Read Zeme Naga 2 SAMUEL 12 Bible Online

2 SAMUEL 12 - Zeme Naga bible

2 SAMUEL 12

¹Zai Tingwang ne Nathanbe je Dabidbe dage lang gai de lei. Pa pe dage wang lu pechu kacheu de lei, “Namdi kat ge ziemmena hangna bam lei, hangkat â lungyi, zai kêdapeu â lungsia lei.

²Lungyipeu â melidung benai getumdung misongga bam lei.

³Kane lungsiapeu â mâ de ’ngga lei, meli meleupoine kat pa ne luilube runne lei. Zai pa ne ’ngkutchîngchu ze, pa benai pe name dage nguachîngchu de lei; pa teube gene teu zai pe piak gene sak, zai pe ga ge jei ze bam lei, zai pe hangge chize pe na ’mpuimi gum chang lei.

⁴Chunage lungyipeu dage tebeîtewpeu wang gai lei, zai pe dage tebeîtew ze wanggaipeu hangge teleu ra pe gu melidung benai getumdung ruagene katte lu ra pa nei mak lei, kane pa ne lungsiapeu gu melipoine lu lu pe dage wanggaipeu hangge chize ne teleu gai lei,” ze acheu zeu.

⁵Dadege Dabidbe chi ziemmena peireige pe lumpum-desang di de lei; zai pa ne Nathanbe je, “Tingwang bambe ziegene aipau tâ tewpeu â chaikezei lei;

⁶zai pa ne melipoine dêt medai peiruî dai ra lei, pa ne aipau tâ tewbe ziegeneu, zai pa ka’nggiabe gabe ziegeneu,” ze kacheu de lei.

⁷Nathanbe ne Dabidbe je, “Chipaupeu ze nang de lei. Aigum ze Tingwang Israelme Rapeu ne rang lei, ‘Israelme peireige heguang hang ningchu I ’nnuk kai lei, zai Saulbe ba gene ningchu I meupat kai lei;

⁸zai ning wangpeu ki ze ningchu I pei bei de lei, zai ning wangpeu nâu ramme je ning ga ge pei gai bei de lei, zai ningchu Israelme ki benai Juda ki pei gai bei de lei; zai aize cham kagesang rei zai â, ningchu I misongga ze kaisî gai gu lei.

⁹Pe mikngau ge kesiabe tew ra, ’ndaitew ze Tingwang sam ze nang ngauka’nna lau? Het’mpeu Uriabe je nang ne hiazutkie ne bi ’ndi de lei, zai pe nâu je ning nâu hangge lu lu, pechu Ammonme gu hiazutkie ne bi ’ndi de lei.

¹⁰Chidaze chunage ning ki gene mâdau de hiazutkie ’mbiapat ra mak lei, nang ne achu ngau’nna ze Het’mpeu Uriabe nâu je ning nâu hang lu’ndibe ziegeneu,’ acheu zeu.

¹¹Aigum ze Tingwang ne rang lei, ‘Pie le lau, ning ki gene ning peireige kesiabe I tew gai gu lei; zai ning mikngau gene ning nâu ramme je I ne lu lu, penui je ning ramna’mpeu hangge pei ’ndu lei, zai pa ne ning nâu ramme je aipau tingnaimik babe ge ’nrai ze bam gu lei.

¹²Nang chize ’ngkim ne tew lei, kane aipau ze Israelme leine suagene benai tingnaimik babe bambe suagene I tew gai gu lei,’ acheu zeu,” ze kacheu de lei.

¹³Dabidbe ne Nathanbe je, “Tingwang dage I hemui gai ’ndi de lei,” ze kacheu de lei. Zai Nathanbe ne Dabidbe je, “Tingwang ne ning gu hemui lutua ’nde lei; nang chai ra mak lei.

¹⁴Acheuleusede aipau tâ tewbe zene nang Tingwang je tewkahelêube ziegene napoine ning dagene lungkeube ze chai gu lei,” ze acheu bei de lei.

¹⁵Dadege Nathanbe pe ki lam’mbe tat ti de lei. Zai Tingwang ne Uriabe nâu dagene Dabidbe hangge lungkeube napoine je tew’nteu gai bei ze, ’nrâ di de lei.

