Read Zeme Naga JENESIS 31 Bible Online

JENESIS 31 - Zeme Naga bible

JENESIS 31

¹Labanbe name ’mpeumi ramme ne, “Jakobbe ne anui peu gu kebambe ramme leine lu kam de lei; zai anui peu gu keheube ramme gene aigumbe keheube pa ngau de lei,” kacheube Jakobbe seu di de lei.

²Zai besua’ngka gum â Labanbe ne pechu ’nchâ ta di de lei be Jakobbe ngaupat ti de lei.

³Chidadege Tingwang ne Jakobbe je, “Ning peu benai ning kiduîme lungbe ram ’mbe helatwang dai de zu lau, zai ning dage I bam gu lei,” acheu bei de lei.

⁴Chidadege Jakobbe ne sam lang gai ze pe gu kaurui ramme kadeteube bâm peningkâm ge Rakelle benai Leale je kûwang gai de lei,

⁵zai pa ne penai je, “Besua’ngka ge achu ka’nchâ gum ze chuna â ningnai peu ne achu ’nchâ ta di de lei be I ngau de lei, kane a peu Rapeu a dage nguabam lamui rei lei.

⁶A ran leine ne ningnai peu guâ I ’nggua gai de lei be ningnai â chî lei;

⁷acheubeisede ningnai peu ne achu choa ze a hî ngaurabe gene lua kereu tewkeli ’ndi de lei, kane achu tew’nsia ra Hera ne pechu lun mak tai de lei.

⁸Pa ne, ‘Pegiak taureu-reube ze ning hî hang de lei,’ ze acheu bei zai â kaurui ramme leine ne pegiak taureu-reube ramme ’nniadiak kai di tai lei; zai pa ne, ‘Pegiak perierikbe ramme ze ning hî hang de lei’ ze acheu bei zai du, kaurui ramme pegiak perierikbe ramme ’nniadiak kai di tai lei.

⁹Aigum ze ningnai peu gu kauruidung ze Hera ne lutat lu, chiramme ze achu pei gai bei de lei.

¹⁰Kaurui guabe ting ge a mik raklep chu gai de lei, zai a mang gene kaurui dung peireige kemei’nsei ramme pegiak pungbe, taureu-reube zai perierikbe ramme ne kumrua bambambe I ngau de lei.

¹¹Chidadege a mang ka’mmibe gene Hera gu tinggîm angel’mpeu ne achu, ‘Jakobbai,’ ze kacheu de lei, dadege I ne ‘Aige I la lei!’ ze kacheu de lei.

¹²Chidadege pa ne, ‘Ning mik rakpat ze pie gai ni lau, kemei ramme pedung ruage ’nsakrua ze kumruabambe leine ze pegiak pungbe, taureu-reube zai perierikbe ’nnia de lei; ning peireige Labanbe ne tâtewbe ramme leine I ngau kam lu daseu.

¹³I â tingchutum ge nang taudui ’nnuk kai ze a dage deseugaibe bâm Bethel Rapeu lei, chunage zuachu zu lau, aipau dei gene zuapat ze ningchu lungkeugaibe heram ’mbe helatwang dai zu lau,’ ze kacheu de lei” ze kacheu de lei.

¹⁴Chidadege Rakelle benai Leale ne pechu kak ze, “Anai peu ki ge hedam mei nune mi heurâ mei ze anai hangge ’nsak kai ze la semei?

¹⁵Anai je â hesangme je gum ze pa ne chak kai mak semei? Pa ne anai je zua lu, zai anai hang peibe rangkâng ze du pa ne tew’ngga kam ’ndi daseu.

¹⁶Anai peu dagene Hera ne lutat’ndibe heurâ ramme leine anai benai anai name gu chang de lei. Chunage chidaze ningchu Hera ne ’ndaikau rang gai mei be, chize tew zu lau,” kacheu de lei.

¹⁷Dadege Jakobbe zuachu lu, zai pe name benai pe nâume je put-hu ching ge kai de lei;

¹⁸zai pe peu Isaakbe tailam, Kanaanram ’mbe tat ra hangge Paddan-aram ge pa bambe ting gene pe gu kaurui ngaulube zai pa ne ’ngkut’ndingpatlube kauruidung leine kumtat ti de lei.

¹⁹Labanbe â pe gu meli gêu chiap ra tat ti de lei, zai Rakelle ne pe peu ki gu hera ramme kahega de lei.

²⁰Zai Jakobbe ne Aram’mpeu Labanbe je choa ’ndi de lei, pa pak te ra ka’nning lei be pechu salia mak dadegeu.

