Read Zeme Naga 2 SAMUEL 14 Bible Online

2 SAMUEL 14 - Zeme Naga bible

2 SAMUEL 14

¹Chunage Zeruiale na Joabbe ne heguang lung tak ze Absalombe dage zuatat ti de lei be chî di de lei.

²Zai Joabbe je Tekoa keloa ’mbe lang gai ze, chige ’mpuimi kaningchingbe kau je ngau lu, pechu salia de lei, “Kadesuipui helî gum bam lau, zai kadesuibe paîni kai le lau; ning dage mâ-châ ’nnuk kai se lau, kane ’mpuimi chaidime je naimikpui misongga desui ze bamdibe gum ze bam lau,

³zai heguang dage tat lu ze, pechu aigum ze salia lau,” ze acheu zeu. Dadege Joabbe ne sam sa ra getei gai bei de lei.

⁴Tekoa’mpeu ze heguang dage wang dege, kedei ge pe ju ’ngkumkeu lu, hengêu pei gai de lei, zai acheu sa ze, “’Ngnga lau, Hei heguang gau,” kacheu de lei.

⁵Zai heguang ne pechu rang ze, “’Ndaikau nang kahereu lau?” kacheu de lei. Pa ne kak ze, “Hei, I â kemîpui lei, a napeu â chai de lei.

⁶Zai ning guâ ka’ngguapui pe name rehangme hangna bam lei, zai penai karai helu gene kahegei lei; chige mî ne de penai je ’ncha gai ra ga lei, zai hangkat ne kêdabepeu je lak bei ze, pa chai di de lei.

⁷Chunage pe kiduîme leine ning guâ ka’ngguapui je ’nggichu di ze, zai penui ne kacheu de lei, ‘Pe kinapeu je tewchatpeu je peipat kai zu lau, dezai anui ne pe kinapeu je tewchatbe ziegene pechu tewchat ra hangge zeu,’ acheu zeu; zai chigum ze penui ne pehaî-pehik du tew’ngga gai gu de lei. Aigum ze penui ne a gu mechingkâng ’nsakkaidiakbe du tew’mmit kam gu, zai a napeu hangge kedeirei ge pe ji du, zai ’nsakpatbe du sâu gai ra mak te lei,” ze kacheu de lei.

⁸Dadege heguang ne ’mpuimi je, “Ning ki lam’mbe tatchu lau, zai ning deu ge I sam rang gai gu lei,” ze kacheu de lei.

⁹Zai Tekoa’mpeu ne heguang je, “A peireige kemaube peize chang du lau, a wangpeu, heguang gau, zai a peu ki peireige peize chang lau; peize heguang benai pa heguang-bamrak ze kemaube ga lau,” kacheu de lei.

¹⁰Heguang ne, “Mige ne ningchu mâ-samge salia zai â, pechu a dage teiwang lau, pa ne ningchu mâdau de deîtau dai ra mak lei,” ze acheu bei de lei.

¹¹Dege pa ne sa ze, “Peize heguang ne Tingwang ning Rapeu dage gekietew lau, dezai hejai kûm tewpeu ne gî dai mak ra hang, zai a na rehang’mpeu je tew’ngga mak ra hang,” ze kacheu de lei. Pa ne, “Tingwang bambe ziegene, ning na rehang’mpeu peîtam katte kedei ge keu gai ra mak lei,” ze acheu bei de lei.

¹²Dadege ’mpuimi ne sa ze, “Peize ning guâ ka’ngguapui ne a wangpeu heguang sam sa gai ra pei lau,” ze kacheu de lei. Pa ne, “Sa gai zu lau,” acheu bei de lei.

¹³Zai ’mpuimi ne, “Acheuzaine ’ndaitew ze Hera gu ziemmena ramme peireige aigumbe ka’nning lau? Pa ne kelitua’ndipeu je heguang ne kilûng ’mbe teiwang dai makchai â, aipau samria peigaibe ge heguang pe runne pechu tew’ngkui gai de lei.

¹⁴Anui ’nteumena chai gu de lei, anui â kedei ge hedui ruîgaibe teichudaichilakbe gum de lei; kane pa ne kelitua’ndipeu je tuâpat kai mak ra ka’nsappeu keringbe ze â Hera ne lu ra mak lei.

¹⁵Chunage aipau ze a wangpeu heguang dage salia ra wang de lei, ziemmename ne achu kedungbeibe ziegeneu, zai ning guâ ka’ngguapui ne, ‘Heguangpeu je I ’mpau gu lei, pe guâ ka’ngguapui ne gekiebe heguang ne tew gai gu lei.

¹⁶Heguang ne ’ngking gai gu lei, zai achu benai a na je Hera gu heurâ gene tew’ngga ’nde ra tewpeu ba gene pe guâ ka’ngguapui je ’nripat kai gu lei,’ ze ’nning gai de lei.

