Read Zeme Naga JENESIS 29 Bible Online

JENESIS 29 - Zeme Naga bible

JENESIS 29

¹Chidadege Jakobbe tebeîtew-’nduâtat ze naimik pat ’mbia ge bambe dei ’mbe tat kai di de lei.

²Pa heguapie gai dege, bekâm ge dekuaki bambe pa ngau de lei, zai ni, dekuaki hiage melidung kechum jei bam de lei; chipau dekuaki gene melidung je hedui guî guî dadegeu. Dekuaki kemui gumnambe chukâng ze â di lei,

³zai chige melidung leine wang’nggam gai dezai, chi dekuaki mui gene meli reîme ne tingchukâng chui’mbia lu, meli ramme je hedui guî gai lu, dezai dekuaki mui ge teiwang gai dai dai lei.

⁴Jakobbe ne penui je, “A puiname gau, ’ndaigene ningnui wang lau?” kacheu de lei. Penui ne, “Anui â Haran gene lei,” ze kak te lei.

⁵Pa ne penui je, “Nahorbe na Labanbe je ningnui chî mei?” kacheu de lei. Penui ne, “Pechu anui chî lei,” acheu bei de lei.

⁶Pa ne penui je, “Pa yi ze la mei?” kacheu de lei. Penui ne, “Yize la lei; zai ni, melidung je ngua lu ze pe na Rakelle aige wang la lei!” kacheu de lei.

⁷Jakobbe ne, “Ni, chuna â naimik hu gerei daze, melidung je kumwang’nduirabe hî chang mak rei de lei; meli ramme je hedui guî gai lu ze penui je petaning ’mbe deteu ra nguatat kai be lau,” kacheu de lei.

⁸Kane penui ne, “Melidung ramme wang’ndui kam gai ze, dekuaki mui gene tingchukâng chui’mbia le mak tâne â anui chipau tâ ze tewchi lak lei; wang kam gai dezai anui melidung je hedui guî gu lei,” ze kacheu de lei.

⁹Jakobbe penui je ’mpau lage, Rakelle pe peu gu melidung je kumwang leu de lei; pa ne chiramme reî dadegeu;

¹⁰Jakobbe ne pe pau Labanbe gu melidung je Rakelle ne kumwanggaibe ngau lu dege, dekuaki ge wang lu, tingchukâng chui’mbia lu ze melidung je hedui guî gai de lei.

¹¹Dadege Jakobbe ne Rakelle je pe kuâ pat ze pe suiyi ze keput-getie bam de lei.

¹²Pa ne Rakelle je, “I â ning peu kiduîme de lei, zai Rebekale na lei,” ze salia bei de lei. Rakelle ne paktat ze pe peu je salia gai bei de lei.

¹³Zai Labanbe ne pe chapeu Jakobbe rasam seugap lu dege â pechu suidau ra paktat ze, pechu pam lu kakeput te lei, zai pe ki lam nguawang di de lei. Mâgetaleine wangchangbe tak Jakobbe ne Labanbe je salia kam bei dadege,

¹⁴Labanbe ne, “Eu lei, a pum benai a jai gene wangkeube kau de lei,” kacheu de lei. Jakobbe chige kêu kat tâluî bam gai de lei.

¹⁵Labanbe ne Jakobbe je, “Nang ze a kiduî’mpeu lei be ziegene ’ntakûne a guâ ’nggua ze bamrabe du mak te lei. Achu rang gai lau, ning hî hangge ’ndaikau pei ra lau?” kacheu de lei.

¹⁶Labanbe na heleume hangna bam de lei; chîngpui ji â Leale de lei, zai kahenapui ji â Rakelle de lei.

¹⁷Leale â pe mikrak heguiribe kau de lei, kane Rakelle â peluîra yi zai heleu-yi lei.

¹⁸Jakobbe ne Rakelle je ngauka’nchâ lei, chipauziegene pa ne, “Rakelle je I nguakelaktew ra pei bei zai â kum sena I ning guâ ’nggua gu lei,” ze kacheu de lei.