²¹Pe gu kebambe leine tei lu pak’mbiatat ti de lei, zai zuachu ze Euphrates geuki katat ti de lei, zai Gileadram peloaram ’mbe tatzua di de lei.

²²Jakobbe pak ti de lei be pakechumbe mai dege Labanbe je rang gai bei dadege,

²³pe kiduîme, (pe sikiname) je ngua lu hezie sena pechu gua’nsatat ze Gileadram peloaram ’mbia pe chai guachaptat ti de lei.

²⁴Kane tingmuî ge pe mang gene Aram’mpeu Labanbe dage Hera ne wang lu ze, pechu rang gai ze, “Jakobbe dage keyibe sam mei nune kesiabe sam mei be samkie kat du nang sa gai mak ra lei be ’ntîng le lau,” ze acheu bei de lei.

²⁵Zai Jakobbe je Labanbe gua’nsachang di de lei, zai Jakobbe â peloa’ntûm ge pe gu paîki liâm gai lu bam lei, zai Labanbe â Gileadram peloaram ge paîki liâm gai lu bam de lei.

²⁶Zai Jakobbe je Labanbe ne, “Nang achu duai zai herei gene nîm’ndime je gum ze a na ’mpuimi ramme je nang ne nguatattibe ze a peireige nang ’ndaikau tew gai lau?

²⁷’Ndaitew ze nang ’mbaipak, zai achu duai, zai achu mâ de ranglia mak lau? Chidezai hesuiyibe benai heleutewbe gene ’nsum benai ’nrabung tei lu ningchu gepâu gai be ra hangge zeu?

²⁸Zai I a na ’mpeumi ramme benai ’mpuimi ramme je kageputbe gene gepâu gai ra ’ndaitew ze nang achu pei mak lau? Chunage kemiebe tâ nang tew gai de lei.

²⁹Ningchu tew’nsiarabe rezie a ba ge lamui de lei; kane ’nzimai tingmuî ge ning peu Rapeu ne achu rang gai ze, ‘Keyibe mei nune kesiabe mei du Jakobbe peireige sa gai se lau,’ ze kacheu de lei.

³⁰Zai chunage nang ning peu ki je huîbe ziegene tat ti de lei, kane a gu hera ramme ’ndaitew ze nang kahega lau?” kacheu de lei.

³¹Labanbe je Jakobbe ne kak ze, “Ning name ’mpuimi ramme je ’nchi-chine a dagene nang ne sut-tat te ra gum I ’nning gai lu hingdibe ziegene de lei.

³²Mige dagene ning gu hera ramme peudau dizai â pechu peize ring ra mak lei, anai sikina bambe suagene ’ndaikau ning gu I ne tei’ndibe la mei be pie lu ze chize tei le lau” ze kacheu de lei. Chiramme Rakelle ne hega ’ndi de lei be Jakobbe â chî mak dadegeu.

³³Chidadege Jakobbe gu paîki ge Labanbe tatgut kai, zai Leale gu paîki ge gut kai, zai ka’ngguapui kena gu paîki ge gut kai de lei, kane mâ de peupat mak tai de lei. Zai Leale gu paîki gene pa pat lu, Rakelle gu paîki ge gut ti de lei.

³⁴Zai Rakelle ne pe ki gu hera ramme ze tei lu put-hu ching ge bâm lungge kai lu, pe peireige ’ntauchim ’ndi de lei. Labanbe ne paîki peutuipik kai lu, kane peudau mak te lei.

³⁵Zai pe peu je pa ne rang ze, “Ning masuage I sapchuchilaktibe ziegene a pau je peize pe râta se lau, a dage I a nîsiabe la daseu” ze kacheu de lei. Chidadege pa peurua gai ze, pe ki gu hera ramme peudau mak tai de lei.

³⁶Chidadege Jakobbe pe lumpum di ze Labanbe je geikang de lei; Jakobbe ne Labanbe je, “A mâu ’ndaikau la lau? A gu hemui ’ndaikau lau, nang achu gua’nchumiebe zeu?

³⁷A gu merua ramme getai-piekamgailube chângge ning ki gu merua ramme ruage gadibe ’ndaikau peudau lau? Anai hangna kakge samram ra hangge ning sikiname benai a sikiname kakge kai le lau.

³⁸Ning dage I tingkum ’ngkai bam de lei; ning gu melipui ramme benai kemeipui ramme penui na lung’nsia’ndibe tew me lei, zai ning gu kauruidung gene meli’nsei ze du I langteu me lei.

