Read Zeme Naga 2 SAMUEL 15 Bible Online

2 SAMUEL 15 - Zeme Naga bible

2 SAMUEL 15

¹Aipau chângge Absalombe ziemmena hangrengeu pe suage pakrame zai pe hangge timriang kat zai hekun ramme lupat kai de lei.

²Zai Absalombe chuzisi chu lu, keriekemui ’mpuî hiage sap-sap lei, zai mige heguang dage hetû samram gai ra wangbe ngau lu dege, Absalombe ne pechu kû gai lei, zai “’Ndaikau namdi gene nang wang lau?” ze acheu-cheu lei. Zai pa ne, “Ning guâ ka’ngguapeu â Israelme ram ge chigumbe kau, zai chigumbe zat lei,” acheu dege,

³Absalombe ne pechu, “Pie le lau, nang ne sabe ze yi zai tâu de lei; kane ning kuâ ’ngking ra heguang ne ziemmena langpat kai mak lei,” ze acheu ka’nzie lei.

⁴Absalombe bepeirei ge du sa gai sua ze, “Hei, heram lungge I ze samrampeu nung laîzai hêu! Chidezai mi-mige de hetû mei nu mâ-pedeu bamme mei a dage wang le ra, zai I ne pechu samramka’nzeibe pei gai be ra hangge zeu,” ze kacheu de lei.

⁵Zai mige pe dage hengêutewbe pei ra wangkahechut tâne pe ba pa getuapat lu, zai pechu tei lu, pechu keput-put lei.

⁶Aigum ze Israelme heguang dage samram gai ra wangme leine je Absalombe ne tew de lei; chigum ze Absalombe ne Israelme lung ramme duî kam ’ndi de lei.

⁷Zai kum medai kam dadege, Absalombe ne heguang je, “Hebron ge I Tingwang dage hatkai’ndibe, peipat kai ra achu tat ra pei lau.

⁸Ning guâ ka’ngguapeu, Aram ge Geshur ge bam ’ngka, ‘Tingwang ne achu Jerusalem ge teiwang gai dai bei zaine â, Tingwang dage herâtewbe I peipat kai gu lei,’ acheu ze I samhat kai ’ndi daseu,” ze kacheu de lei.

⁹Heguang ne pechu, “Yi ze tatchu lau,” acheu bei de lei. Dadege pa chu lu, Hebron ’mbe tat ti de lei.

¹⁰Kane Absalombe Israelme zat leine dage hekim ne sampaume je lang gai ze, “Ningnui hegeîluîkie kuâ seugap dezai, ‘Hebron ge Absalombe â heguang de lei,’ acheu sa lau,” ze rang gai de lei.

¹¹Absalombe dage ziemmena haî na hesangme Jerusalem gene ’nnâgaibeime tat ti de lei, zai penui â ’nzeitunbe gene mâ de chî mak ze tat ti de lei.

¹²Zai Absalombe herâtewbe peipatbe luage, Dabidbe je mâ-ranggaipeu, Giloh’mpeu Ahithophelbe je pe gu namdi Giloh gene kûwang ra lang gai de lei. Zai kesiabe kelutewbe peranchi-desang ze bam lei, zai Absalombe dage ziemmename pung ze bam di de lei.

¹³Zai Dabidbe dage sampaupeu wang ze, “Israelme lung ramme Absalombe chai suitat kam de lei,” ze kacheu de lei.

¹⁴Dege Dabidbe ne pe guâ ka’ngguame pe dage Jerusalem ge bamme leine je rang gai ze, “Chu lau, anui pak kei lei, makchai â, Absalombe dagene anui hangge ’nreipatrabe ’ngga de lei; tatkelua zu lau, pa ne anui je ’nsachangkelua mak ra hangge zeu, zai anui peireige kesiabe teikeu gai ze namdi ze hiazutkie mui ne bihiam gai mak ra hangge zeu,” ze kacheu de lei.

¹⁵Zai heguang guâ ka’ngguame ne, “Pie le lau, ning guâ ka’ngguame â a wangpeu heguang ne ’ndaikau tew ra ’nning gai mei be ze kedâ lu de lei,” ze kacheu de lei.

¹⁶Dadege heguangpeu zuapat ti de lei, zai pe chai ge pe kibaume leine zuapat ti de lei. Zai heguang ne nausîpui hangkereu je heki reî ra sâudiak kai de lei.

¹⁷Dadege heguang zuapat ti de lei, zai baudime leine pe chai suitat ti de lei; zai nâlangbe ki ge penui sau gai lei.

¹⁸Zai pe guâ ka’ngguame leine pechu ’nzûtat ti de lei; zai Kerethme leine zai Pelethme leine zai Gath gene Gathme ziemmena haî seruk, pe chai suitatme heguang sua ’mbe raîtat ti de lei.

¹⁹Zai heguang ne Gath’mpeu Ittaibe je, “’Ndaitew ze nang du anui dage tat lau? Wang dai zu lau zai heguang dage bam lau, nang â hesang’mpeu daseu, zai ning ki gene pakwangbe kau daseu.

