Read Zeme Naga JENESIS 4 Bible Online

JENESIS 4 - Zeme Naga bible

JENESIS 4

¹Zai Adambe ne pe nâu Ebile je ngua gai bei de lei, zai Ebile ’mpung di de lei, zai Kainbe je lungkeu gai de lei, acheu sa ze, “Tingwang ne ’ngngâbeibe gene a na ’mpeumi ngau lu de lei,” kacheu de lei.

²Zai pe kinapeu Abelbe je du lungkeu gai kadai de lei. Zai Abelbe â melireîpeu lei, zai Kainbe â kedei tâ tew-teupeu de lei.

³Acheu hang dege, Tingwang dage herâtewbe pei gai ra Kainbe ne kedei gene pa kaipatlube rachî teiwang gai de lei,

⁴zai Abelbe ne pe gu melidung ruage ’nnakeuraibe pechâ yibe ramme teiwang gai de lei. Dadege Tingwang ne Abelbe benai pe gu herâtewbe kela peireige pe suiyi de lei,

⁵kane Kainbe benai pe gu kela je Tingwang ne ’nchâ mak te lei. Chidadege Kainbe pe lumpum di, zai pe masia di de lei.

⁶Tingwang ne Kainbe je, “’Ndaitew ze nang ning lumpum zai ning ma siarak ze bam lau?

⁷Nang tew’mmizun ze tew laîzai â, nang herâtewbe lu gai mak ta ra semei? Kane kesiabe tâ nang tewgaibe ziegene ning ki kemui hiage hemui ne ningchu lîmkuâ lamui de lei; pa ne ning peireige pe suitew nei la de lei, kane pechu nang duî himchang ra lei,” ze acheu bei de lei.

⁸Kainbe ne pe kinapeu Abelbe je, “Anai helu ’mbe tat ra kei lei,” ze kacheu de lei. Zai penai helu ge bambe luage Kainbe ne pe kinapeu Abelbe je timpheu ze tewchat ’ndi de lei.

⁹Chidadege Tingwang ne Kainbe je, “Ning kinapeu Abelbe ’ndaige la lau?” ze ka’nneu de lei. Kainbe ne, “I â chî me lei; I ze a kinapeu je reîpeu semei?” ze kak te lei.

¹⁰Zai Tingwang ne, “Nang ne ’ndaikau tâ tew gai bei lau? Kedei gene ning kinapeu jai kuâ ne achu ku de lei.

¹¹Chidaze ning ba gene ning kinapeu jai tewpatkaibe lu ra pe mui ’ngngapatbe kedei gene ningchu â deset kai ’nde lei.

¹²Kedei ge mâ-hîmra kai sede perachî ’nchikeu ra mak lei; nang â kedeirei ge pak’mbairua ze kezitruabe kau chang gu lei,” ze acheu bei de lei.

¹³Zai Kainbe ne Tingwang je, “Achu kesâbe peibe ze I pungtatlakbe put lei.

¹⁴Pie le lau, aipau bâm gene nemai ne nang ne achu kelituâ ’nde lei; zai ning ju I ngau dai ra mak te lei; zai kedeirei ge I â pak’mbiarua ze kezitruabe kau chang gu da, zai achu mi-mige ne ngaudaulube luage tewchat kai gu de lei,” ze kacheu de lei.

¹⁵Chidadege Tingwang ne pechu, “Acheu me lei! Mi-mige ne Kainbe je tewchat tizai â pe peireige dêt sena hekûm lu gu lei,” ze acheu bei de lei. Zai mige tatkahedaume ne tewchat mak ra Tingwang ne Kainbe peireige ka’nchetbe pei gai bei de lei.

¹⁶Chidadege Tingwang dagene Kainbe tatchâmpat lu Eden gene naimikpat ’mbia Nodram ge lung di de lei.

¹⁷Kainbe pe nâu je ngua gai de lei, zai pe nâu ’mpungpat ze Enokbe je lungkeu gai de lei; zai Kainbe ne namdi tew gai de lei, zai chipau namdi ji hangge pa ne pe na ji gene ’ntak kai ze Enok ze kû gai lei.

¹⁸Enokbe dagene Iradbe je lungkeu de lei; zai Iradbe dagene Mehujaelbe je lungkeu, zai Mehujaelbe dagene Me-thusha-elbe je lungkeu zai Methushaelbe dagene Lamekbe je lungkeu de lei.

¹⁹Lamekbe pe nâu kena ku de lei; hangkatpui ji â Adale lei, zai kêdabepui ji â Zillale de lei.

²⁰Adale ne Jabalbe je lungkeu de lei; pa â hetiamki ge bam ze kaurui ’ngkut ze bamme peu de lei.

²¹Pe kinapeu ji â Jubabe de lei; pa â ’nragetbe benai metiam ’mmutchime leine peu de lei.

²²Zillale ne Tubal-kainbe je lungkeu de lei; pa â hetageî benai hegeî ne merua ramme kahekipeu de lei. Tubal-kainbe kinapui ji â Naamale de lei.

²³Lamekbe ne pe nâu kena je: “Adale benai Zillale gau, a kuâ seu le lau; Lamekbe nâu kena gau, I sabe kuâ seu gai lau: Achu tewhejambeibe ziegene I ne ziemmena je gî ’ndi de lei, achu bêubeibe ziegene rehang’mpeu je I ne gî ’nde lei.

²⁴Kainbe je gîme je dêt sena hekûm lu dizai â Lamekbe je gîme je dêt riaksena ze sena hekûm lu gai gu lei,” ze kacheu de lei.

²⁵Zai Adambe pe nâu je ngua gai kadai de lei, zai pe na lungkeu ze pe ji hang Sethbe ze ’ntak kai de lei, Ebile ne, “Kainbe ne Abelbe je gî’ndibe gene pe kelei hangge Hera ne a na hang pei gai kadai de lei,” ze kacheube ziegeneu.

²⁶Sethbe du pe na lungkeu de lei, zai pe na ji hangge pa ne Enosbe ze ’ntak kai de lei. Chipauting ge ziemmename Tingwang ji kû ze kellum chu di de lei.