³⁹Hekaune ne tewchat’ndibe â ning dage I teiwang gai mak te lei, chi gadibe mî ze I ne ka’nzua de lei; ’nrîmbeting gene mei nu tingmuî gene mei ze hegatattibe ze a dagene nang ’nzuakie de lei.

⁴⁰Chigum ze I bam de lei; ’nrîmbeting ge kelumbe ted lie, zai tingmuî ge heta’nggi ze, zai jeikeulak ze bam de lei.

⁴¹Aigum ze tingkum ’ngkai ning dage I bam de lei; ning na ’mpuimi hangna hanggene tingkum kereu ze medai ning guâ ’nggua zai ning gu kauruidung hanggene tingkum seruk bam gai de lei; zai I tâtewgaibe hî ramme nang ne lua kereu tewkeli ’ndi de lei.

⁴²A peu Rapeu, Abrahambe Rapeu zai Isaakbe gu ’nnamgaibe a dage bam mak nung laîzai â, a barua ze nang achu langpat kai sing leu gu de lei. Hera ne I kahereube liebe benai a ba ne tâtewhereugaibe ngau di de lei, zai ’nzimai tingmuî ge ningchu ’ngngiam bei de lei,” kacheu de lei.

⁴³Chidadege Labanbe ne kak ze Jakobbe je, “’Mpuimi ramme ze a na ’mpuimi ramme da, kauruidung ze a gu kauruidung da, zai napoine ramme ze a gu napoine ramme da, zai nang ngaube ramme leine ze du a gu de lei. Kane nemai ge ai a na ’mpuimi ramme, zai penui ne lunkeugaibe na ramme je ’ndaikau I tewgaichi dui lau?

⁴⁴Kei samhatbe tew gai kei lei; zai chize ne nang benai anai kakge peize sakki chang ra de lei,” ze kacheu de lei.

⁴⁵Chidadege Jakobbe ne tingchukâng tei lu, chibamrabe hangge sum gai de lei.

⁴⁶Zai Jakobbe ne pe sikiname je, “Tingchu ramme kua’ndui gai lau” ze acheu bei de lei. Zai penui ne tingchu ramme teiwang lu kua gai bei de lei; zai chi tingchu kuagaibe tum gene penui mâ-teu de lei.

⁴⁷Chi je Labanbe ne, Jegar-sahadutha ze ku de lei: kane Jakobbe ne Galeed ze ku lei.

⁴⁸Labanbe ne, “Nemai ge nang benai anai kakge ai tingchukâng zene sakki chang de lei,” ze kacheu de lei. Chipauziegene chi je, pe ji Galeed benai Mizpa ze pa ne ’ntak kai de lei,

⁴⁹zai pa ne acheu sa ze, “Nang benai anai kakge anai kat-kat dagene bamchâm ze bambe luage peize Tingwang ne reî ze bam lau.

⁵⁰A na ’mpuimi ramme je nang tewkahereu mei nune a na ’mpuimi ramme bambe peireige kêdabe kau ramme je du ning nâu hang lu mei dizai â mî de anai dage ga sedu nang benai anai kakge Hera ne sakkitewbe chî le lau,” ze kacheu de lei.

⁵¹Zai Labanbe ne Jakobbe je, “Aipau tingchukoa benai tingchusum nang benai anai kakge I kai’ndibe pie le lau.

⁵²Aipau tingchukoa zene sakki de lei, zai aipau tingchusum zene du sakki de lei, kat-kat je tew’nsiarabe hanggene ning tailam aipau tingchukoa ze I tat’ngkapat mak ra zai nang du aipau tingchukoa benai tingchusum gene a tailam tat’ngkapat mak ra hangge zeu.

⁵³Abrahambe Rapeu zai Nahorbe Rapeu, penui peume Rapeu zene peize anai kakge samram lau” ze kacheu de lei. Chidadege Jakobbe ne pe peu Isaakbe kakellumbe Rapeu ji gene deseu gai de lei,

⁵⁴zai peloa’ntûm ge Jakobbe herâtew gai de lei, zai pe sikiname je tak (tingku) teu ra kû gai de lei; zai penui tak (tingku) teu gai lu chipau deiloa’ntûm ge kâujei gai di de lei.

⁵⁵Hechuasûn ’mpuimi kena je keput kai lu, pe chame benai pe na ’mpuimi kena je keput kai lu ze penui je ’nnam gai de lei; chidadege â pa rimnatat ze pe ki lam helatwang dai di de lei.