Read Zeme Naga JENESIS 40 Bible Online

JENESIS 40 - Zeme Naga bible

JENESIS 40

¹Bechâng dege Ijip gu heguang je wain ka’ngguapeu benai pe gu tingku langpeu ne penui pau Ijip gu heguang ’nning makbe tew gai ’ndi de lei.

²Zai Pharaobe ne pe guâ ka’ngguame hangna wain ka’ngguabe ge besuitewpeu benai tingkulangbe ge besuitewpeu peireige pe râta di de lei,

³zai hekêtkaime ruage besuitewpeu ki ge reîka’nduibe bâm, Josepbe je bangbe kebangki ge pa ne penai je kai ’ndi de lei.

⁴Kebangki kereîbe ge besuitewpeu ne Josepbe ne peize penai je nguabamherua ra kai bei de lei, zai pa ne penai guâ ’nggua ze bam de lei; zai kebangki ge penui beting tiesang ze bam gai de lei.

⁵Zai tingmuî kat â penai hangna hemang ka’mmi de lei, kebangki ge bambe hangna Ijipram heguangpeu gu wain ka’ngguapeu benai tingkulangpeu penai mang mang ’mmichâm ze, zai hangna mang rimba du châm ze penai mang ka’mmi de lei.

⁶Josepbe hechua ge wang lu penai je ngau lu dege penai suikahereube ngau di de lei.

⁷Chidadege Pharaobe guâ ka’ngguame hangna penai pau ki ge nguabang’mpam gai ze bambe kena dage ’nneu ze, “’Ndaitew ze ningnai desungra ze bam lau?” acheu bei de lei.

⁸Penai ne pechu kak ze, “Anai hemang ka’mmi de lei, zai chize sakelirabe kau mî de ga lei,” kacheu de lei. Zai Josepbe ne penai je, “Sakelirabe ze â Hera gu mak semei? Chiramme achu salia be ra ningnai dage I kie de lei,” acheu bei de lei.

⁹Chidadege wain ka’ngguabe ge besuitewpeu ne Josepbe je pe mang salia ze, “A mang gene a suage grepchî hiâm laleu de lei,

¹⁰zai pehiâm ge grepchî keî kechum bam de lei; pengûmne tumpat gap dege bepâ du papat ti de lei; zai pehût ramme ge grepchî ramme mei di de lei.

¹¹Pharaobe piak ze a ba ge laleu de lei, zai I ne grepchî ramme tei lu, Pharaobe piak ge pedui getui gai de lei, zai hepiak ze Pharaobe ba ge bala gai bei de lei,” ze kacheu de lei.

¹²Chidadege Josepbe ne pechu, “Chi sakakelibe ze â aize de lei: bekeî kechum ze â hezie kechum de lei;

¹³hezie kechum lungge Pharaobe ne ning peî teichu gai dai gu zai ning tâbâm luî ge ningchu kai dai gu lei, besua’ngka ge pe gu hezau ka’ngguapeu nang changbe ting ge gum ze Pharaobe ba ge nang ne pe piak ze bala bam gu lei.

¹⁴Kane ning hangge keyibe ngau dai dezai, achu ’ngngaî se lau, zai Pharaobe je a rasam salia ra zai aipau ki gene achu lupat kai ra a hangge mâ-keyibe tew gai ra ningchu I kiam lei.

¹⁵Hebraime ram gene achu â hegatat ti sing daseu; zai aige du kebangki ge achu penui kairabe hangge mâ de I tewmaube ga lei,” ze kacheu de lei.

¹⁶Sakakelibe ze ’nzei de lei be tingkulangbe ge besuitewpeu chî lu dege Josepbe je pa ne, “I du hemang ka’mmi de lei: chige tingku kuak kaibe ’ntui kechum a peî ge sing gai ze bam de lei,

¹⁷zai ’nreilangbe ’ntui ge Pharaobe hangge langlube tingku zat leine bam de lei, kane a peî ge ’ntui bambe gene ’nruine ramme ne chize teu kam ’ndi de lei,” ze kacheu de lei.

¹⁸Zai Josepbe ne kak ze, “Chize sakakelibe â aize de lei: ’ntui kechum ze hezie kechum de lei;

¹⁹hezie kechumne lungge Pharaobe ne ning peî ning dagene teichu gai gu, zai hingbang ge ningchu keî’nchie gai gu, zai ning pumji ze ’nruine ramme ne teu gu lei,” ze acheu bei de lei.

²⁰Pakechumbe mai, Pharaobe je lungbe mai ge, pe guâ ka’ngguame leine hangge luube-teseu pa ne teleu gai de lei, zai pe guâ ka’ngguame ruage pechu hezau ka’ngguabe ge, besuitewpeu benai tingku langbe ge besuitewpeu peî ze pa ne teigetuachu gai de lei.

²¹Pa ne wain ka’ngguabe ge besuitewpeu je pe tâbâm luî ge kai dai bei, zai pa ne hepiak ze Pharaobe ba ge kai de lei;

²²kane Josepbe ne penai je saliabe luigum ze, pa ne tingkulangbe ge besuitewpeu je â kakchat ’ndi de lei.

²³Acheusede tingkulangbe ge besuitewpeu â Josepbe ji chî mak te lei, kane pechu ’ngngaî ’ndi de lei.