Read Zeme Naga JENESIS 41 Bible Online

JENESIS 41 - Zeme Naga bible

JENESIS 41

¹Kum na bamtuipik kailube châng dege, Pharaobe pe mang gene Nail geukung ge pa sapbambe ka’mmi de lei,

²zai ni, Nail geuki gene getum peleuyibe zai chabe kau sena zuapat te lei, zai hekuzeu ge penui deteu ze bam de lei.

³Zai ni, getum kêdabe sena perâsia zai hepînrinbe kau Nail geuki gene penui chai suipat kadai de lei, zai Nail geukung ge kêdabe ramme hiage penui sapbam de lei.

⁴Zai perâsia ze hepînrinbe kau getum ramme ne getum sena peleuyi zai chabe kau ramme je teu kam ’ndi de lei, chidadege â Pharaobe ’nrakhakchu di de lei.

⁵Zai pa jeikeu gai dai dege, pakenabe mang ’mmi kadai de lei; zai ni, hemeu bang kat gene hemeubuî buî sena ’nggangting zai zâuzua bambe patbe ngau de lei.

⁶Zai ni, penui chângge buî sena rârin (perielup) zai naimikpat ’mbia gu tingkai ne tewlairiâm’ndibe kau puakpat kadai de lei.

⁷Zai perâsiabe hemeubuî ramme zene hemeubuî ’nggangting zai zâuzuabe ramme je ’nzuakeu kam ’ndi de lei. Zai Pharaobe ’nrakhakchu di de lei, zai pie le lau, chize pe mang gelêu tai de lei.

⁸Dadege hechua dege pe lung hereu-desang di de lei, zai Ijipram ge heduaîtewchime benai pe gu ziemmena chikâ’ndingme leine dage ziemmena lang gai ze kûwang gai de lei; zai Pharaobe ne penui je pe mang salia bei de lei, kane Pharaobe dage chize sakeliduibe kau mî de ga de lei.

⁹Chidadege wain ka’ngguabe ge besuitewpeu ne Pharaobe je, “Nemai ne a mâu I ’nningdau de lei.

¹⁰Pharaobe ne pe guâ ka’ngguame peireige pe râtabe luage zai I benai tingkulangbe ge besuitewpeu je hekêtkaime gu besuitewpeu ki ge banggaibe ting ge,

¹¹pa benai I tingmuî kat gene anai mang’mmi ka’nsam de lei, mi mang mang ’mmichâmperiu ze, zai parimba du châm ze ka’mmi de lei.

¹²Hekêtkaime gu besuitewpeu guâ ka’ngguapeu Hebraime rehang’mpeu chige anui dage ngua bam de lei; zai anai ne salia gai bei dege pa ne anai mang anai je parimba gechâm-châmbe luigum ze sakeli gai bei de lei.

¹³Zai pa ne sakeligaibe luigum ze chize wangchang de lei; achu â a tâ luî tew dai ra kai bei, zai tingkulangpeu je â kakchat ’ndi de lei,” ze acheu bei de lei.

¹⁴Chidadege Pharaobe ne lang gai bei ze Josepbe je kû gai de lei, zai penui ne kelua ze kebangki gene pechu nguapat kai de lei; zai pa pe biagêu gut zun lu, pe puâ helei gai lu dege, Pharaobe suage gut te lei.

¹⁵Zai Pharaobe ne Josepbe je, “I hemang ka’mmi de lei, zai chize sakeliduibe kau mî de ga de lei; hemang seu lu dezai nang â sakeli’nchi-chi duî lei be ning rasam I seu de lei,” ze kacheu de lei.

¹⁶Josepbe ne Pharaobe je kak ze, “Chize a dagene mak lei; Hera ne Pharaobe je sakeli’mmizun gai gu lei,” kacheu de lei.

¹⁷Chidadege Josepbe je Pharaobe ne sa ze, “Ni, a mang gene Nail geukung ge I sapbam de lei;

¹⁸zai getum sena chabe kau, zai peleuyibe kau Nail geuki gene pat lu hekuzeu ge deteu ze bam de lei;

¹⁹zai Ijipram dei luî ge mâdau de I ngaumakbe kau, pejiesiarei zai perâsia ze hepînrinbe kau getum kêdabe sena chipau chaige suipat kadai de lei.

