Read Zeme Naga JENESIS 33 Bible Online

JENESIS 33 - Zeme Naga bible

JENESIS 33

¹Zai Jakobbe pe mik rakpat ze pie gai de lei, zai ni, Esaube wang leu de lei, ziemmena haî medai je ngua lu zeu. Chidadege pa ne Leale benai Rakelle zai ka’ngguapui kena dage napoine ramme je ’nzichâm gai de lei.

²Zai ka’ngguapui hangna ne penai name je ngua lu raîtat ra pa ne kai de lei, chipau chângge Leale benai pe name tat, zai chipau chângge Rakelle zai pahekapbe ge Josepbe ne tat ra kai de lei.

³Pa ne penui suage tatraî lu, pe sipeu taige wangchang mak tâne lua sena kedei ge kei’ngkumkeu ze, kellum ze wang de lei.

⁴Kane pechu hedau ra Esaube ne pakwang leu de lei, zai pechu pam gai lu pe guang tui ze kakeput te lei, zai penai hap kai di de lei.

⁵Zai Esaube pe ma ’ngngangrakchu gai lu ’mpuimi ramme benai napoine ramme je ngau lu dege pa ne, “Aime ning dage bamme ze chaume lau?” kacheu de lei. Jakobbe ne, “Ning guâ ka’ngguapeu je Hera ne ka’nggiabe gene peibeibe name de lei,” kacheu de lei.

⁶Chidadege ka’ngguapui kena penai name je ngua lu wang’nna lu ze kei’ngkumkeu gai de lei;

⁷Leale du chigum ze pe name je ngua lu wang’nna ze kei’ngkumkeu gai de lei, zai nâlangbe ge Josepbe benai Rakelle wang’nna lu, penai kei’ngkumkeu gai de lei.

⁸Esaube ne, “Aime bau, I kahedaume bau ze ’ndaikau rimba rei lau?” kacheu de lei. Jakobbe ne kak ze, “A pau mikngau ge hesuiyibe ngau le ra hanggene lei,” acheu bei de lei.

⁹Kane Esaube ne, “A dage misongga ze la de lei, a kinapeu gau, ning gu kebambe ze â ning hangge kai le lau,” ze kacheu de lei.

¹⁰Jakobbe ne, “Mak lei, I ningchu kiam lei, ning mikngau ge hesuiyibe a peireige la lei dizai â a gu kela a ba gene nang lu gai ra lei; pelingsing ze ning ju ngaube ze Hera ju I ngaube gum lei, chigumbe ka’nggiabe gene nang achu lu gai de lei.

¹¹A gu kela ning dage teiwangbe lu gai lau, I ningchu kiam lei, Hera ne achu ngau’nggia gai bei, zai misongga ze ngau lu daseu,” ze kacheu de lei. Aigum ze pa ne pechu kiam de lei, zai pa lu gai de lei.

¹²Chidadege Esaube ne, “Anai ’mpuî ge tebeîtew-’nduâtat kei lei, zai I ne ning suage tat ku lei,” ze kacheu de lei.

¹³Kane Jakobbe ne pechu, “Napoine ramme â ka’nnube kau lei be ning pau ne chî lei, zai kaurui benai getum ramme tungbe poine ramme je I teleu ra chang lei; zai mai kat penui tatlei-’nggaka gai dizai â kaurui ramme leine chai kam gu de lei.

¹⁴Peize a pau â pe guâ ka’ngguapeu sua â tat’ntuaraî de zu lau, zai a suage bambe kaurui ramme detat-tak luî gene benai napoine ramme je ’nduî ze a pau dage Seir ge wangchang mak tâne kuai nan ze ’nduîtat ra de lei,” ze rang gai bei de lei.

¹⁵Esaube ne, “A dage bamme hanggesame je ning dage I sâudiak kai be che lei,” kacheu de lei. Kane pa ne, “’Ndaikau ka’nnangbe la lau? A pau mikngau ge pe suiyibe peize I ngau lau,” kacheu de lei.

¹⁶Dadege chipau mai ge Esaube â Seir ’mbe helatwang dai di de lei.

¹⁷Kane Jakobbe â Sukkoth ’mbe tebeîtewtat te lei, zai pe ki hang tew gai lu, zai pe gu kaurui hangge hetiamki ramme tew gai de lei; chipauziegene chipau bâm ji Sukkoth ze ku de lei.

¹⁸Zai Paddan-aram gene tebeîtewmiebe luage Kanaanram ge bambe namdi Shekem ge Jakobbe yize wangchang de lei; zai namdi suage pe ki liâm gai lu bam de lei.

¹⁹Zai pa hetiampaîki liâmgaibe kedei ze Shekembe peu, Hamorbe name dagene rangkâng haî kat ne lui de lei.

²⁰Chige herâtewbe bâm kuachu gai lu, chi je pe ji El-Elohe-Israel ze kû gai de lei.