Read Zeme Naga JENESIS 49 Bible Online

JENESIS 49 - Zeme Naga bible

JENESIS 49

¹Chidadege Jakobbe ne pe name je kû’ndui lu acheu sa ze, “Wangrabe naimikpui ramme ge ningnui dage ’ndaikau wangchang ra mei be I salia gai ra hang ningnui ’nteumena wang’ndui gai zu lau.

²“Wang’ndui lu ’ngking gai lau Hei Jakobbe name gau, zai ningnui peu Israelbe kuâ ’ngking gai lau.

³Reubenbai, nang â a na meraipeu de lei, a gu reziechibe zai a ranchibe rachî raîlangbe lei, pengêudibe ge hulangbe zai rezie leine ge hulangbe kau lei.

⁴Hedui gum ze keleuliabe kau, nang â hulangbe kau chang ra mak lei, ning peu jeî ge nang keuchu gai ’ndi daseu; dadege chize nang ne tewhebâ ’ndi de lei, a jeî ge nang keuchu de lei!

⁵Simeonbe benai Lebibe â pe sikina de lei; penai gu hiazutkie â ’nggî-kahegeibe merua ramme lei.

⁶Hei a keringbe gau, penui mâ-ka’ndeibe ge tatgut kai se lau; Hei a lungka’nningbe gau, penui kiangna ge herua gai se lau; penui lumpumbe gene ziemmena je bichat, zai penui kadekumbe gene getumsei ramme je tewchoani gai lei.

⁷Penui lumpumbe ze deset kai be lau, chize â katingrak daseu; penui râtabe je du deset kai be lau, chize â katîmphi daseu! I ne Jakobbe ram ge penui je ’nzichâm kam gai gu, zai Israelbe ram ge penui je ’nrukrarip kai gu lei.

⁸Judabe gau, ning sikina ne ningchu toa gu lei; ning teureime guang ge ning ba bam gu lei; ning peu na ’mpeumi ramme ne ning suage kei’ngkumkeu gu lei.

⁹Judabe â duilui poine de lei; heteu dagene a na gau, nang â zuachu lu tat ti de lei. Pa keikeu de lei, duilui gum pa jeikakela de lei, zai duiluipui gum ze bam de lei; châuge ne pechu tew’ngkia gai kiâku ra lau?

¹⁰Judabe dagene langsiutui rimnatat ra mak lei, pe pî kena kakge du samrambe tui rimnatat ra mak lei, Shilo wang mak tâneu; zai ziemmena ne hekuâpheube pe dage wangchang gai gu lei.

¹¹Grepchî hiâm ge pe gu hekun poine keî gai, zai pe gu hekunmerângne poine je grepchî perâyilangbe hiâm ge keî gai lei, wain ne pe puâ geta zai grepchî dui ne pe paîni kageta lei;

¹²wain ne pe mik gie ze bam gu, zai tungdui ne pe geu ’ngngûpchup ze bam gu lei.

¹³Zebulunbe â sungkling kung ge lung gu lei; pa ze â dui’nneikuak ramme saube bâm chang gu lei, zai Sidon riâ pe gu heramrai chang gu lei.

¹⁴Issakarbe â hekunmerângne peranchibe kau, metie kena kakge tuâ’ntâhie bambe de lei;

¹⁵saube bâm ze â yi lei be pa ngau de lei, zai heram ze â peluiyi lei be pa chî de lei; dadege heput pung ra pe keîtoa lie gai de lei, zai nîm’ndibe kebang chang di de lei.

¹⁶Israelme ruage hezat kat changbe luigum ze Danbe â pe gu ziemmena je samram gu lei.

¹⁷Danbe ne ’mpuîki ge henêu chang gu, ’mpuîrikki hang megam chang ze, pe chingchuapeu ’ngngaîkeu de ra hangge, zai hekun pî ramme ka’nsaube kau chang gu lei.

¹⁸Ning gu tewka’nringbe je I kuâ lei, Hei Tingwang gau.

¹⁹Hereime ne Gadbe je ’nggi gu lei, kane pa ne penui je gua’nchu dai gu lei.

²⁰Asherbe hetak â keheube hetak chang gu, zai pa ne heguangme hetak teuyibe ramme tewpat ku lei.

²¹Naphtalibe â ’mpatkaibeibe heti ne hekuâ yibe peipatbe gum lei.

²²Josepbe â mâchî ’nchika’mmibe keî de lei, heduitering hiage ’nchika’mmibe keî bambe zeu; bekeî ramme kerie peireige dapgit bam lei.

²³Bai’mpi puame ne pechu kapkagetie de lei, pechu kap lei, zai tewhereu-desang gai bei de lei;

²⁴sede pe gu bai’mpi â ’ngngai mak bam lei, Jakobbe gu peranchipeu ba ne pe ba’mpûm ran tew’nchi gai bei de lei, (Melireîpeu Israel gu Tingchutum ji geneu),

²⁵ningchu ’ngngârapeu ning peu Rapeu zene, kehu ’mbe bambe tinggîm gu ’nnamgaibe ramme zene, zai ningchu ’nnamgairapeu Reziechibe Rapeu zene, ’ngkang ’mbe jeibambe gechukbe gu ’nnamgaibe ramme zene, henabâm benai hetung ramme ’nnam ramme zene, zai ’nnamgairabe Hera zene tew’nchi gai bei de lei.

²⁶Ning peu ’nnamgaibe ramme â betundaimakbe deiloa ramme riâ chang, zai a paume ’nnamgaibe sua hu’ngkeu lei; peize chiramme ze Josepbe peî ge, zai pe sikiname dage teichâmpatkaipeu mik-mekai ge peize bam lau.

²⁷Benjaminbe â tewsiabe henei de lei, hechua ge pa tewchatlube mei ji teu, zai hegî dege tewchatlube hemei ’nziteu lei,” ze acheu zeu.

²⁸Airamme leine Israelbe zat kereu-ze-kename ze de lei; zai aize penui je ’nnamgaibe luage penui je saliabe ze de lei, mi hangkat kat peireige pe dage kakezei-zeibe gene ’nnam gai de lei.

²⁹Chidadege penui je rangkenuî gai ze, penui ruage sa ze, “A zatme dage achu kaiherua gai zi gu de lei; Het’mpeu Ephronbe gu helu ge hekâuki bambe ge,

³⁰Mak-pela ge helu ge hekâuki bambe ge, Mamre gene naimikpat ’mbia Kanaanram lungge, heraw bâm hang Het’mpeu Ephronbe dage Abrahambe ne helu benai lui’mpam’ndibe bâm ge a peume dage achu bai gai lau.

³¹Chige penui ne Abrahambe benai pe nâu Sarale je bai gai de lei; chige penui ne Isaakbe benai pe nâu Rebekale je bai gai de lei, zai I ne chige Leale je bai gai de lei;

³²helu benai chige hekâuki bambe ze â Hethme dagene luilube kau de lei,” kacheu de lei.

³³Jakobbe ne pe name je geteilia kam gai lu dege, jeî ’mbe pe pî teichu gai lu pe chui lutud kai di de lei, zai pezatme dage pe chu kaiherua gai bei de lei.