Read Zeme Naga JENESIS 28 Bible Online

JENESIS 28 - Zeme Naga bible

JENESIS 28

¹Chidadege Isaakbe ne Jakobbe je ku lu, ’nnam gai ze, pechu, “Kanaanme leu je nang â lu ra mak lei.

²Zuachu zu lau, Paddan-aram ge ning pui peu Bethuelbe ki lam’mbe tatchu lau; zai ning pau Labanbe na heleume ruagene hangkat pui je ning nâu hang lu le lau.

³Mâgetaleine ge reziechibe Rapeu ne ningchu peize ’nnam gai be lau, zai ning rachî misongga ze heluîhing ze bam ra tew gai be lau, dezai nang â pezat kedibe chang le ra hangge zeu.

⁴Nang tirua ze bambe heram, Hera ne Abrahambe je peigaibe heram ze ning hang changlerabe hangge Abrahambe gu ’nnamgaibe ze nang benai ning dagene reheipiakeume leine je peize Hera ne pei gai be lau!” ze kacheu de lei.

⁵Chigum ze Isaakbe ne Jakobbe je langtua ’ndi de lei; zai pa Paddan-aram ge Aram’mpeu Bethuelbe na zai Jakobbe benai Esaube pui Rebekale kinapeu Labanbe tailam tat ti de lei.

⁶Isaakbe ne Jakobbe je ’nnam gai lu ze pe nâu hang peu le ra Paddan-aram ’mbe lang gai ’ndi de lei be Esaube chî di de lei, Isaakbe ne pechu ’nnamgaibe luage Kanaanme leu je â pe nâu hangge lu mak ra Jakobbe je ranggaibe ze du Esaube chî di de lei.

⁷Jakobbe ne pe peu benai pe pui kuâ pheu ze Paddan-aram ’mbe tattibe du pa chî di de lei.

⁸Dadege Esaube pe nâu hangge pa ne Kanaanme ’mpuimi ramme je lubeibe ziegene pe peu Isaakbe pe suiyi mak lei be chî lu dege,

⁹pa Abrahambe na Ishmaelbe dage tat ze pe nâu hangge Mahalath na zai Nebaiothbe kinapui je pe nâu hang lu de lei.

¹⁰Jakobbe â Beer-sheba sâu ze Haran keloa ’mbe tat ti de lei.

¹¹Bâm kat ge pa chang dege naimik kêu di ze chige tingmuî pa jei de lei, zai tingchukâng ne pe kûmtew lu chige pe peî ’mbeî gai lu jei de lei.

¹²Zai pe mang gene kedei gene desua (pichaîra) râchu ze tinggîm riâ chang ze bambe pa ngau de lei; zai pie le lau, Hera gu tinggîm angelme chi gene wangkeu lu, chu dai acheu ze tat’nrui bam de lei.

¹³Zai pie le lau, chipau peirei ’mbe Tingwang sap lu acheu sa ze, “I ze â Tingwang, ning peu Abrahambe Rapeu zai Isaakbe Rapeu de lei; nang chunage jeibe dei ze nang benai ning chaname hangge I pei gai gu de lei;

¹⁴zai ning chaname â kedeiniamoîne kie riâ bam gu lei, zai tingrun gene tingbia zai tingpeî gene tingpî chang ze heram ’nram gu lei; zai nang benai ning chaname dagene kedeirei zat leine hangge ’nnamgaibe chang gu lei.

¹⁵Pie le lau, I ning dage la zai nang tatkaibe bâm leine ge I ne ningchu reî ze bam gu lei, zai aipau ram ge I ne ningchu nguawang gai dai gu lei; ningchu I ranggai’ndibe leine I tew gai mak tâne ningchu I sâu ra mak daseu,” ze kacheu de lei.

¹⁶Dadege Jakobbe pa jeibe gene ’nrakchu lu, acheu sa ze, “Aipau bâm ge Tingwang â la run de lei, zai I â chî mak luisui ze bam di de lei,” kacheu de lei.

¹⁷Zai pa hing di de lei, zai acheu sa ze, “Aize â mi kehingbe bâm gezeî lau! Aize â Hera ki ra zangno kêdabe bâm â ta de lei, zai aize tinggîm kemui de lei,” ze kacheu de lei.

¹⁸Chidadege Jakobbe hechuasûn chu de lei, zai pa ’ngkûmjeibe chukâng teichu sum gai de lei, zai chipau peireige taudui ruî gai de lei.

¹⁹Chipau bâm ji hangge pa ne Bethel ze ’ntak kai de lei; kane keraîbe ting â chipau bâm ji ze â Luz ze ku lei.

²⁰Dadege Jakobbe ne samhat kai ze, “Hera ne a dage bam bei, aigum ze I tatbe ge pa ne reî bei, zai I teu ra tingku zai I bâ ra paî pei kam bei

²¹zai yize a peu ki lam’mbe helatwang dai ra pei bei zai â, Tingwang â a hangge a Rapeu chang gu de lei,

²²zai aipau tingchukâng I sumgaibe ze Hera ki hang chang gu de lei; zai nang ne a hangge peigaibe leine gene kereu ge kat ning hang I pei gu de lei,” ze kacheu de lei.