Read Zeme Naga JENESIS 39 Bible Online

JENESIS 39 - Zeme Naga bible

JENESIS 39

¹Chunage Josepbe je â Ijipram ’mbe nguakeu gai ’ndi de lei, zai Ijip’mpeu Potipharbe, Pharaobe gu baiza’mpeu hekêtkaime ruage besuitewpeu ne pechu chige teikeume Ishmaelme dagene lui ’ndi de lei.

²Josepbe dage Tingwang bam de lei, zai pa â pezeulungbe ziemmena chang di de lei; zai pa â pe pau Ijip’mpeu ki ge bam de lei,

³zai pe dage Tingwang bam de lei be zai pa tâtewgaibe leine ge pung-ze-sabe pe ba gene pat te lei be pe pau ne chî di de lei.

⁴Chipauziegene pe pau mikngau ge hesuiyibe Josepbe ngau lu ze pe guâ ’nggua ze bam de lei, zai pa ne pechu pe ki benai pe heu leine peireige besuitewpeu hangge kai bei de lei.

⁵Pe ki ge benai pe heu leine peireige besuitew ra pa ne pechu peigaibe gene seuze Tingwang ne Josepbe ziegene Ijip’mpeu ki peireige ’nnam gai bei de lei; pe gu kebambe leine, kilûng ge benai helu ge bambe leine peireige Tingwang ’nnam ngau de lei.

⁶Chidadege pe gu kebambe leine ze Josepbe ba ge pa ne rezie pei gai bei de lei; zai pechu nguabambe ziegene pa â pa tak teurabe hang runne zangno mâ de ’nninghereu ra ga di de lei. Josepbe â pe pumsakyi zai rehangyi lei.

⁷Zai mâtiege mak ze Josepbe je pe pau nâu ne ngau’mmi di de lei, zai acheu sa ze, “A dage jei gai lau,” ze kacheu de lei.

⁸Zai pa ne lun mak, zai pe pau nâu dage acheu sa ze, “Pie le lau, I bambe ziegene a pau â kilûngkang ge mâ de ’nningkahereube ga zai pe gu mâgetaleine a ba ge kai kam gai de lei;

⁹aipau kilûng kangge â pa du I sua â di-bi sua me lei; a dagene pe hangge teichâmgaibe du mâ de ’ngga lei, ningchu runne zangno, nang â pe nâu dadegeu; chidaze ’ndaigum ze, aigum ze sia-kadesangbe tâ I tew, zai Hera mikngau ge hemui tâ tewgaichi ra lau?” kacheu de lei.

¹⁰Zai pechu pei ngua gai ra zai penai ngua bam ra patingnaigepat Josepbe je pa kiâm bam sede pa ne pe kuâ ’ngking gai mak tai de lei.

¹¹Kane mai kat â pa pe tâ tew ra kilûng ge gutbe lua zai kilûng ge ziemmena mî de gabe luage,

¹²pa ne pe paî gene herak lu acheu sa ze, “A dage jei gai lau,” kacheu de lei. Kane pe ba ge pe paî sâu gai nan ze, kilûng gene hela ’mbe pakpat ti de lei.

¹³Zai pe gu mechua ze pe ba ge sâu gai nan ze kilûng gene hela ’mbe paktat ti de lei be pa ngau lu dege â

¹⁴pe ki ge ziemmena bamme je pa ne kelau gai de lei, zai penui je pa ne acheu sa ze, “Ni, Hebrai’mpeu je anui ne mi ji tew’nsia gai ra anui ruage nguawang gai de lei; achu tew’nsia ra pa gut te lei, zai I ne a kuâ ’nrung’nchi-desang gai bei de lei;

¹⁵zai a kuâ’nrung-kagetiebe pa seu lu dege, a dage pe paî sâu gai nan ze pak ti, zai kilûng gene hela ’mbe pat ti de lei,” kacheu de lei.

¹⁶Josepbe pau kilûng ge wang gai mak tâne pe paî ze pa ne kaikua bam de lei.

¹⁷Zai pa ne pe napeu je du chipau rasam luî salia ze, “Anui ruage ge Hebrai’mpeu, mâ ka’ngguapeu nang ne teiwanggaipeu ne achu tew’nsia ra a dage zuagut te lei;

¹⁸kane I ne a kuâ’nrunggetie gai bei dege â a dage pe paî sâu gai nan ze kilûng gene hela ’mbe pak’mbiatat ti de lei,” ze kacheu de lei.

¹⁹“Aigum ze ning guâ ka’ngguapeu ne a peireige tâtew gai de lei,” ze pe nâu ne sabe pe pau seu lu dege pe lumpum-desang di de lei.

²⁰Zai Josepbe pau ne pechu nîm lu kebangki ge kai bei de lei, heguang gu kebangme je kaikanduibe bâm ge zeu; zai chi kebangki ge pa bam de lei.

²¹Kane Josepbe dage Tingwang bam zai hungka’ntipbe pechu teilia bei de lei, zai kebangki ge besuitewpeu mikngau ge ngau’nggiagairabe luilung bam ra pechu pei gai bei de lei.

²²Zai kebangki ge besuitewpeu ne kebangki ge bangbe kau ramme je Josepbe kereîbe kang gene bam kam ra pei gai bei de lei, zai chige ’ndaikau tew gai mei be ramme ze pa ne tewgaibe kam de lei;

²³Josepbe kereîbe kangge mâ-mâ bambe ramme peireige kebangki ge besuitewpeu ne mâ de ’nninghereu dai ra ga di de lei, pe dage Tingwang bambe ziegeneu; zai ’ndaikau pa ne tew gai mei be leine ge pung-ze-sabe bam ra Tingwang ne tew gai bei de lei.