¹⁶Dadege Dabidbe ze napoine hangge Hera dage kiam de lei, zai Dabidbe teseurei lei, zai gut lu kedei ge tingmuî tâluî tuâ bam di de lei;

¹⁷zai pe ki ge gechîngme pe hiage pechu kedei gene kuakchu gai ra sapbam de lei; kane pa chu mak lei, zai penui je tak nguateu mak lei.

¹⁸Hezie pasenabe mai ge napoine chai di de lei. Zai Dabidbe guâ ka’ngguame ze napoine â chai de lei be rasam pechu saliahing de lei, penui ne, “Pie le lau, napoine ringbe luage, anui pechu ’mpau bei, pa anui kuâ ’ngkingmeu ze, ’ndaigum ze napoine chai de lei be pechu anui salia chî ra lau? Pa pe runne pechu mâge â tew’nteu gu lei,” ze kacheu de lei.

¹⁹Kane pe guâ ka’ngguame ne damtelum bambe Dabidbe ngau lu dege, napoine â chai di de lei be pa chipat ti de lei, zai Dabidbe ne pe guâ ka’ngguame je, “Napoine chai di de mei?” ze kacheu lei. Penui ne kak ze, “Pa â chai de lei,” ze acheu bei de lei.

²⁰Dadege Dabidbe kedei gene zuachu lu, hedui’nzut lu, zai pechu taudui ’nnuk kai lu, pe paîni kahelei de lei, zai Tingwang ki ’mbe pa gut lu, kakellum de lei; dege pa pe ki lam’mbe tat ti de lei, zai pa ne tak kie gai bei ze, penui ne pe suage tak teipat kai bei ze, pa teu de lei.

²¹Dadege pe guâ ka’ngguame ne pechu rang ze, “Aipau ze nang ’ndaikau tak tew lau? Napoine hangge pa ring ’ngka â, nang teseurei zai hap bam lei; kane napoine chai di dege â, nang chu lu hetak teu zeu,” ze kacheu de lei.

²²Pa ne sa ze, “Napoine ringbe lua I â teseurei ze hap lei; ‘Tingwang ne achu ’nggia gai ze, napoine ring dai gu mei be châu ne chî ra lau,’ ze I kacheube ziegeneu.

²³Kane pa â chai de da, ’ndaitew ze teseurei ra lau? Pechu I teiwang dai dui semei? Pe tailam I tat kû lei, kane pa â a tailam heliwang dai ra mak lei,” ze kacheu de lei.

²⁴Dadege Dabidbe pe nâu Bathshebale je tum gai lu, pe tailam ’mbe gut lu, pechu ’nna gai de lei; zai pa ’mpeumi lungkeu de lei, zai pe ji Solomonbe ze pa kû gai de lei, zai Tingwang ne pechu hung lei.

²⁵Zai kemeu’mpeu Nathanbe ne pe samkela lang gai de lei; dadege pa pe ji Jedidiabe ’ntak kai lei, Tingwang ziegeneu.

²⁶Chuna Joabbe Ammonme gu Rabba je ’nggi ze heguangme gu namdi lu ’ndi de lei.

²⁷Zai Joabbe ne Dabidbe dage hepâupaume je lang gai ze, “I ne Rabba je ’nggi lu de lei; chipau peireige du I ne heduikiebe namdi ze lu ’nde lei.

²⁸Chunage ziemmena kêdame je kûwang’ndui gai ze, namdi ze tuaguâ lu, chize lu ne zu lau; I ne namdi ze lu lu, a ji gene ’ntakkaibe namdi chang mak ra hangge zeu,” ze kacheu de lei.

²⁹Dadege Dabidbe ziemmena leine je kûwang’ndui lu, Rabba ’mbe tat ti de lei, zai chize ’nggi ze lu ’ndi de lei.

³⁰Zai pa ne penui gu heguangpeu gu heguang peichûp pe peî gene lu’ndi de lei; chipau rît ze gechâk talent kat lei, zai chipau lungge tingchu pemîhungbe bam lei; zai chize Dabidbe peî ge luak kai de lei. Zai pa ne namdi gu hereichâ misongga ze teipat te lei.

³¹Zai pa ne chige ziemmena bamme je nguapat te lei, zai penui je hechingrumbe kie ramme, zai hegeîrang ramme, zai hegeî’nrei ramme ne tâtew ra kai bei de lei, zai penui je hegamlangbe ’mmang ge tâtew ra tew gai bei de lei; zai aigum ze pa ne Ammonme leine je tew gai de lei. Dege Dabidbe benai baudime Jerusalem ’mbe helatwang dai di de lei.