²⁰Zai perâsia ze hepînrinbe getum ramme ne peleuyibe getum sena je teu kam ’ndi de lei,

²¹kane penui ne peleuyibe sena je teu lu sede penui ne teu lu de lei be mî de chî lak ra chang di de lei, penui â besua’ngka ge gum ze penui râ siarin ze bam rei daseu. Chidadege I ’nrakchu di de lei.

²²Hemeubuî sena chêu ne puigit zai yi-desang ze bang kat ge bambe du I a mang gene ngau de lei;

²³zai tingbia ’mbia gu tingkai ne tewlai ’ndi zai hepînrin (perielup) ze chaiwangdibe hemeubuî sena ze penui chaige puakpat kadai de lei,

²⁴zai hemeubuî perâsiabe sena zene hemeubuî yibe sena je ’nzuakeu kam ’ndi de lei. Zai heduaî chime je I salia gai de lei, kane chize a suage sakelichiduibe kau mî de ga de lei,” kacheu de lei.

²⁵Chidadege Josepbe ne Pharaobe je, “Pharaobe mang ze â kat te lei; Hera ne pa ’ndaikau tew gai ra tew mei be Pharaobe dage teilia de lei.

²⁶Getum peleuyibe sena ze â kum sena ze da, zai hemeubuî sena pebuî yibe ze kum sena de lei; hemang ka’mmibe rimba ze â kat te lei.

²⁷Pe chaige rikeriângbe benai perâsiabe getum sena patkadaibe â kum sena ze de lei, zai tingbia ’mbia gu tingkai ne tewlai’ndibe hemeubuî perua sena ze du kum sena herakûm wangrabe ze de lei.

²⁸Pharaobe je I saliagai’ndibe luigum ze pa ’ndaikau tâ tew gai ra tew mei be Hera ne Pharaobe je teilia de lei.

²⁹Ijipram dei luî ge kum sena teu ra kie-kadesangbe wangchang gu lei,

³⁰kane chi kum sena chângge â kum sena herakûm chu gu lei, zai teu ra misongga ngaube ze â Ijipram dei luî ge ’ngngaî kam ’ndu de lei,

³¹zai herakûm pe chai suihangdairabe ziegene misonggabe bambe ramme ze â heram ge chî dai ra mak lei, chidezai â hereu-desang gai gu daseu.

³²Zai Pharaobe mang ’mmikapelitbe ze â chize Hera ne riagai’ndibe kau, zai mâtiege makse chize wangchang ra Hera ne tew gai gu de lei, kacheube rimba de lei.

³³“Chunage, chidaze, mâ-ka’ntîngbe kau benai ziemmena kaningchingbe kau je peize Pharaobe ne kelâng le lau, zai peize Ijipram dei luî ge besuitew ra pei gai be lau.

³⁴Heram peireige besuitew ze reîrabe kau ramme je peize Pharaobe ne ling gai zu lau, zai kum sena teu ra kiebe kum lungge Ijipram dei lungge teu ra ngaube leine gene bak mengeu peize lupat kai le lau.

³⁵Zai teu ra kiebe tingkum ramme wangbe gene peize penui ne tak gekua gai le lau, zai Pharaobe gu rezie kang gene peize namdi ramme ge chêu kaigekua gai le lau, zai penui ne peize reî le lau.

³⁶Chipau hetak ze â Ijipram ge kum sena herakûm wangchangrabe hangge reîgaibe chang ra de lei, chidezai herakûm gene heram ze ga gai mak ra hangge zeu,” ze kacheu de lei.

³⁷Aipau tâ ranggaibe ze Pharaobe benai pe guâ ka’ngguame leine dage ’nning’nzei gai de lei.

³⁸Zai Pharaobe ne pe guâ ka’ngguame je, “Aipau peu gumbe, pe dage Hera gu Herui bambe kau ziemmena je anui peu dui de lau?” kacheu de lei.

³⁹Chidadege Josepbe je Pharaobe ne, “Hera ne ningchu airamme leine teilia bei daze ning sua mâ-kâ’ntîng kau, zai kaningchingbe kau mî de ga de lei;

⁴⁰a ki peireige nang ne besuitewpeu chang ra de lei; zai nang ne samdiegaibe luigum ze a gu ziemmena leine je peize samram ra de lei; heguang-bamrâ deu ge runne ning sua I ne di-bi ra de lei,” kacheu de lei.