¹⁹Labanbe ne kak ze, “Pechu miramme kêdabe kau nâu hangge I kai ra suane â ning nâu hang kai be ra I nei lei, aige a dage nang bam le lau,” kacheu de lei.

²⁰Rakelle je lu le ra hanggene Jakobbe kum sena tâtew ze bam de lei; zai Rakelle je pa hungbe ziegene pe hangge â naimikpui gechâmne gum ze tai de lei.

²¹Chidadege Jakobbe ne Labanbe je, “Pehî a hangge peigaibe tew’nsang gai ’nde lei, ning na heleu’mpui je a nâu hang pei du lau,” kacheu de lei.

²²Chidadege Labanbe ne luube-teseu teleu gai ze, ’nteumena je kû gai de lei.

²³Kane chipau mai tingmuî ge Rakelle je peirabe kelei ge, Leale je Jakobbe nâu hang pei gai bei de lei, zai Jakobbe ne pe dage ngua gai ’ndi de lei.

²⁴(Labanbe ne pe na Leale guâ ka’ngguapui hangge pe guâ ka’ngguapui Zilpale je peipat kai bei de lei.)

²⁵Zai hechua bapat dege â Leale je pe nâu hang peipat kai bei de lei be Jakobbe chî di de lei. Pa ne tat je Labanbe je, “’Ndaitew ze a peireige nang aigumbe tâ tew gai rei lau? Rakelle hang gene I tâtew gai de mak ti lau? ’Ndaitew ze nang achu choa rei lau?” kacheu de lei.

²⁶Labanbe ne kak ze, “Anui ram ge â kahenapui ne gechîngpui sua â mei raî ra pei mak lei.

²⁷Ai kahegiabe-’ntakkak tewpui gai raî le lau, dezai kum sena a guâ ’ngguagaisuâkadaibe hangge kêdapui je du anui ning hang pei gai dai bu lei,” ze kacheu de lei.

²⁸Jakobbe chipau luî tew de lei, zai chipau pui je kahegiabe-’ntakkak rei’nsangsiak kai de lei; chidadege Labanbe ne pe na heleu’mpui Rakelle je pe nâu hang peipat kai de lei.

²⁹(Labanbe ne pe guâ ka’ngguapui Bilhale je pe na Rakelle guâ ka’ngguapui hangge pei gai bei de lei.)

³⁰Dadege Rakelle je du Jakobbe ’nrai gai de lei, zai Leale je sua â Rakelle je pa hungka’nteu de lei, zai pa kum sena Labanbe guâ ’nggua gai sî kadai de lei.

³¹Leale je â ’nriebidibe Tingwang ne ngau lu dege, pa ne Leale gu nebâm lat kai bei de lei; kane Rakelle â hena bam mak te lei.

³²Dadege Leale ’mpung ze pe na ’mpeumi napoine lungkeu de lei, zai pa ne pe ji hang Reubenbe ze ’ntak kai de lei; pa ne, “Tingwang ne I lungkahereube ngau lu de lei; chuna â a napeu ne achu hung sing gu de lei,” ze pa kacheube ziegeneu.

³³Pa ’mpung dai ze ’mpeumi napoine lungkeu kadai de lei, zai pa ne, “Achu â ’nrie ze bam lei be Tingwang ne seulube ziegene ai a na ’mpeumi napoine pei gai kadai de lei,” ze kacheu de lei; zai pa ne pe ji hang Simeonbe ze ’ntak kai de lei.

³⁴Pa ’mpung ze ’mpeumi napoine lungkeu kadai de lei, zai pa ne, “Chunage â a napeu anai kakge helakgit ze bam du de lei, pe na ’mpeumi hangchum I ne lungkeu gai bei daseu,” kacheu de lei; chipauziegene pe ji hangge Lebibe ze ’ntak kai de lei.

³⁵Zai pa ’mpung dai ze ’mpeumi napoine lungkeu kadai de lei, zai pa ne, “Chuna â Tingwang je I toa gu de lei,” kacheu de lei; chipauziegene pe ji hang pa ne Judabe ze ’ntak kai de lei; chidadege â pa hena lungsau gai di de lei.