Read Zeme Naga JENESIS 35 Bible Online

JENESIS 35 - Zeme Naga bible

JENESIS 35

¹Jakobbe je Hera ne, “Zuachu ze Bethel ’mbe hang zu lau, zai chige ’nnai gai lau; zai ning sipeu Esaube dagene nang pakbe ting ge ning dage liâbe Rapeu hangge herâtewbe-kaira tew gai lau,” ze rang gai de lei.

²Chidadege Jakobbe ne pe kiduîme benai pe dage nguabamme leine je, “Ningnui dage hesangme rapeu ramme bambe leine tei’mbia kam ne zu lau, zai ningnui je tew’nchi lu zai ningnui puâ helei le zu lau;

³dezai chu ze Bethel ’mbe hang zu kei lei, chidezai I a duânggabe lua a kuâ kakpeu, zai I tatkaibe bâm leine ge achu nguabampeu Hera dage chige I herâtewbe bâm tew gai le ra hangge zeu,” ze kacheu de lei.

⁴Chidadege Jakobbe dage penui ne hesangme rapeu ramme penui dage bambe zai penui kuncheigua penui ka’nnîbe ramme pei gai bei de lei; zai chiramme ze Jakobbe ne Shekem taige bambe ’mpubang kangge bai gai ’ndi de lei.

⁵Penui tebeîtew’nduâtatbe luage Hera dagene penui je tumguâ ze bambe namdi ramme peireige kehingbe wangkeu gai de lei, chipauziegene Jakobbe name je penui gua’nchu mak te lei.

⁶Zai Kanaanram lungge bambe Luz (chize Bethel) ge Jakobbe wang de lei, pa benai pe dage bamme leine je ngua lu zeu;

⁷zai chige herâtewbe-kaira pa ne tew gai de lei, zai chipau bâm ji, El-bethel ’ntak kai de lei, pe sipeu dagene pa pakbe ting ge chige Hera ne pechu liâbeibe ziegeneu.

⁸Zai Rebekale guâ ka’ngguapui Deborale chai di de lei, zai Bethel ’ngkangge ’mpubangpî ge pechu bai gai de lei; chipauziegene chipau bâm ji â Allon-bakuth ze ku lei. (Chize hapbe ’mpubang)

⁹Paddan-aram gene pa helatwang dai dege Jakobbe je Hera ne liâ kadai de lei, zai pechu ’nnam gai bei de lei.

¹⁰Zai Hera ne pechu, “Ning ji Jakobbe lei, ning ji Jakobbe ze kû dai ra mak lei, kane Israelbe ze ning ji hang de lei,” ze rang gai de lei.

¹¹Zai pechu Hera ne rang gai ze, “I â Hera Reziechipeu lei; heluî hing ze sa ze bam zu lau; heram zat kat benai heram zat misongga ze ning dagene pat ku lei, zai heguangme ramme ning dagene putchu gu lei.

¹²Abrahambe benai Isaakbe je I peigai’ndibe ramme ze ningchu I pei gai gu lei, zai ningchu lungleîme ning chaname hangge heram I pei gu lei,” kacheu de lei.

¹³Chidadege pechu ’mpau ze bambe bâm gene Hera â pe dagene chu di de lei.

¹⁴Zai pechu ’mpaugaibe bâm ge Jakobbe ne tingchusum teichu gai de lei; zai pa ne chige sakbe kela ruîpat kai ze chige taudui ruî gai de lei.

¹⁵Chidadege pechu Hera ne ’mpaugaibe bâm ji ze Jakobbe ne Bethel ze ’ntak kai de lei.

¹⁶Chidadege Bethel gene penui tebeîtew-’nduâtat dai di de lei; zai Ephrath wangchang ra kenakge â bambe luage Rakelle ’nra’nsua chu di de lei, zai pa pa’nna hung-kadesang de lei.

¹⁷Zai pa teukeri ran-desanggaibe luage, puakahenapui ne pechu, “Hing se lau, ning na hang ’mpeumi napoine lungkeu dai mui de lei,” kacheu de lei.

¹⁸Zai pa keringbe rimnagaibe luage, (pa chai di dadege) pa ne pe ji hang Benoni, ze ’ntak kai de lei; kane pe peu ne pe ji hang Benjamin, ze ’ntak kai de lei.

¹⁹Zai Rakelle â chai di de lei, zai pechu ze Ephrath (chize Bethlehem) tatbe ’mpuî ge bai gai de lei,

²⁰zai pe raw peireige Jakobbe ne tingchusum teichu gai de lei, chize chuna ting riâ chang ze bambe ze Rakelle gu heraw chusum de lei.

²¹Israelbe tebeîtew-’nduâtat dai di de lei, zai Eder heki hube je teidabe giam ’mbe pe gu paîki liâm gai de lei.

²²Chipau dei ge Israelbe bambe ting ge Reubenbe ne pe peu gu nausîpui Bilhale dage tat ze jei gai ’ndi de lei; zai chize Israelbe seu di de lei. Jakobbe name ’mpeumi hangkereu ze kena bam de lei.

²³Leale name ’mpeumi â: Reubenbe (Jakobbe na meraibe), Simeonbe, Lebibe, Judabe, Issakarbe, zai Zebulunbe lei.

²⁴Rakelle na ’mpeumi ramme ze: Josepbe benai Benjaminbe lei.

²⁵Rakelle guâ ka’ngguapui Bilhale na ’mpeumi ramme ze: Danbe benai Naphtalibe lei.

²⁶Leale guâ ka’ngguapui Zilpale na ’mpeumi ramme ze: Gadbe benai Asherbe lei. Aime bau ze Paddan-aram ge bambe ting ge Jakobbe name lungkeugaime bau de lei.

²⁷Zai Abrahambe benai Isaakbe bamgaibe bâm Mamre, makchai Kiriath-arba kacheube bâm (chize Hebron) ge Jakobbe pe peu Isaakbe dage wang de lei.

²⁸Chunage Isaakbe tingkum â kum haî kat ze riakdesat ti de lei.

²⁹Zai Isaakbe chîng ze beting chang di ze pe chuilu sau gai di de lei; zai pa chai di de lei, zai pe paume ruage bai gai de lei. Zai pe na hangna Esaube benai Jakobbe ne pechu bai gai de lei.