacheu de lei. Pa ne kak ze, “Ning na meraibe Esaube de lei,” acheu bei de lei.

³³Chidadege Isaakbe kelip ze pe pum kechuîsak bam di de lei, zai acheu sa ze, “Acheuzai, hekaune tewchat lu a dage teiwangbe châu se lau? Nang wangrabe lia gene chize I teu gai de lei, zai I ne pechu ’nnam gai bei de lei. Eu lei, pa â ’nnamgai’ndibe kau chang gu de lei.” Ze kacheu de lei.

³⁴Esaube pe peu sam seu gai lu dege, hapkehipkoak bam di de lei, zai pe peu suage, “A peu, achu du ’nnam gai lau,” kacheu de lei.

³⁵Kane pa ne, “Gechuobe ’mpuî gene ning kinapeu wang de lei, zai pa ne ning gu ’nnamgairabe dam ze â teitat ti de lei,” acheu bei de lei.

³⁶Esaube ne, “Aize achu pa chuobe pakenabe de lei. Pe ji ne du Jakobbe ze kû ra bui sing runne de lei. A gu gechîngbe gu hedam ze du pa ne tei lu da zai chunage du a gu ’nnamgaibe dam pa ne lutat dai di de lei. Nang â a hangge ’nnamgaibe katte ’nsak kai mak semei?” kacheu de lei.

³⁷Isaakbe ne kak ze, “A na gau, pa ne ning peireige samrampeu hangge I ne pei gai ’nde lei, zai pe sikina leine ne pe guâ ka’ngguame chang ra tew gai ’nde lei, chêu benai wain misongga bam ra I ne pei gai ’nde lei. Chidaze a na gau, ning hangge ’ndaikau I tewchi dai ra lau?” kacheu de lei.

³⁸Esaube ne pe peu je, “A peu, kat runne leusedu ’nnamgairabe ning dage bam gu rei mei? Hei! a peu gau, achu du ’nnam gai lau,” kacheu de lei. Chidadege pa pe kuâ happat ze hap ti de lei.

³⁹Chidadege pe peu Isaakbe ne kak ze, “Pie le lau, kedeiyibe gabe bâm ze nang lungrabe bâm hang de lei, zai tinggîm ’mbene ruikeube kezikdui ning hangge ga gu lei.

⁴⁰Ning gu hiazutkie ne nang â ring ra de lei; zai ning kinapeu gua nang â ’nggua ra de lei; kane nang ne ’ndiepat lu dezai, pe gu guangkam ning guang gene tewbet ’ndu lei,” acheu bei de lei.

⁴¹Jakobbe je pe peu ne ’nnamgai’ndibe ziegene Esaube â Jakobbe je ngaugailak te lei, zai Esaube pe lung gene, “A peu je desuirabe naimikpui na de lei; chidezai a kinapeu Jakobbe je I tewchat ku lei,” ze kacheu de lei.

⁴²Kane pe na meraipeu Esaube sam ramme Rebekale dage pauliâ gai bei de lei; chidadege pe na Jakobbe je pa ne ku lu, pechu pa ne, “Pie le lau, ningchu tewchat ra ’nningpatkailube gene ning sipeu Esaube â pe runne pechu tum la de lei.

⁴³Chidaze a na gau, a kuâ pheu le lau; kelua ze Haran ’mbe a kinapeu Labanbe tailam pak kai de lau,

⁴⁴zai ning sipeu pe râtabe hegeikeu de mak tâne chige bam leu de lau;

⁴⁵zai pe peireige nang tâtewgai’ndibe ’ngngaî ’ndi dezai chige ningchu nguawang dai ra I ne lang gai gu lei. ’Ndaitew ze mai kat ne ningnai hangna je I heu ze desui ra lau?” ze rang gai bei de lei.

⁴⁶Chidadege Rebekale ne Isaakbe je, “Hethme pui ramme ziegene I a lung lei-desang de lei. Jakobbe ne du aipau deiname Hethme ’mpuimi, aigumbe kau leu ramme je pe nâu hang lu dai dizai â, a keringbe ze a hangge ’ndaikau keyibe bam dai ra lau?” kacheu de lei.