Read Zeme Naga JENESIS 9 Bible Online

JENESIS 9 - Zeme Naga bible

JENESIS 9

¹Zai Hera ne Noabe benai pe name je ’nnam gai ze penui je, “Heluîhing ze pungbi-bi ze bam zu lau, zai kedeirei lungpuigit ze bam zu lau.

²Hekaune ramme leine, ’nruine ramme leine zai hekâ ramme leine ne ningnui je hing-desang ze bam gu lei; ningnui ba ge penui je peipat kai de lei.

³Mâ-keringbe ’ngngairuabe zat leine ningnui hetak hang chang ra de lei; zai hegireuneu ka’ndiakbe bang ramme ningnui hang I ne peigai’ndibe luigum ze, mâgetaleine ningnui je I ne pei de lei.

⁴Hemei ze pekaupui keringbe luî gene ningnui teumakrabe runne lei, chize pe jai je rang lei.

⁵Ning gu keringbe jai mî ze I ne peiruî dai gu lei; ziemmena keringbe lube hekaune je du I ne hekûmtew gu zai tewchat sing gu lei.

⁶Hera ne ziemmena je peluî gene ’ndam gai de lei; chidaze mi-mige de ziemmena je kegîbe kau je â pechu du ziemmena ne tewchat ku lei.

⁷Zai ningnui â heluîhing ze pungbi-bi ze bam zu lau, kedeirei ge misongga ze heluîhing ze kedeirei ge lungtuipik ze bam zu lau,” ze rang gai lei.

⁸Dadege Hera ne Noabe benai pe name je,

⁹“Pie le lau, I ne nang benai ning dagene piakeume leine dage,

¹⁰zai keringbe zat leine, ’nruine ramme benai hekaune ramme ’nneikuak gene nang nguapatkadaibe leine dage a gu samhatkaibe tew’ntip kai de lei,

¹¹aipau sam ramme gene ning dage I samhat kai de lei: keringbe bambe zat leine je hedui naîwangbe ne mâtew-tewsede tew’nsia dai ta de ra I deseu gai de lei; mâtew-tewsede heduinaîwangbe ne kedeirei ze tew’nsia ta du de lei.

¹²Zai Hera ne rang ze, betingbeta hangge nang benai, zai keringbe zat leine kakge I samhatkai’ndibe ze aize ne ka’nchetbe de lei,

¹³kemâu ge a gu ’ngkîtplei kai lei, chize ne kedeireime benai a kakge a gu samhatkaibe chibam ra ka’nchetbe chang ra de lei.

¹⁴Kedeirei ge kemâu ramme I teiwang gai bei, zai kemâu ramme ge ’ngkîtplei ngau dezai,

¹⁵anai kakge, zai hekaune ramme leine dage a gu samhatkaibe ze I chibam gu lei; dezai hedui ne keringbe leine je tew’nsia ra naîwang dai ra mak lei.

¹⁶Kemâu ramme ge ’ngkitplei puakpat dezai chize I pie gai gu, zai I benai kedeirei ge keringbe zat leine kakge betingbeta hang samhetkai’ndibe ze ’nningdau bam gu lei,” ze kacheu de lei.

¹⁷Hera ne Noabe je, “Aize I benai kedeirei ge keringbe zat leine kakge samhatkaibe gu ka’nchetbe I kaibe ze de lei,” ze kacheu de lei.

¹⁸Noabe name bau ’nneikuak gene zuapatme bau ze Shembe, Hambe, zai Japhethbe de lei. Hambe ze â Kanaanbe peu lei.

¹⁹Aime hangchum ze â Noabe name bau de lei; kedeirei ge ziemmena leine aime dagene hingkeu de lei.

²⁰Noabe ne kedei tâ tewteu-railangpeu de lei. Grepchî merie pa tew de lei;

²¹zai wain pa sak kai lu dege, pa meneu di, pe paîni kai ta di pumlâng pe gu hetiamki ge jei bam de lei.

²²Dadege Hambe, Kanaanbe peu ne pe peu pumlâng bambe ngau lu hela zuapat ze pe sipeu benai pe kinapeu je salia bei de lei.

²³Chidadege Shembe benai Japhethbe ne paî tei lu, penai keitoa ge tap kai lu, ’nchai’ngngîngut ze penai peu gu pumlâng ze bambe tapchim gai de lei; penai ju ’nnuk ti ze penai peu pumlâng ze ngau mak tai lei.

²⁴Noabe kameneube gene ’nrakchu dai dege pe na henabipeu ne pechu ’ndaikau tew gai bei mei be chî lu dege,

²⁵pa ne, “Kanaanbe je deset kai de lei! pa â pe sime gu kebangme gu kebang chang gu lei.

²⁶Shembe Rapeu Tingwang je toa lau! Kanaanbe ne Shembe gu kebang chang gu lei.

²⁷Hera ne Japhethbe je tewpung gai be lau! peize Shembe hetiamki ramme ge lung ze bam lau, zai Kanaanbe ne pe gu kebang peize chang lau,” ze rang gai bei de lei.

²⁸Heduinaîbe châng Noabe kum haî chum ze rengeu ring gai de lei.

²⁹Noabe ringbe tingkum pelane haî sekui ze rengeu lei, zai chipau chângge pa chai di de lei.