¹⁷Zai ning guâ ka’ngguapui â, ‘A wangpeu heguang sam ne achu temi ra tew gai gu lei,’ ze acheu ’nning gai de lei; a Wangpeu heguang â Hera gu angel’mpeu gum ze keyibe benai kesiabe ’nningchi daseu. Tingwang ning Rapeu ning dage peize bam lau,” ze kacheu de lei.

¹⁸Dadege heguang ne ’mpuimi je kak ze, “Ningchu I mâ-ka’nneube leine mâ de a dagene teibai se lau,” ze kacheu de lei. Zai ’mpuimi ne, “Peize a wangpeu heguang ne sa gai lau,” ze kacheu de lei.

¹⁹Heguang ne, “Airamme leine ge Joabbe ba ning dage la mei?” ze kacheu de lei. ’Mpuimi ne kak ze, “Nang bambe ziegene, a wangpeu heguang gau, a wangpeu heguang ne sagai’ndibe gene mî de hezat’mbia mei nune, heku’mbia mei ze ’nriktatchi lak lei. Achu langgaipeu ze â ning guâ ka’ngguapeu Joabbe de lei; ning guâ ka’ngguapui je aipau sam leine geteigaipeu â pa de lei.

²⁰Patedeu bambe tak ze tewkeli gai ra hangge ning guâ ka’ngguapeu Joabbe aize tew gai de lei, kane a wangpeu â mâgetaleine kedeirei ge bambe chî ra Hera gu angelme gu kaningchingbe gum ze kaningching lei,” ze kacheu de lei.

²¹Dadege heguang ne Joabbe je, “Pie le lau, chunage aize I pheu gai de lei; tat ze rehang’mpeu Absalombe je nguawang dai lau,” ze acheu bei de lei.

²²Zai Joabbe kedei ge pe ju ’ngkumkeu lu, hengêutewbe pei gai de lei, zai heguang je rechâ gai de lei; zai Joabbe ne, “Nemai ge ning guâ ka’ngguapeu ning mikngau ge ka’nggiabe ngau lu de lei be chî de lei, a wangpeu heguang gau, chige ze heguang ne pe guâ ka’ngguapeu gekiebe pheugaibeibe ziegeneu,” ze kacheu lei.

²³Dadege Joabbe chu lu ze Geshur ’mbe tat ti de lei. Zai Absalombe je Jerusalem ’mbe nguawang de lei.

²⁴Zai heguang ne, “Peize pe ki ge bamchâm de lau; pa â a suage wang mak ra lei,” ze acheu bei de lei. Dadege Absalombe pe ki ge bamchâm di de lei, zai heguang masuage wang mak tai lei.

²⁵Chuna Israelram leine ge mige pa peluiyibe satoa-desang bam ra Absalombe gumbe mî de ’ngga lei; pe pîdei gene pe peî’nning changbe mâ de pe dage siabe heziâk ’ngga lei.

²⁶Zai pa pe peîtam chiap kai dege (Tingkum tûn ’nsangne ge pa pe peîtam punggailak ti dege chiap-chiap dadegeu), pe peîtam pa ’nchu gai ze heguang gu hedu ge shekel haî na lei.

²⁷Absalombe dage ’mpeumi napoine hangchum, zai heleume hangkat pe ji Tamarle kacheupui bam lei, zai pa â ’mpuimi heleuyibe kau lei.

²⁸Dadege Absalombe Jerusalem ge kum na ling ze heguang suage wang mak ze bam de lei.

²⁹Dadege Absalombe Joabbe dage, heguang dage pechu lang gai ra lang gai de lei; kane Joabbe wang mak tai lei. Zai pakenabe pa lang gai kadai de lei, kane Joabbe wang mak tai lei.

³⁰Dadege pa ne pe guâ ka’ngguame je, “Pie le lau, Joabbe gu hening lu, a lu taige la lei, zai pe gu barlimeu lamui lei; tat ze chige hemi’ntau gai be lau,” ze acheu bei de lei. Dadege Absalombe guâ ka’ngguame ne tat ze hemi’ntau gai bei de lei.

³¹Dadege Joabbe chu lu, Absalombe tailam pe ki lam’mbe tat ti de lei, zai pa ne pechu rang ze, “’Ndaitew ze ning guâ ka’ngguame a gu helu ge hemi’ntau gai lau?” ze kacheu de lei.

³²Zai Absalombe ne Joabbe je, “Pie le lau, ‘Ailia wang lau, “’Ndaitew bei ze I Geshur gene wang lau? I chige bamgaidaiderabe ze a hangge yibi gu lei,” kacheube sam heguang je ’nneu ra ningchu I ne lang gai ra hangge zeu. Chunage chidaze heguang bambe bâm ge gut ra achu pei lau; zai a dage a mâu bam dizai â peize pa ne achu tewchat ne lau,’ kacheube sam ning dage I lang gai de lei,” ze kacheu de lei.

³³Dadege Joabbe heguang dage tat ti de lei, zai pechu salia bei de lei. Dadege heguang dage pa wang lu, heguang suage pe ju kedei ge ’ngkumkeu gai de lei; zai heguang ne Absalombe je kakeput te lei.