⁴¹Zai Pharaobe ne Josepbe je, “Pie le lau, Ijipram dei leine peireige I ne ningchu rezie pei gai de lei,” ze kacheu de lei.

⁴²Chidadege Pharaobe ne pe gu baroine pe ba gene lupat lu ze Josepbe ba ge ’nta gai bei de lei, zai banutpaî yibe pechu luak kai lu, zai gechâkteuria pe guang ge ’nteu gai bei de lei;

⁴³zai pa ne pechu pe gu hekuntimriang pakenabe ge chua ra tew gai bei de lei; zai penui ne pechu rang ze, “Kukdungkêu lau,” ze ka’nrung de lei. Chigum ze pa ne Ijipram dei luî ge besuitew ra rezie pei gai bei de lei.

⁴⁴Chipau peireige du Pharaobe ne Josepbe je, “I ze Pharaobe de lei, zai ning suî ’nneu mak ze Ijip dei lung luî ge pe ba mei nune pe pî mei ze huachugaichi lak lei,” ze kacheu de lei.

⁴⁵Zai Pharaobe ne Josepbe ji Zaphenath Panea ze ’ntak kai de lei; zai pa ne On gu tingkupeu Potipherabe na Asenathle je pe nâu hang pei bei de lei. Chidadege â Josepbe Ijipram dei ge tatruapat ti de lei.

⁴⁶Ijipram gu heguang, Pharaobe guâ ka’ngguabe tâ tewbe ting ge Josepbe â tingkum himreu di de lei.

⁴⁷Tingkum sena teu ra misongga bambe kum ge kedei rachî misongga ze ngau de lei,

⁴⁸zai Ijipram lungge teu ra kiebe tingkum sena gu hetak ngaube leine pa ne tei’ndui gai lu namdi ramme ge kaigekua gai de lei; namdi ’nsangne ge penui je bamguabe helu ramme gene teiwang ze kaigekua gai de lei.

⁴⁹Sungkling gu hegitmoîne periâ ’ndeu kam lak sâugai’ndibe kie ze Josepbe ne chêu misongga ze gekuating gai ’ndi de lei.

⁵⁰Herakûm wangrabe suabe kum ge On gu tingkupeu Potipherabe na Asenathle ne pe dage lungkeugaibe Josepbe na ’mpeumi hangna bam di de lei.

⁵¹Meraibe ji hangge Josepbe ne Manassebe ze ’ntak kai de lei, pa ne, “I kahereube liebe leine benai a peu ki gu leine ’ngngaî gai ’nde ra Hera ne a hangge tew gai bei daseu,” ze kacheube ziegeneu.

⁵²Pakenabena ji pa ne Ephraimbe ze ’ntak kai de lei, “I kahereube liebe dei ge Hera ne heluîhing ze bam ra a hangge tew gai bei daseu,” acheu zeu.

⁵³Ijipram dei ge kum sena teu ra kie-desang ze bambe ze betun gai di de lei;

⁵⁴zai Josepbe ne ranggai’ndibe luigum ze kum sena herakûm wangrabe ze bepîbang chu di de lei. Kedei bâm leine ge herakûm wang di de lei; kane Ijipram ge â pebâm’nsangne ge teurabe hang â bam de lei.

⁵⁵Ijipram pebâm’nsangne ge teu ra gakeu di dege, Pharaobe dage ziemmena ramme ne penui hetak hangge kie de lei, zai Pharaobe ne Ijipme leine je, “Josepbe tailam tatchu lau; pa ne ningnui je kerang-rangbe tew lau,” ze acheu bei de lei.

⁵⁶Chigum ze herakûm ze pebâm’nsangne ge deîtau kam di dadege, Josepbe ne ’nseuki ramme latpat ze Ijipme dage zua gai de lei, Ijipram dei ge herakûm wangbe chi-kadesang dadegeu.

⁵⁷Chipau peireige du kedeirei leine ge herakûm chi-desangdibe ziegene kedeirei pebâm’nsangne gene Ijipram ’mbe Josepbe dage chêu lui ra hangge wang de lei.