²⁰’Nzimai gene nang wang rei da, zai nemai anui dage ningchu nguatebeîtew gai ra lei ze I ne tatduibe bâm ’mbe tat daseu. Wang dai zu lau, zai ning sikiname je ning dage ngua le lau, zai Tingwang ne ningchu hungka’ntipbe benai kapelingbe pei gu lei,” ze acheu bei de lei.

²¹Kane Ittaibe ne heguang je kak ze, “Tingwang bambe ziegene, zai a wangpeu heguang bambe ziegene, a wangpeu heguang ’ndai’ngge bam ra mei be ge, chai zai ring zai, chige ning guâ ka’ngguapeu du bam gu lei,” ze kacheu de lei.

²²Zai Dabidbe ne Ittaibe je, “Acheuzaine, tat’nduâ zu lau,” ze acheu bei lei. Dadege Gath’mpeu Ittaibe tat’nduâtat ti de lei, zai pe dage bamme napoine ramme leine zai pe gu ziemmena leine je ngua lu tat ti de lei.

²³Zai heram pelane ne ziemmena ’nteumena tatpatbe ge hapkakeleu de lei, zai heguang ze Kidron geuki kapat ti de lei, zai ziemmena ’nteumena hênamkang ’mbe tatzuatat ti de lei.

²⁴Zai Abiatharbe hang de lei, zai pie le lau, Zadokbe du Lebime leine benai Hera gu samhatkaibe hingdebung pua lu wang de lei; zai namdi gene ziemmena ramme tatkapat mak tâne Hera gu hingdebung ze penui teikeu gai lu kuâ bam de lei.

²⁵Dadege heguang ne Zadokbe je, “Hera gu hingdebung ze namdi ’mbe puatat dai zu lau. Tingwang mikngau ge ka’nggiabe I ngau lu zai â, pa ne achu nguawang gai dai gu, zai chi benai pebâm ze achu ngau ra pei gu lei;

²⁶kane pa ne, ‘Ning dage a suiyibe ’ngga lei,’ acheu zai â pie le lau, aige I lamui lei, peize pe dage yira-rabe achu peize tew gai zu lau,” ze acheu bei de lei.

²⁷Heguang ne du tingkupeu Zadokbe je rang gai de lei, “Pie le lau, namdi ’mbe ning suiyi ze tat dai zu lau, nang benai Abiatharbe, ningnai na hangna, ning na Ahimazbe, zai Abiatharbe na Jonathanbe je ngua lu ze tatchu lau.

²⁸Pie le lau, achu ranglia ra sam ning dagene wang mak tâne hênamkang depiau ge I bamkuâ gu lei,” ze acheu zeu.

²⁹Dadege Hera gu hingdebung ze Jerusalem ’mbe Zadokbe benai Abiatharbe ne puatat dai di de lei; zai chige penui bam de lei.

³⁰Kane Dabidbe olib loa rehi tat-hang di de lei, pe peî’ngkum lupat lu hapzutza ze pe pîrua tat ti de lei; zai baudime pe dage bamme leine penui peî ’ngkum lu, penui hapzutza ze tat-hang di de lei.

³¹Zai Dabidbe je, “Ahithophelbe â Absalombe je kelutewme ruage bambe kau de lei,” ze salia bei de lei. Zai Dabidbe ne, “Hei Tingwang gau, ningchu I kakellum lei, Ahithophelbe ne mâ-kerangbe ze kemiebe hang tewkeli gai dai be lau,” ze kacheu de lei.

³²Hera je kakellumbe bâm, peloa’ntûm ge Dabidbe chang dege, pie le lau, Arka’mpeu Hushaibe pa mechuapui hit ze, zai pe peî ge kedei bua gai lu pechu hedau ra wang de lei.

³³Dabidbe ne pechu, “Nang ne achu nguatat ti zai â achu nang tew’nchuak ku de lei.

³⁴Kane nang namdi ’mbe helatwang dai ze, Absalombe je, ‘I ning guâ ka’ngguapeu chang ra de lei, Hei heguang gau, tingtie’ngka ning peu guâ ka’ngguapeu I chang bam gum ze, chuna du ning guâ ka’ngguapeu I chang gu lei,’ ze rang gai dizai â Ahithophelbe ne rangbe ze a hangge nang ne duî gai gu de lei.

³⁵Chige Tingkupeu Zadokbe benai Abiatharbe, ning dage bam mak mei? Daze heguang ki gene nang mâ-mâ seube leine, Zadokbe benai Abiatharbe tingkupeu dage salia be lau.

³⁶Pie le lau, penai na rehangme kena penai dage, Zadokbe na Ahimazbe benai Abiatharbe na Jonathanbe lamui lei; zai penai dagene nang mâ seulube leine a dage lang gai ra lei,” ze acheu bei de lei.

³⁷Dadege Dabidbe kangpeu Hushaibe namdi ge wang de lei, Jerusalem ge Absalombe gutbe gum zeu.