Read Zeme Naga JENESIS 7 Bible Online

JENESIS 7 - Zeme Naga bible

JENESIS 7

¹Chidadege Tingwang ne Noabe je, “Nang benai ning kibâume ’nneikuak ge gut kam gai zu lau, aipau rehei ge nang â ziemmena kapelingbe kau lei be I ne ngau lu daseu.

²Hekaune ka’nchibe zat gene bepui, perie sena-na hekaune ’nchimakbe zat gene bepui, perie kat-kat;

³zai liamruabe ’nruine zat gene bepui, perie sena-na ning dage teigut kai le lau, kedeirei ge chipau zat ramme ringpat le ra hangge zeu.

⁴Hezie senane lungge kedeirei ge tîngna hedai, muî hedai tingrui ra hangge I lang gai gu daseu; zai I ne tewgaibe mâ-keringbe zat leine ze kedeirei gene I ne tew’ngga kam gai gu de lei,” ze rang gai de lei.

⁵Zai Tingwang ne pechu ranggaibeibe leine Noabe tew de lei.

⁶Kedeirei ge hedui naîwangbe ting ge Noabe kum haî seruk chang di de lei.

⁷Zai hedui naîwangbe gene ’mbia de ra hangge Noabe benai pe na ’mpeumi ramme, zai pe nâu benai pe na nâu ramme je ngua lu ’nneikuak ge gut kai di de lei.

⁸Hekaune ka’nchibe benai ’nchimakbe ramme, zai ’nruine ramme, zai kedei ge liaruabe ramme gene,

⁹bepui, perie, kena-na Noabe ne ’nneikuak ge teigut kai bei de lei, Hera ne Noabe je ranggaibeibe luigum zeu.

¹⁰Zai hezie sena bamgailube châng dege â kedeirei ge hedui naîwang chu di de lei.

¹¹Noabe ringbe tingkum haî seruk wangchangbe kum pakenabe kêu hezie kereu ze sena mai dege â sungkling gechukbe gene hedui-depin kedibe ramme puakpat chu di de lei, zai tinggîm gu leubaki ramme lat kai bei de lei.

¹²Chidadege â kedeirei ge hezie hedai, tingmuî hedai tingrui chu di de lei.

¹³Chipau mai gîm sing ge Noabe benai pe name, Shembe, Hambe, zai Japhethbe zai Noabe nâu benai pe name nâu ramme ’nneikuak lungge gut ti de lei;

¹⁴penui benai hekaune zat leine, kaurui zat leine, kedei ge liaruabe zat leine zai ’nruine zat leine ze kena-na gut ti de lei.

¹⁵Mâ-keringbe pechui lu ze bambe zat leine bepui, perie kena-na tei’nsangsiak lu Noabe dage ’nneikuak lungge gut ti de lei.

¹⁶Zai Hera ne pechu diegaibeibe luigum ze keringbe kau zat leine bepui, perie zuagut te lei; zai Tingwang ne pechu ’ngkam kainam ’ndi de lei.

¹⁷Kedeirei ge hezie hedai heduinaî ze bam de lei; zai hedui ’ntuachubi-bi ze ’nneikuak ze hedui peirei ’ntiamchu di de lei, zai kedei gene kehu ’mbe ’nneikuak ze ’ntiamrua bam di de lei.

¹⁸Heduinaîbe sau mak, zai kedeirei gene sungchubi-bi ze bam gerei de lei; hedui peirei ’mbe ’nneikuak â ’ntiamlia ze bam de lei.

¹⁹Hedui sungchu’ngngu-desangdibe ziegene ting kehube kangge kedeiloa kehube leine naîchim kam di de lei;

²⁰kedeiloa kehube peirei gene sâu kereu ze mengeu naîchuchang di ze bam de lei.

²¹Mâ-keringbe zat kedeirei ge ’ngngai ze bambe zat leine, ’nruine ramme, perui ramme, hekaubena zat ramme, pedungtew ze lungbe zat ramme, zai ziemmena ramme leine chai gai kam di de lei;

²²kedei changkube ge pe dage keringbe chui lu bambe zat leine chai kam di de lei.

²³Kedeirei ge bambe zat leine ziemmena zai hekaubena ramme, zai liaruabe zat ramme, zai liamruabe ’nruine zat ramme leine je pa ne tew’ngga kam ’ndi de lei. Noabe benai pe dage ’nneikuak lungge bamdime je runne ’nsak kai de lei.

²⁴Zai hezie haî kat ze rengeu riâ â kedeirei ge heduinaî ze bam de lei.