Read Zeme Naga JENESIS 48 Bible Online

JENESIS 48 - Zeme Naga bible

JENESIS 48

¹Aipau châng dege Josepbe dage sam pauchang gai ze, “Pie le lau, ning peu ’nrâ la de lei,” kacheu de lei; chidadege pe na kena Manassebe benai Ephraimbe je ngua lu tat ti de lei.

²Zai Jakobbe dage du rangchang gai ze, “Ning na Josepbe wang mui de lei,” acheu bei de lei; chidadege Israelbe pe rankai ze jeî gene chu lu ka’ntau de lei.

³Zai Jakobbe ne Josepbe je, “Kanaanram ge Luz ge Reziechibe Hera ne achu liâ de lei, zai achu ’nnam gai de lei,

⁴zai achu acheu sa ze, ‘Pie le lau, I ne ningchu pung-ze-sa ze bam ra tew gai bu lei, zai I ne ningchu pezat kedibe hangge tew gai bu lei, zai betunmakbe heu hang bechâng ning chaname hang aipau heram ze I ne penui je pei gai gu lei,’ kacheu de lei.

⁵“Zai chuna ning na kena Ijipram ge I wangkeu makge ning dage Ijipram gene lungkeube kena ze â a gu de lei; Reubenbe benai Simeonbe gum ze Ephraimbe benai Manassebe â a hang chang ra de lei.

⁶Zai penui chângge ningnui chaname ningnui dage lungkeube ze â ningnui hang de lei. Penui ze â penui sikina’mpeumi ramme ziegene rehei ji teitat bam lei.

⁷Paddanram gene I wang dai dadege Kanaanram ge ’mpuîki gene Ephrath wangchangrabe suage I desui ze Rakelle chai gai di daseu; zai chige Ephrath (chize Bethlehem) gutbe ’mpuî ge pechu I bai gai ’ndi de lei,” kacheu de lei.

⁸Josepbe name je Israelbe ngau lu dege pa ne, sam rang gai dai ze, “Aize chaume lau?” kacheu de lei.

⁹Josepbe ne pe peu je, “Chime ze â aize Hera ne a hang peigaime a name de lei,” acheu bei de lei. Dadege pa ne, “Penai je a tailam nguawang ra ning dage I kie de lei, dezai penai je I ’nnam gai be ra hangge zeu,” kacheu de lei.

¹⁰Chunage Israelbe â chîngdibe ziegene pe mik kezin di de lei, chidadege pa ngauchi mak te lei. Dadege Josepbe ne penai je pe taihia ge nguawang gai bei de lei; zai pa ne penai je keput kai lu tuipua gai de lei.

¹¹Zai Israelbe ne Josepbe je, “I â ning ju ngau dai ra ’nnumtew ta di de lei; zai pie le lau, ning name je du I ngau dai ra Hera ne achu pei bei de lei,” kacheu de lei.

¹²Chidadege Josepbe ne penai je pe dagene tei’mbia gai lu, pe peî kedei ’mbe kei’ngkumkeu gai de lei.

¹³Josepbe ne penai hangna je ngua lu, Israelbe heku’mbia hangge Ephraimbe je pa heku’mbia ge kai lu, zai Israelbe hezat’mbia hangge Manassebe je pa heku’mbia ge kai lu ze penai je pe taihia ge nguawang gai bei de lei.

¹⁴Zai Israelbe pe ba kena getuatimchaipat kai lu ze pe ba hezat’mbia ba zene Ephraimbe, henabipeu peî ge ’ngking gai zai pe ba heku’mbia ba zene Manassebe, meraipeu peî ge ’ngking gai de lei.

¹⁵Zai pa ne Josepbe je ’nnam gai ze, “A peu Abrahambe benai Isaakbe ne kakellumbe Rapeu, nemai riâ chang ze a pum keringbe ting ge achu nguada ze bambe Rapeu,

¹⁶kesiabe leine gene achu ripatkaibe Angel’mpeu zene, peize ai ’mpeumi napoine hangna peireige ’nnam gai be lau; zai peize penai dage a ji, zai a peume Abrahambe benai Isaakbe ji ze betun mak ze teitat bam lau; zai peize kedeireime hang penai ne pezat, zai pebau kedime chang lau,” ze kacheu de lei.

¹⁷Pe peu ne Ephraimbe peireige pe ba hezat’mbia ba ’ngkinggaibeibe Josepbe ngau dege pe suiyi mak te lei; zai Ephraimbe peî gene tei’mbia lu ze Manassebe peî ge kai be ra hang pe peu ba pa ka’nzap te lei.

¹⁸Zai Josepbe ne pe peu je, “Acheu me lei, a peu gau; aipau peu ze meraipeu daze pe peireige nang hezat’mbia ba ze kai lau,” kacheu de lei.

¹⁹Kane pe peu ne lun mak te lei, zai acheu sa ze, “I chî lei, a na gau, I chî lei; pa du pezat kat chang gu lei, zai pezat kedibe chang gu lei; acheuleusede pe kinapeu ne pe sua â di-bi gu lei, zai pe chaname ze pebau kedibe ramme chang gu lei,” ze kacheu de lei.

²⁰Chigum ze pa ne penui je chipau mai ge ’nnam gai ze acheu sa ze, “Israelme ne ning ji tei ze ’nnam gai gu lei, ‘Ephraimbe benai Manassebe je gum Hera ne ningchu peize tew gai lau,’ ze acheu zeu” ze kacheu de lei; zai aigum ze pa ne Manassebe suage Ephraimbe je kai gai raî de lei.

²¹Dadege Israelbe ne Josepbe je, “Pie le lau, I â chai zi gu de lei, kane Hera ne ningnui dage bam gu lei, zai ningnui peume ram ge ningnui je nguawang gai dai gu lei.

²²Chipau peireige du Amorme ba gene kedeiloa ’ntûm kat a gu hiazutkie benai bai’mpi ne I sutlube ze ning sikiname je sâu ze ningchu I pei gai de lei,” ze kacheu de lei.